Dalnabojnik z čata AHSB: Idei byli fantastyčnyja — sabrać 500 bajevikoŭ, zachapić armiejskija składy
Źmicier Masiuta — dalnabojnik i błohier. Jon daŭno źjechaŭ u ZŠA, ale praciahvaje sačyć za biełaruskaj palitykaj. Na chvali pratestaŭ jon taksama ŭstupiŭ u čat AHSB (pa hetaj spravie niadaŭna vynieśli žorstkija prysudy — ad 13 da 20 hod). «Praź niejki čas mianie vydalili, bo ja pačaŭ havaryć, što jany padstaŭlajuć ludziej», — dzielicca jon.
«Pierajezd u ZŠA — ekśpierymient nad samim saboj»
Ja žyvu ŭ ZŠA, pracuju trakdrajvieram — kiroŭcam vialikahruznaj mašyny.
Pierajechaŭ 5 hadoŭ tamu pa hrynkarcie i zusim nie viedaŭ, kim budu. ZŠA — heta byŭ taki ekśpierymient nad samim saboj. Z momantu pierajezdu da adkryćcia kampanii prajšło paŭhoda.
Moj asabisty zarobak — heta dźvie tysiačy dalaraŭ u tydzień, ale ciapier ja atrymaŭ licenziju na inšuju katehoryju kiroŭcy i vučusia kiravać na čužoj mašynie, a paśla nabudu ŭłasny bolšy trak. Kali atrymajecca, budu zarablać kala troch tysiač u tydzień (ź ich kala 30% budzie iści na padatki).
Kab narmalna pačuvacca ŭ ZŠA, treba mieć zarobak kala 45—47 tysiač na hod. U mianie bolej, i voś prykład: niadaŭna ja jeździŭ vučycca ŭ Fłorydu — i tam ja nie braŭ u arendu mašynu, a prosta nabyŭ sabie matacykł, pakataŭsia na im, davučyŭsia, pradaŭ i palacieŭ nazad. To-bok, kali hrošaŭ bolej, to heta daje bolš svabody.
U ZŠA mnie značna kamfortniej, čym u Biełarusi. Nichto nie ciśnie, usio lepš pradumana. Viartajucca adtul zvyčajna tyja, chto nie znajšoŭ siabie ci nie zdoleŭ adaptavacca ŭ hetaj sistemie.
U Amierycy ŭsio zatočanaje pad biznes. Adkryć tut biznes vielmi prosta — ja zrabiŭ heta, nie vychodziačy z mašyny. Pazvaniŭ advakatu i skazaŭ nazvu majoj budučaj kampanii, zapłaciŭ 270 dalaraŭ, abraŭ štat, dzie najbolš spryjalnyja ŭmovy dla majoj spravy, i ŭsio. Praz try dni mnie pazvanili i skazali, što ŭchvalili nazvu, a jašče praź piać dzion ja atrymaŭ siertyfikat, što heta maja kampanija.
Praz składanaść padlikaŭ i vialikuju adkaznaść za parušeńnie finansavaha zakanadaŭstva padatkami dla biznesu zvyčajna zajmajucca buchhałtary. Časta ludzi abirajuć buchhałtara, jaki im pasuje, i karystajucca jaho pasłuhami ŭsio žyćcio.
Hałoŭnaja parada dla tych, chto choča pierajechać u ZŠA, — źviartajciesia da narmalnych ludziej, usio ŭzvažvajcie i tolki paśla rabicie. Pieršyja paŭhoda ja zadavaŭ tysiačy pytańniaŭ i abiraŭ tolki adzin adkaz. Nie varta kidacca adrazu z hałavoj u niešta, što vy pačuli ad pieršaha lepšaha.
«U čacie było prykładna 700—800 čałaviek»
Ja zaŭždy cikaviŭsia hramadskim žyćciom, adzinaje što ja nie vioŭ aktyŭna svaje sacsietki. Na bytavym uzroŭni razmaŭlaŭ ź ludźmi, ale adkryta nie vystupaŭ. Bo razumieŭ, što našy ludzi da maich idej nie hatovyja.
Ja pačaŭ vieści błoh «Amieryka biez prycharošvańniaŭ» pra ZŠA, pracu, chaciełasia raspavieści ŭsio biez kupiuraŭ. A paśla zdaryŭsia 2020 hod, i ja pačaŭ raspaviadać bolš pra roznyja palityčnyja padziei, tłumačyć padpisantam roznyja rečy. Bo ja baču sens nie ŭ niejkaj bajavoj dziejnaści, a ŭ tym, kab ludzi pačali ciamić. Spačatku rabiŭ heta ŭ instahramie, a paśla ŭ jutubie.
