Siryjskija siły biaśpieki abvinavačvajucca ŭ zabojstvie sotniaŭ mirnych žycharoŭ. Kolkaść achviar raście

Siryjski centr manitorynhu pravoŭ čałavieka (SOHR), jaki bazujecca ŭ Vialikabrytanii, zajaviŭ, što kala 745 mirnych žycharoŭ byli zabityja padčas prykładna 30 napadaŭ na ałavitaŭ u piatnicu i subotu, paviedamlaje Bi-bi-si. Ahienctva ŭdakładniaje, što jamu nie ŭdałosia pravieści niezaležnuju pravierku hetych zajaŭ.

Ałavity, pradstaŭniki relihijnaha kirunku, jaki ličycca adhalinavańniem šyickaha isłamu, składajuć kala 10% nasielnictva Siryi. Bolšaść žycharoŭ Siryi — musulmanie-sunity.

U čaćvier sama mieniej 13 supracoŭnikaŭ sił biaśpieki Siryi byli zabityja ŭ sutyknieńniach z uzbrojenymi ludźmi, źviazanymi sa zrynutym režymam Bašara Asada, paviedamlaŭ telekanał Syria TV, jaki źviazany z novymi ŭładami Siryi.

Sutyknieńni pačalisia ŭ rehijonie Džabła ŭ navakollach Łatakii, u prybiarežnaj zonie, jakaja ličycca sercam ałavickaj supolnaści, da jakoj naležyć siamja Asada.

Pa śćviardžeńni SOHR, za apošnija dva dni było zabita bolš za tysiaču čałaviek, što stała samaj masavaj i žorstkaj prajavaj hvałtu ŭ Siryi z taho času, jak paŭstancy zrynuli režym Asada ŭ śniežni 2024 hoda.

U hety lik uvachodziać dziasiatki bajcoŭ novych uradavych vojskaŭ i ŭzbrojenyja ludzi, łajalnyja Asadu, jakija z čaćviarha ŭdzielničajuć u bajavych dziejańniach u prybiarežnych pravincyjach Łatakija i Tartus.

Pavodle spravazdačy SOHR, u vyniku chvali hvałtu zahinuli kala 125 čalcoŭ uradavych sił biaśpieki, jakija ŭznačalvajucca isłamistami, i 148 proasadaŭskich bajcoŭ.

Napiaredadni paviedamlałasia ab 340 zahinuŭšych ad ruk sił biaśpieki mirnych žycharoŭ Siryi.

Ministerstva abarony Siryi zajaviła ahienctvu SANA, što ŭrad adnaviŭ kantrol paśla «padstupnych napadaŭ» na supracoŭnikaŭ słužby biaśpieki.

Hvałt pryvioŭ ałavickuju supołku ŭ «stan žachu», raspavioŭ Bi-bi-si adzin z aktyvistaŭ. Jak paviedamlajecca, sotni ludziej pakinuli paciarpiełyja ad uspyški hvałtu rajony.

Pa dadzienych ahienctva Reuters, natoŭpy ludziej šukali prytułku na rasijskaj vajskovaj bazie Chmiejmim u pravincyi Łatakija. Ab hetym ža pišuć rasijskija ŚMI. Na apublikavanych videa bačna, jak dziasiatki ludziej skandujuć «Ludzi chočuć rasijskaj abarony» za pierymietram bazy. Akramia taho, pavodle źviestak miascovych ŚMI, dziasiatki siemjaŭ biehli ŭ susiedni Livan.

Śpiecyjalny pasłańnik AAN pa Siryi Hiejr Piedersan zajaviŭ, što jon «hłyboka zaniepakojeny» «vielmi tryvožnymi paviedamleńniami ab achviarach siarod cyvilnaha nasielnictva» ŭ prybiarežnych rajonach Siryi. Jon zaklikaŭ usie baki ŭstrymacca ad dziejańniaŭ, jakija mohuć «destabilizavać» krainu i pastavić pad pahrozu «nadziejny i inkluziŭny palityčny pierachod».

Časova vykonvajučy abaviazki prezidenta Siryi Achmied aš-Šaraa zajaviŭ, što apošnija padziei znachodziacca ŭ ramkach «čakanych prablem», sa spasyłkaj na arabskija ŚMI paviedamlaje Reuters. Jon zaklikaŭ siryjcaŭ da nacyjanalnaha adzinstva ŭ videaroliku, jaki ŭ liku inšych pakazvaŭ telekanał Al-Arabiya. Aš-Šara vystupaŭ u miačeci.

Rami Abdułrachman, kiraŭnik SOHR, ličyć, što zabojstvy ŭ Džabli, Banijasie i prylehłych rajonach na nasielenym pieravažna ałavitami ŭźbiarežža Siryi stali samym žorstkim usploskam hvałtu za mnohija hady ŭ 13-hadovaj hramadzianskaj vajnie ŭ krainie. Abdułrachman, jak piša Reuters, śćviardžaje, što siarod achviar jość žančyny i dzieci z ałavickaj mienšaści.

Novyja ŭłady pryznali parušeńni padčas apieracyi suprać tych, kaho jany nazvali «reštkami apałčencaŭ Asada». Jany abvinavacili ŭ hvałcie niearhanizavanyja hrupy hramadzianskich asob i bajcoŭ, jakija nibyta sprabavali akazać padtrymku aficyjnym siłam biaśpieki ŭ chaosie bajavych dziejańniaŭ.

Krynica ŭ ministerstvie abarony Siryi ŭ subotu paviedamiła dziaržaŭnym ŚMI, što ŭsie darohi, jakija viaduć da ŭźbiarežža, byli pierakryty, kab spynić hvałt i dapamahčy adnavić spakoj, a siły biaśpieki razhornutyja na vulicach prybiarežnych haradoŭ.

Mierkavany maštab hvałtu, jaki ŭklučaje paviedamleńni ab zabojstvie dziasiatkaŭ mužčyn-ałavitaŭ u adnoj vioscy, stavić pad sumnieńnie zdolnaść isłamisckaj ułady kiravać Siryjaj inkluziŭnym čynam, kamientuje Reuters.

Siryjski siehmient fejsbuka ŭ subotu byŭ zapoŭnieny fatahrafijami i niekrałohami ludziej z prybiarežnaj zony, jakich apłakvali siemji i siabry, raskazvajučy, što hetyja ludzi byli zabityja.

Bašar Asad byŭ skinuty ŭ śniežni minułaha hoda.

• 0
• 0
• 2
• 5
• 3
• 5
• 3
• 0