Трамп усё ж уводзіць мыты на тавары з Канады, Мексікі і Кітая

Прэзідэнт ЗША Дональд Трамп заявіў, што з 4 сакавіка запрацуюць 25-працэнтныя тарыфы на тавары з Канады і Мексікі, а таксама будуць уведзеныя дадатковыя 10-працэнтныя тарыфы на імпарт з Кітая. Пра гэта ён напісаў на сваёй старонцы ў Truth Social.

Дональд Трамп. Фота: Andrew Harnik / Getty Images 

Паводле слоў амерыканскага лідара, з Мексікі і Канады ў ЗША працягваюць паступаць наркотыкі «ў вельмі высокіх і непрымальных колькасцях», значная частка якіх вырабляецца і пастаўляецца з Кітая.

Трамп падкрэсліў, што летась ад гэтых наркотыкаў памерлі больш за 100 тысяч чалавек, а за апошнія 20 гадоў загінулі «мільёны людзей».

«Мы не можам дапусціць, каб гэтае бедства працягвала наносіць шкоду ЗША, і таму, пакуль яно не спыніцца ці не будзе сур'ёзна абмежавана, прапанаваныя тарыфы, запланаваныя на 4 сакавіка, сапраўды ўступяць у сілу, як і было запланавана», — напісаў Трамп.

Інфармацыя, што адміністрацыя Трампа прыняла рашэнне ўвесці высокія мыты супраць сваіх двух найбліжэйшых суседзяў на поўначы і поўдні, а таксама Кітая, з'явілася 31 студзеня. Пасля размоў з кіраўніцтвам гэтых краін, аднак, было прынята рашэнне адкласці ўвядзенне гэтых мераў на месяц.

Каментары да артыкула