На «Еўрабачанне» ад Ізраіля паедзе дзяўчына, якая выжыла падчас нападу ХАМАС на фестываль Nova
23.01.2025 / 10:17
Ізраіль на конкурсе «Еўрабачанне» ў гэтым годзе будзе прадстаўляць спявачка Юваль Рафаэль. Яна цудам выжыла падчас нападу тэрарыстаў ХАМАС на музычны фестываль Nova 7 кастрычніка 2023 года.
Юваль Рафаэль. Фота: eurovision.tv
24-гадовая спявачка выйграла конкурс «Наступная зорка», пераможца якога едзе на «Еўрабачанне».
«Я не магу выказаць, наколькі я ўсхваляваная і гатовая! Дзякуй вам за тое, што аказалі мне гэты вялікі гонар і даверылі прадстаўляць маю краіну на грандыёзнай сцэне «Еўрабачання» ў Швейцарыі», — заявіла яна.
Песня Рафаэль на конкурсе пакуль не вядомая.
7 кастрычніка 2023 года Рафаэль была на фестывалі Nova, на які напалі тэрарысты ХАМАС. Яна разам з некалькімі дзясяткамі чалавек хавалася ў бамбасховішчы побач з месцам правядзення фестывалю.
У бамбасховішчы хаваліся каля 50 чалавек, толькі 12 з іх выжылі. Рафаэль каля васьмі гадзін праляжала пад целам адной з загінулых. «Я не магу перадаць словамі цяжар мёртвага цела», — казала яна.
Конкурс «Еўрабачанне» пройдзе ў 2025 годзе ў швейцарскім Базэлі.