U Meta prablemy. Akcyi kampanii Cukierbierha ŭ čaćvier rekordna ŭpali
3 lutaha akcyi kampanii Meta (były Facebook) abvalilisia na 26%, a jaje rynačny košt upaŭ bolš čym na 230 miljardaŭ dalaraŭ. Heta najvialikšaje padzieńnie ŭ historyi karparacyi.
Vydańnie New York Times pryvodzić šeść pryčyn taho, čamu Meta apynułasia ŭ ciažkaj situacyi.
Novych karystalnikaŭ bolš nie budzie
Raniej kolkaść juzieraŭ Facebook uvieś čas rasła, ale toje — u minułym. Bolš za toje, sacsietka navat hublaje karystalnikaŭ — za čaćviorty kvartał minułaha hoda ich pamienieła prykładna na paŭmiljona. Mahčyma, heta značyć, što Facebook dasiahnuŭ pikavaj dla siabie kolkaści juzieraŭ.
Dziejańni Apple abmiažoŭvajuć kampaniju Cukierbierha
Uviesnu Apple prezientavała abnaŭleńnie svajoj apieracyjonki, jakoje daje mahčymaść karystalnikam dazvalać (ci nie dazvalać) prahramam nakštałt Facebook manitoryć svaju anłajn-aktyŭnaść. Ciapier takija prahramy pavinny asobna prasić u karystalnikaŭ dazvoł na toje, kab sačyć za imi ŭ anłajnie, i nie ŭsie ź ich na heta zdolnyja. Praz heta Facebook atrymlivaje mienš infarmacyi pra juzieraŭ, i heta robić bolš ciažkim stvareńnie tarhietavanaj (adrasnaj) rekłamy, a heta adzin z hałoŭnych šlachoŭ zarobku dla kampanii.
Google zabiraje sabie anłajn-rekłamadaŭcaŭ
Praź dziejańni Apple rekłamadaŭcy atrymlivajuć mienš infarmacyi pra pavodziny karystalnikaŭ, tamu jany sychodziać z Facebook na inšyja płatformy, u asnoŭnym na Google. Tyja nie tak mocna, jak Meta, zaležać ad abmiežavańniaŭ Apple i vykarystoŭvajuć dla svajoj rekłamy našmat bolš infarmacyi ź inšych krynic.
U dadatak, Google maje pahadnieńnie z Apple, zhodna ź jakim Google źjaŭlajecca standartnym pošukavikam u internet-braŭziery Apple. Heta aznačaje, što kantekstnaja rekłama ad Google uźnikaje na staroncy bolš razoŭ i rekłamadaŭcy atrymlivajuć bolš infarmacyi, što mahła b być dla ich karysnaj.
Pieramahčy TikTok pakul nie atrymlivajecca
Mabilnaja prahrama TikTok, kudy hledačy zahružajuć karotkija videa, užo daŭno spaborničaje za karystalnikaŭ z sacsietkaj Instagram (naležyć kampanii Meta). U Instagram vyrašyli zapuścić anałahičny pradukt — Reels, i jon startavaŭ paśpiachova.
Ale ž Reels nie zdolny prynosić Instagram stolki ž hrošaj, jak inšyja atrybuty sacsietki — storys i hałoŭnaja stužka, bo ŭ Reels ludzi čaściej prapuskajuć videarekłamu. Tamu čym bolš kampanija raźličvaje na hety pradukt, tym mienš hrošaj joj prynosić sacsietka.
Prajekt Mietasuśvietu nie akuplajecca
Za apošni hod Cukierbierh vydatkavaŭ bolš za 10 miljardaŭ dalaraŭ na raspracoŭku virtualnaha Mietasuśvietu, a ŭ budučyni płanuje naraścić hetyja inviestycyi. Ale ž pakul niama prykmiet, što jany akupiacca. Virtualnaja realnaść pakul zastajecca nadta vuzkaj nišaj, i pryłady dla jaje jašče nie nabrali papularnaści.
Cukierbierh choča, kab ludzi vieryli ŭ jaho bačańnie Mietasuśvietu. Ale chto viedaje, ci nie padvodzić jaho intuicyja ŭ hetym pytańni, ci nie akažucca miljardy dalaraŭ vykinutymi na viecier.
U Meta prablemy z antymanapolnym zakanadaŭstvam
Kampaniju čakajuć šmatlikija rasśledavańni taho, ci dziejničała jana ŭ antykankurentnaj maniery na rynku sacsietak. Cukierbierh nastojvaje, što Meta — nie manapalist i što ŭ śfiery isnuje biesprecendentnaja kankurencyja, u tym liku z hihantami nakštałt TikTok, Apple i Google.
Ale ž patencyjnyja jurydyčnyja ryzyki ŭskładniajuć dla kampanii kuplu novych aktyvaŭ. Raniej Facebook kupiŭ Instagram i WhatsApp, i dziaržava, i hramadstva pastavilisia da hetaha spakojna, ale ciapier rehulatary krytyčna adsočvajuć navat drobnyja pahłynańni, jakija płanuje Meta.
Aktyvistka Nasta Bazar paprasiła ŭ siabroŭ hrošy na žyćcio. Mierkavańni radykalna padzialilisia38
Kamientary