Zavajavać niešta niemahčyma, kali ty nie viedaješ, što heta. Voś šmat chto tady kazaŭ, što nam patrebnaja «svaboda», ale kali niezrazumieła, što heta, to i nie jasna, za što zmahacca.
Na chvali pratestaŭ u 2020—2021 hadach ja pačaŭ kamunikavać z roznymi aktarami, u tym liku «radykałami». Ja tady pahladzieŭ na ŭsio hetaje šapkazakidalnictva, i mnie stała strašna za toje, što budzie ź ludźmi, što heta pryniasie bolš škody, čym karyści, sprabavaŭ tłumačyć, što, da prykładu, nie varta abapiracca na telehram.
Ale mnie kazali, što ja «taksičnaja asoba» i zaraz jany ŭsio ŭładziać.
Ja byŭ aktyŭnym karystalnikam čata AHSB. Spačatku jany pisali, a paśla pačali hutaryć hołasam. Ja nie viedaju, adkul uziaŭsia «Dzis» (Dzianis Chromaŭ), ale jany tady ŭžo pracavali z «Eksamonam» (Paŭłam Kułažankam), jakoha pryznačyli adnym z administrataraŭ supołki.
U čacie było prykładna 700—800 čałaviek.
Mianie vydalili, bo ja pačaŭ kazać, što toje, što jany robiać, niezakonna, što jany padstaŭlajuć ludziej.
Ja skazaŭ litaralna nastupnaje: «Suprać vas pracuje dziaržaŭnaja mašyna ź nieabmiežavanymi resursami, jakaja maje bolš za 100-hadovy dośvied zmahańnia ź inšadumstvam, a vy ŭ telehramie chočacie arhanizavać hrupy, i hetyja hrupy buduć pad kantrolem na ŭzroŭni stvareńnia». Jany doŭha nie vytrymali i zabanili mianie.
Kułažanka, Dzis i inšyja źbirali danaty «na baraćbu», byccam im treba ŭzbroić niejkija terarystyčnyja hrupy — nu heta ž łuchta, z-za miažy, nikoli nie pracavaŭšy «ŭ poli», niemahčyma stvaryć sapraŭdy dziejnuju arhanizacyju.
«A tam raptam niama kamier?» — «Nie, usio biaśpiečna»
Usie idei AHSB byli absalutna fantastyčnyja. Kštałtu «500 našych bajavikoŭ vystupiać, a ŭsie ŭbačać, što my bjomsia, i vyjduć na vulicy» ci «my zachopim armiejskija składy, u nas svaja varta budzie».
Karaciej, niejkija naiŭnyja rečy, jakija pry hetym abmiarkoŭvalisia publična, i adzinaje, čaho jany damahalisia — heta reakcyi śpiecsłužbaŭ, a vyniku nijakaha nie było.
Dumaju, usie «radykalnyja» čaty pracujuć pad kantrolem. U kožnym čacie proćma «cicharoŭ».
I čym bolš čat na słychu, tym bolš tam siłavikoŭ. I hetyja siłaviki tam pravakujuć ludziej na niejkija vykazvańni i majuć prava tam pisać što zaŭhodna, bo ichniaja meta vyličyć inšych. I zvyčajna jany pracujuć u kamandzie. «Aktaviju» (Natallu Maćviejevu, jakoj prysudzili 14 hadoŭ kałonii) ja papiaredžvaŭ, što nie varta nikudy chadzić i niešta palić, bo ich usich zatrymajuć.
U ciapierašnich umovach ja nie baču mahčymaści stvarać niejkija bajavyja jačejki, ja pra heta havaryŭ usie dva hady. Ale mianie nichto nie słuchaŭ. I ŭ tym ža čacie AHSB mianie adrazu pačynali chejcić.
Da prykładu, piša niechta: «Davajcie padpalim «Tabakierku», a ty jamu: «A tam raptam niama kamier»? I čałaviek, nie ŭstajučy z kanapy, pačynaje pisać: «Nie, ja tam blizka žyvu, kamier niama, usio biaśpiečna». Voś heta abo supracoŭniki śpiecsłužbaŭ, abo karysnyja idyjoty.
A paśla taho, jak usio zdaryłasia, usio prosta zamiałasia i nichto nie choča brać na siabie adkaznaść. Dzis uvohule schavaŭsia, bo jamu stała strašna, što jany stolki ludziej pasadzili. Niekatoryja ŭ čatach navat klalisia jamu adpomścić.
Prosta, kali b sapraŭdy kłapacilisia pra ludziej, nikoli b nie pasłali ich niešta palić ci rabić inšyja radykalnyja rečy.
Čytajcie taksama:
«Sprava AHSB»: jak KDB arhanizoŭvaŭ «terakty»
«Naša Niva» — bastyjon biełaruščyny
PADTRYMAĆ
Kamientary