«Patrebnaja charaktarystyka». Čytačka vyśvietliła, jak stać družyńnikam ci vystupić na kancercie da refierendumu
Na pradpryjemstvach ciapier prachodziać kancerty, pryśviečanyja refierendumu. Taksama tydzień tamu stała viadoma, što narodnyja družyny mohuć pryciahnuć da achovy paradku padčas hałasavańnia. Čytačka «Našaj Nivy» Luboŭ vyrašyła daviedacca, jak patrapić u družyńniki ci vystupić na takim kancercie.
Čytačka «Našaj Nivy» patelefanavała ŭ administracyju Pieršamajskaha rajona Minska, i voś što joj adkazaŭ kiraŭnik spravami jaje staršyni Alaksiej Vankievič:
«Kab zapisacca u družyńniki, vam treba źviarnucca va ŭpraŭleńnie ideałohii i kultury. Ci piśmovy zvarot zrabić. Tam vam usio raskažuć, prainstruktujuć i zamacujuć za peŭnym učastkam. Patrebnaja budzie charaktarystyka ź miesca pracy. Kali vy nie pracujecie, to charaktarystyka ad žycharoŭ doma. Nakont vašaha pytańnia ab kancercie, pryśviečanym refierendumu, — dakładna skazać nie mahu. Źviartajciesia ŭ toj ža adździeł kultury. Treba budzie ź imi ŭzhadnić vaš repiertuar, vystup».
Namieśnica načalnika ŭpraŭleńnia i zahadčyca siektara kultury Pieršamajskaha rajona Lilija Kavalova dadała:
«Kancerty arhanizoŭvajucca, ale jany zakrytyja. Jany na pradpryjemstvach, u cechach, dla pracaŭnikoŭ. Dla žycharoŭ buduć kancerty tolki z 27 lutaha. U nas zamacavanyja kancertnyja prahramy za kožnaj ustanovaj. Davajcie, vy da nas pryjdziecie i my z vami ŭsio abmiarkujem. Napišycie mnie prosta płan, što vy chočacie vykanać».
Nahadajem, refierendum pa źmienach u Kanstytucyju projdzie 27 lutaha. Daterminovaje hałasavańnie projdzie z 22 pa 26 lutaha ŭklučna. Miž tym, sioleta na kabinkach dla hałasavańnia nie budzie štorak. Ich adsutnaść patłumačyli supraćkavidnymi mierami. Taksama nie zmohuć hałasavać i biełarusy zamiežža: MZS zajaviŭ, što ŭ pasolstvach nie buduć stvarać vybarčyja učastki.
Śviatłana Cichanoŭskaja i demakratyčnyja siły zaklikajuć biełarusaŭ prychodzić na vybarčyja ŭčastki i stavić dva kryžyki ŭ biuleteniach.
Čytajcie jašče:
Biełarus z fejkavaj pošty razasłaŭ u škoły listy z patrabavańniem pravieści abmierkavańnie Kanstytucyi. I atrymaŭ spravazdaču
Jak źviazanaje raźniavoleńnie aficyjnaj kavidnaj statystyki z refierendumam pa Kanstytucyi?
«Respublikanski refierendum — test na vyznačeńnie ŭzroŭniu zaležnaści ad azartnych hulniaŭ» i inšyja kurjozy na sajtach dziaržustanoŭ
Ciapier čytajuć
Hiryn, Bury i navat Knyrovič adreahavali na artykuł pra samuju modnuju paru biełaruskaj apazicyi28
Kamientary