«Amieryka, ja addaŭ tabie ŭsie siły». Źjezd Dempartyi sustreŭ pramovu Bajdena burnymi avacyjami, i toj puściŭ ślazu
Prezident ZŠA zrabiŭ kranalnuju raźvitalnuju pramovu i byŭ ušanavany burnymi avacyjami na nacyjanalnym źjeździe Demakratyčnaj partyi ŭ Čykaha. Vystupu papiaredničała niečakanaje źjaŭleńnie na scenie Kamały Charys, jakaja padziakavała jamu za toje, što jon byŭ «nievierahodnym» prezidentam, piša Bi-bi-si.
«Džo, dziakuj Vam za vaša histaryčnaje lidarstva, za toje, što vy ŭsio žyćcio słužyli našaj nacyi, i za ŭsio, što vy praciahvajecie rabić, — skazała jana. — My vam viečna ŭdziačnyja».
«Ja lublu vas», — puściŭ ślazu, źviarnuŭšysia da prysutnych, 81-hadovy prezident pad ahłušalnyja apładysmienty.
«My lubim ciabie, Džo» — skandavali siabry partyi, jakaja miesiac tamu prymusiła jaho admovicca ad pretenzij na prezidenckuju naminacyju praź jahony ŭzrost.
«My aboje viedajem, što nam treba budzie jašče šmat zrabić, ale my ruchajemsia ŭ pravilnym kirunku», — skazaŭ Bajden, majučy na ŭvazie siabie i Charys, jakaja za niekalki tydniaŭ zdoleła pieraviarnuć chod prezidenckaj honki.
Pieršaja čarnaskuraja žančyna, jakaja stała vice-prezidentam Amieryki, Kamała Charys udychnuła novaje žyćcio ŭ Demakratyčnuju partyju i abyšła lidara respublikancaŭ Donalda Trampa ŭ apytańniach hramadskaj dumki.
Bajden pryjšoŭ na źjezd ź siamjoj: žonkaj Džył i dačkoj Ešli.
U svajoj pramovie Bajden nie tolki kazaŭ pra svajo miesca ŭ historyi, ale i addaŭ naležnaje svajmu vice-prezidentu — žančynie, jakaja, jak jon spadziajecca, źmienić jaho ŭ Biełym domie.
«Vybar Kamały byŭ samym pieršym rašeńniem, jakoje ja pryniaŭ, staŭšy našym kandydatam [na minułych vybarach], i heta najlepšaje rašeńnie, jakoje ja pryniaŭ za ŭsiu svaju karjeru, — skazaŭ jon. — Jana strohaja, daśviedčanaja i nievierahodna sumlennaja».
Demakraty ŭ Čykaha znachodziacca ŭ pryŭźniatym nastroi, spadziejučysia na pieramohu ŭ listapadzie, što zdavałasia niejmaviernym usiaho niekalki tydniaŭ tamu paśla pravalnych debataŭ Bajdena z Trampam.
Apładysmienty ŭ adras prezidenta možna rasceńvać i jak znak padziaki za jaho rašeńnie vyjści z prezidenckaj honki, i jak daninu pavahi da jaho bahataj palityčnaj karjery, jakaja pačałasia ŭ 1972 hodzie, kali jon upieršyniu byŭ abrany ŭ Kanhres va ŭzroście 29 hadoŭ.
Choć Bajden pryśviaciŭ zakančeńnie svajoj pramovy Kamale Charys, mnohija z vystupoŭcaŭ u hety viečar adrasavali svaje pryvitańni ciapierašniamu haspadaru Biełaha doma.
Chiłary Klintan, źjaviŭšysia na scenie ŭ pačatku viečara, skazała prysutnym, što mister Bajden «viarnuŭ u Bieły dom hodnaść, prystojnaść i kampietentnaść».
U aŭtorak pierad udzielnikami źjezdu vystupić Barak Abama. U sieradu pryjdzie čarha Biła Klintana. Abodva jany — byłyja prezidenty, jakija vyłučali svaju kandydaturu na pieravybrańnie i pieramahli. U Bajdena takoj mahčymaści nie budzie. Jaho pramova na źjeździe, kali ŭ najbližejšyja piać miesiacaŭ nie zdarycca ničoha ekstraardynarnaha, stanie apošnim zvarotam prezidenta da masavaj amierykanskaj teleaŭdytoryi.
Pa paviedamleńniach amierykanskaj presy, Bajden usio jašče adčuvaje rasčaravańnie z-za taho, što jaho vymusili sastupić darohu Charys — jon ličyć, što zmoh by pieramahčy Trampa. Ale jon śćviardžaje, što prymiryŭsia z hetym rašeńniem.
Zaviaršyŭšy pramovu — užo paśla apoŭnačy na ŭschodnim uźbiarežžy ZŠA — prezident pakinuŭ źjezd i nakiravaŭsia ŭ Kaliforniju na adpačynak.
Kamientary