Na sustrečy Łukašenki ź biznesmienami nikomu ź ich nie dali skazać ni słova? A centralnaj zadačaj było zapałochać Kim
Pradstaŭniki minskaj biznes-supolnaści ličać, što asnoŭny sens sustrečy Łukašenki ź biznesam byŭ u čarhovym prahavorvańni pahroz, a asnoŭnym adrasatam była ŭłaśnica «Vajłdbieryz», rasijanka Taćciana Kim, jakaja niadaŭna atrymała vialikija lhoty.
Sustreča, jakaja padavałasia jak dyjałoh Łukašenki z pradstaŭnikami kamiercyi, padobna, nijakim dyjałoham nie źjaŭlałasia.
«Naša Niva» nie zmahła adšukać na BiełTA ci ŭ «Pule pieršaha» nivodnaj cytaty kahości z zaprošanych na mierapryjemstva biznesmienaŭ. Vyhladaje, što havaryli vyklučna Alaksandr Łukašenka i pieršy vice-premjer Mikałaj Snapkoŭ, a biznesmieny tolki słuchali biez mahčymaści vystupić.
Snapkoŭ navat ad imia biznesu — choć źjaŭlajecca pry hetym čynoŭnikam — zajaviŭ pra ahulnaje adabreńnie taho, što staršyni rajvykankamaŭ ciapier buduć uzhadniać kiraŭnikoŭ pryvatnych kampanij.
U manałohu Łukašenki, jaki pryvodzicca na aficyjnych resursach, vyłučajecca tradycyjny nabor pahroz i źniavah u bok prysutnych. Voś asnoŭnyja:
— «My kantralujem [biznes], dy jašče jak. Nu tak i vas budziem kantralavać, kali vy heta zasłuhoŭvajecie»;
— «Vy nie śviatyja i my na vas, jak na abrazY, malicca nie źbirajemsia»;
— «Kali jany (biznesmieny — NN) niešta niedzie zrabili nie tak… Nie prosta parušyli, a rastaptali zakon, nu dyk u nas šmat svabodnych miescaŭ [u turmie] — ja pra heta ščyra kažu»;
— «U nas tut niama niedziaržaŭnych pradpryjemstvaŭ»;
— «Luboje pradpryjemstva musić pracavać na Biełaruś, na dziaržavu. Tady ŭ mianie nijakich nie budzie da vas pretenzij»
— «Nichto ŭ vas biznes nie adbiare, nichto vas nachilać nie budzie, dzialić niešta nie budzie. Heta ja vam harantuju. Ale dziaržaŭny intares pierš za ŭsio»;
— «Pahladzim jašče na pytańni vašaj raboty ŭ płanie vyvadu valuty za miažu, a to ŭ nas niekatoryja, asabliva zamiežnyja kampaniii… Ludzi tut karačacca, a kiraŭniki vyvodziać za miažu. […] Kali vy chavajecie za miažoj hrošy, zaroblenyja tut, to majo staŭleńnie da vas jakoje pavinna być?» i hetak dalej.
Čaściej za Łukašenku i Snapkova pakazvali tolki Taćcianu Kim.
Adzin sa staražyłaŭ minskaha deviełapmienta, jakoha «Naša Niva» paprasiła patłumačyć, što jon zrazumieŭ z manałohu Łukašenki, adkazaŭ, što paśla abmierkavańnia detalaŭ z kalehami jany razam spynilisia na dumcy, što ŭsio mierapryjemstva było arhanizavana tolki dla taho, kab papałochać samuju bahatuju žančynu Rasii, Taćcianu Kim. Jana ŭlezła ŭ vialiki biznes-prajekt u Biełarusi, «ale moža nie addavać jašče sabie spravazdačy, što tut nie robicca čysty biźnies, i na kožny rubiel ilhoty spros na dva».
Ułaśnica «Vajłdbieryz» zapuściła prajekt pa budaŭnictvie vialikaha łahistyčnaha chaba ŭ industryjalnym parku Vialiki Kamień.
Anansavany abjom inviestycyj blizki da $120 miljonaŭ, na 27 hiektarach ziamli pad Minskam vyraście raźmierkavalny centr na 140 tysiač kvadratnych mietraŭ. Umovy, na jakich Kim atrymała ziamlu, pakul nieviadomyja i źjaŭlajucca pradmietam śpiekulacyj u staličnych biznes-kołach.
Pa hetym prajekcie «Vajłdbieryz» budzie całkam vyzvaleny ad padatku na prybytak ciaham 10 hod z momantu źjaŭleńnia prybytkaŭ, a paśla hetaha pieryjadu i da 2026 hoda budzie płacić tolki pałovu ad standartnaj staŭki. Da 2026 hoda taksama nie budzie vypłačvacca padatak na nieruchomaść i ziamielny padatak. Pieršyja piać hod taksama nie budzie padatku na dyvidendy. PDV na tavary, vyrablenyja na terytoryi JEAES, vypłačvać taksama budzie nie treba. Možna budzie ekanomić i na zarobkach piersanału, tamu što ŭ Vialikim Kamieni padachodny padatak na supracoŭnikaŭ mienšy, jon składaje 9%.
«Ja tak razumieju, što čytać natacyi i jašče raz prahavorvać praviły hulni tolki adnoj Kim było b niepryhoža, bo jana ŭsio ž nie miascovaja.
Tamu sklikali niejkuju salanku «błatnych i žabrakoŭ», dzie bolšaść nie źjaŭlajecca ni vialikimi pracadaŭcami, ni finansavymi varaciłami. A kali hetych ludziej što i abjaŭdnoŭvaje, dyk toje, što jany jašče nie siadzieli.
I im začytali natacyi i ahulnuju infarmacyju pra toje, jak u nas dobra žyviecca — Snapkoŭ paćvierdzić. My heta ŭsio čujem užo 30 hadoŭ i novaha nie prahučała litaralna ničoha. Tamu my schilajemsia da dumki, što śpiektakl staviŭsia tolki dla adnoj rasijanki.
Zbor hety, darečy, płanavaŭsia jašče da vybaraŭ, i pra heta ŭsie viedali, navat kankretnuju datu.
Zaprošanyja nasilisia pa horadzie i kazali, što ich zaprasili da Łukašenki: «A što jamu treba kazać? A dajcie parady».
Ale ŭ Kim nie atrymlivałasia da vybaraŭ — pieranieśli. Praviali tolki tady, kali ŭ jaje atrymlivałasia.
I toje, što z usich hubiernataraŭ krainy tam byŭ tolki hubiernatar Minščyny (jak byccam by ŭ inšych abłaściach niama kamiercyi), taksama paćviardžaje naša mierkavańnie. Heta tak usie i zrazumieli. Papałochali jaje, nu i zaadno inšych», — dadaŭ jašče adzin staličny pradprymalnik z bahataj biznes-bijahrafijaj.
***
Taćciana Kim (Bakalčuk) — zasnavalnica anłajn-rytejlera «Vajłdbieryz». Samaja bahataja žančyna Rasii z kapitałam $7,4 miljarda. Ź niadaŭniaha času aktyŭna inviestuje ŭ Biełarusi.
Kamientary