Łojka: Kałaŭr moh spračacca i advakatavać takija rečy, pra jakija nichto inšy zaiknucca nie moh
U analityčnym vypusku TOKu ekanamičnaja ahladalnica Volha Łojka raskazała, čym byŭ admietny na pasadzie staršyni Nacbanka Pavieł Kałaŭr.
«Heta adychod čałavieka [takoha] kalibra, jakich užo nie zastałosia ŭ biełaruskaj viertykali. Heta čałaviek, jaki moh spračacca i advakatavać takija rečy, pra jakija nichto inšy zaiknucca nie moh», -
razvažaje ekanamičnaja ahladalnica Volha Łojka pra adstaŭku Paŭła Kałaŭra z pasady staršyni Nacbanka.
Pa jaje słovach, Kałaŭr mieŭ vydatnuju kamandu mocnych śpiecyjalistaŭ. Pry hetym u vypadkach, kali treba było adstojvać pytańni manietarnaj palityki, jakija ŭ peŭnaj stupieni supiarečać metam i zadačam urada, mienavita jon sam hetym zajmaŭsia.
«Tamu što zadača ŭrada — raści luboj canoj, a zadača Nacbanka — zabiaśpiečvać stabilnaść, u pieršuju čarhu inflacyjnuju», — zaŭvažaje Łojka i nahadvaje, što ŭ chutkim časie paśla svajho pryznačeńnia ŭ 2014 hodzie na pasadu staršyni praŭleńnia Nacbanka, Kałaŭr zdoleŭ stabilizavać biełaruski rubiel.
Łojka zhadvaje:
«Ja pamiataju Kałaŭra ŭ toj momant, kali ŭsio pajšło nie tudy. Heta kali Biełaruś pavinna była padpisać z Mižnarodnym valutnym fondam list i nadalej prahramu reformaŭ pačynać. Usio było ŭzhodniena. Heta, chiba, 2016-ty hod byŭ.
I Łukašenka ŭ apošniuju chvilinu admoviŭsia padpisvać. Zdavałasia, što heta kaniec reformaŭ i ničoha nie budzie ŭvohule.
I ja pytałasia tady ŭ Kałaŭra: «A płan «B» — što budziem rabić, kali my idziom absalutna inšym šlacham?» Jon skazaŭ: «U mianie jość tolki płan «A», i ja budu pracavać pa płanie «A». Kali treba pracavać pa płanie «B», to heta budu nie ja. Nu prosta tamu, što jość rečy, jakija treba rabić pravilna. A kali vy chočacie ich rabić niapravilna, to ja vam dla hetaha sapraŭdy nie patrebny».
Pryhadała ekanamičnaja ahladalnica i supraćstajańnie Kałaŭra z uradam u 2018 hodzie:
«Jany publična pačali cisnuć na Nacbank — «hrošy, stanok uklučaj, ekanomicy mała hrošaj». Ja kažu: «Pavieł Uładzimiravič, a što budzie, kali ŭsio ž vas pałamaje administracyja, urad, i dadrukavać treba budzie?» Jon padniaŭ adnu bryvo i spytaŭ: «Nas?» I takim niepieradavalnym tonam: «Nas nie pałamajuć».
Hladzicie całkam:
Ciapier čytajuć
Muž hałoŭnaj hieraini prapahandysckaha filma BT skončyŭ žyćcio samahubstvam10
Kamientary