Łukašenkaŭskaja Biełaruś naźbirała kamplimientaŭ ad słavackich prarasijskich palitykaŭ
Vice-śpikier parłamienta Słavakii Lubaš Błaha i deputat Andrej Danka sustrelisia ŭ Bracisłavie z pasłom Biełarusi ŭ Aŭstryi i Słavienii, pastajannym pradstaŭnikom Biełarusi pry ABSIE Andrejem Dapkiunasam. Paśla hetaj sustrečy jany pakinuli chvalebnyja vodhuki i vykazalisia za raźvićcio supracoŭnictva z łukašenkaŭskaj Biełaruśsiu i pucinskaj Rasijaj.
Andrej Danka ŭ svaim paście ŭ fejsbuku pa vynikach sustrečy vykazaŭ škadavańnie, što Dapkiunas «pavinien siadzieć u Vienie» (u śniežni 2023 hoda Biełaruś zakryła svaju ambasadu ŭ Słavakii), a taksama pry hetaj nahodzie pieradaŭ pryvitańnie Łukašenku.
Lubaš Błaha napisaŭ u svaim telehram-kanale bolš razhornuty post.
«Mahu paćvierdzić, što heta była vielmi sardečnaja sustreča, na jakoj ja zajaviŭ, što Biełaruś — naš siabar, i my nikoli nie zabudziem achviaru hetaha advažnaha słavianskaha naroda ŭ Druhoj suśvietnaj vajnie. Ja zrablu ŭsio dla dalejšaha raźvićcia našaha supracoŭnictva, mnie zaŭsiody padabałasia jeździć u hetuju cudoŭnuju krainu i liču absurdnymi sankcyi suprać Biełarusi», — napisaŭ vice-śpikier.
Pry nahodzie jon taksama vykazaŭ ciopłyja pačućci da pucinskaj Rasii:
«My chočam miru. I my adkidajem nianaviść da Rasii i Biełarusi. My chočam prysłuchacca da punktu hledžańnia Rasii — inakš kampramis nikoli nie budzie znojdzieny», — napisaŭ vice-śpikier parłamienta Słavakii, majučy na ŭvazie pošuk kampramisu pa pytańniach vajny va Ukrainie.
Andrej Danka — staršynia kansiervatyŭnaj i nacyjanalistyčnaj Słavackaj nacyjanalnaj partyi, a Lubaš Błaha — člen partyi «Kurs — sacyjalnaja demakratyja», jakuju ŭznačalvaje ciapierašni premjer-ministr Słavakii Robiert Fica. Abiedźvie partyi ciapier uvachodziać va ŭradavuju kaalicyju.
Sam słavacki premjer Robiert Fica taksama siońnia ŭskosna vykazaŭsia ŭ intervju słavackamu vydańniu Pravda padtrymku biełaruskaha i rasijskaha režymaŭ, vykazaŭšysia za dopusk ich pradstaŭnikoŭ na Alimpijskija hulni, jakija majuć adbycca hetym letam u Paryžy:
«A što tyčycca Alimpijady. Ujavicie, što ŭ vas jość spartyŭnaja dyscyplina, i ŭ hetaj spartyŭnaj dyscyplinie na pieršych prystupkach staić absalutny suśvietny lidar z Rasii ci Biełarusi. Vy zabaraniajecie im prychodzić na spabornictvy, i pieramahaje chtości, chto ŭ advarotnym vypadku vyjhraŭ by ź minimalnaj vierahodnaściu, jakaja kaštoŭnaść hetaha załatoha miedala?
U svaim žyćci ja b nie pieraškadžaŭ spartsmienam spaborničać, tamu što chaj jany pakažuć, ci jość u ich usio nieabchodnaje dla pieramohi».
U studzieni 2024 hoda źjaviłasia infarmacyja, što Słavakija adnaŭlaje kulturnyja suviazi z łukašenkaŭskaj Biełaruśsiu i pucinskaj Rasijaj, spynienyja papiarednim uradam u sakaviku 2022 hoda paśla taho, jak abodva režymy raźviazali vajnu va Ukrainie.
Kamientary