«Я не сдаюсь». Блогер Петрухин рисует Брестскую крепость, Кабанов тренируется с мастером спорта по шахматам
У красавіку берасьцейскія блогеры і актывісты Сяргей Пятрухін і Аляксандар Кабанаў былі асуджаныя на 3 гады зьняволеньня кожны. Што зь імі цяпер і што яны пішуць зь няволі?
Аляксандар Кабанаў — сябра Аб’яднанай грамадзянскай партыі. Старшыня АГП Мікалай Казлоў паведаміў са спасылкай на сваякоў Аляксандра Кабанава, што той цяпер у вязьніцы ў Магілёве.
«Называюць адрас калёніі № 15 у Магілёве, што ён цяпер там. Ці канчатковае гэта месца адбыцьця пакараньня, ня ведаем. Раней былі зьвесткі пра яго, што вывозілі для нейкіх дзеяньняў у Берасьце, але вярнулі ў Магілёў. Пра апэляцыю невядома, але наш адвакат зь ім у кантакце, калі будзе прызначана апэляцыя, праінфармуе», — расказаў Мікалай Казлоў. Яму невядома, дзе цяпер сябра Кабанава — блогер Сяргей Пятрухін.
Пра ліставаньне зь Сяргеем Пятрухіным і Аляксандрам Кабанавым Свабодзе расказала жыхарка Берасьця, якая прасіла не называць яе імя.
«Падабаецца, што яны не разгубіліся, захавалі сілу духа, у іхных лістах шмат гумару і аптымізму. Яны нас заражаюць энэргіяй, раяць, як далей змагацца супраць акумулятарнага заводу, мы да іх прыслухоўваемся», — кажа суразмоўца пра лісты Аляксандра Кабанава і Сяргея Пятрухіна.
«Ні на што ня скардзяцца, прымаюць выпрабаваньні мужна. Пра здароўе таксама пішуць, што нармальнае», — дадае жанчына. Паводле яе, у лістах Сяргея Пятрухіна шмат малюнкаў. Ёй асабліва запомніўся малюнак Берасьцейскай крэпасьці з сымбалічнымі словамі «Я не здаюся». «Гэта і пра яго вельмі трапна сказана», — заўважае жанчына.
Пра Аляксандра Кабанава актывістка згадала, што той сядзеў у камэры разам з майстрам спорту па шахматах, які даваў сукамэрніку ўрокі майстэрства.
«У адным зь лістоў Аляксандар напісаў, што не шкадуе, што гэтак зь ім здарылася, лічыць, што ўся Беларусь праходзіць праз гістарычнае выпрабаваньне. Запомніліся і гэткія ягоныя словы зь ліста: «У краіну ідуць перамены, і яны закрануць кожнага. Шкада, што гэтыя думаюць, нібыта гэтак застанецца назаўсёды. Ня вучаць гісторыю — значыць, гісторыя навучыць іх. А мы дапаможам, усе хады запісаныя (смайлік)», — згадала суразмоўца ліст ад Аляксандра Кабанава.
Паводле жанчыны, апошні ліст ад Аляксандра Кабанава яна атрымала яшчэ ў сакавіку, а вось Сяргей Пятрухін апошні раз напісаў ёй у траўні. Ліст быў адасланы зь вязьніцы ў Магілёве. Жанчына мяркуе, што Сяргей Пятрухін яшчэ там і чакае апэляцыі на прысуд.
«Збольшага ўсё нармальна. Чакаем, пакуль камень пакоціцца. На зону зьбіраюся ў канцы чэрвеня. Апэляцыя яшчэ не прызначаная, мяркуючы па ўсім, будзе ў канцы ці сярэдзіне чэрвеня. Усім прывітаньне. Хутка ўсё скончыцца. Гэта дакладна», — напісаў Сяргей Пятрухін у лісьце ад 13 траўня.
Па 3 гады зьняволеньня і па 750 рублёў грашовага спагнаньня Аляксандру Кабанаву і Сяргею Пятрухіну прысудзіла судзьдзя Кастрычніцкага раённага суду Магілёва Вольга Краўчанка. За пратэст блогераў выдалілі з судовай залі і нават пазбавілі права прамовіць апошняе слова.
Блогераў Youtube-каналу «Народный репортер» Кабанава і Пятрухіна асудзілі за арганізацыю беспарадкаў і зьнявагу прадстаўнікоў улады. Віны яны не прызналі. Беларускія праваабаронцы прызналі Аляксандра Кабанава і Сяргея Пятрухіна палітвязьнямі.
Сейчас читают
Три порции мороженого и переодетая бабушка в лесу — как задерживали убийцу с проспекта Рокоссовского и его родителей3
Комментарии