U Mahilovie sudziać 18-hadovaha chłopca za nadpisy na asfalcie, jakija daŭno zmylisia
U Leninskim rajonnym sudzie Mahilova pačaŭsia sud nad 18-hadovym Siarhiejem Turunavym za «palityčnyja» nadpisy na asfalcie, piša «Radyjo Svaboda». Nadpisy ścierlisia, a kryminalnaja sprava zastałasia.
Spravu razhladaje sudździa Aksana Ratnikava. Chłopca vinavaciać pavodle art. 341 Kryminalnaha kodeksa («Psavańnie majomaści») i sudziać za nadpisy, jakija byli zroblenyja na asfalcie ŭ žniŭni 2020 hoda, a farba daŭno zmyłasia.
Zhodna z materyjałami spravy, 18-hadovy Turunaŭ u noč na 15 žniŭnia z kampanijaj nieviadomych ludziej nanios nadpisy na asfalt u mahiloŭskim mikrarajonie Jubilejny. Abvinavačanaha ź biełaj farbaj i pendźlem zatrymaŭ staršy praparščyk vajskovaj častki №6713 unutranych vojskaŭ MUS Jaŭhien Marčanka. Praparščyk tady jakraz viartaŭsia z pracy.
U Leninskim RAUS na chłopca skłali administracyjny pratakoł pavodle art. 17.3 KaAP za źjaŭleńnie ŭ hramadzkim miescy ŭ stanie alkaholnaha apjanieńnia. Za heta jon atrymaŭ štraf u 5,4 rubla.
Adnak u kancy listapada siłaviki raptoŭna padniali staruju spravu. Prakuratura ŭhledzieła ŭ dziejańniach Turunava złačynstva. U śniežni išło papiaredniaje śledstva, apytvali śviedak.
Chłopiec pryznaŭ svaju vinu i raskajaŭsia. Z abvinavačańniem Turunaŭ zhadziŭsia, ale adznačyŭ, što dziejničaŭ nie ŭ hrupie asobaŭ, a samastojna. Jon vyrašyŭ vykazać niazhodu z vynikami prezidenckich vybaraŭ. Dziela hetaha nočču jon uziaŭ biełuju farbu i pendzal i pajšoŭ pa svaim mikrarajonie, nanosiačy na asfalt nadpisy «3%», «Dzie 80%?» i ličbu 80 u znaku serca.
Praparščyk Marčanka paćvierdziŭ słovy padsudnaha, što toj malavaŭ ličby samastojna. Ale śviedka, jakim u sudzie vystupaje supracoŭnik Leninskaha RAUS Dzianis Bodzin, u svaich pakazańniach zaznačyŭ, što inšyja ludzi paśla zatrymańnia maładoha čałavieka «prosta raźbiehlisia».
Siarhieju Turunavu pahražajuć hramadckija raboty, štraf ci aryšt. Akramia taho, darožna-mastavoje pradpryjemstva zajaviła pazoŭ da jaho ab škodzie amal na 57 rubloŭ.
Jak vyhladaje znutry rezidencyja Łukašenki «Krasnasielskaje»13
Kamientary