Лойка: Калаўр мог спрачацца і адвакатаваць такія рэчы, пра якія ніхто іншы заікнуцца не мог
У аналітычным выпуску ТОКу эканамічная аглядальніца Вольга Лойка расказала, чым быў адметны на пасадзе старшыні Нацбанка Павел Калаўр.
«Гэта адыход чалавека [такога] калібра, якіх ужо не засталося ў беларускай вертыкалі. Гэта чалавек, які мог спрачацца і адвакатаваць такія рэчы, пра якія ніхто іншы заікнуцца не мог», -
разважае эканамічная аглядальніца Вольга Лойка пра адстаўку Паўла Калаўра з пасады старшыні Нацбанка.
Па яе словах, Калаўр меў выдатную каманду моцных спецыялістаў. Пры гэтым у выпадках, калі трэба было адстойваць пытанні манетарнай палітыкі, якія ў пэўнай ступені супярэчаць мэтам і задачам урада, менавіта ён сам гэтым займаўся.
«Таму што задача ўрада — расці любой цаной, а задача Нацбанка — забяспечваць стабільнасць, у першую чаргу інфляцыйную», — заўважае Лойка і нагадвае, што ў хуткім часе пасля свайго прызначэння ў 2014 годзе на пасаду старшыні праўлення Нацбанка, Калаўр здолеў стабілізаваць беларускі рубель.
Лойка згадвае:
«Я памятаю Калаўра ў той момант, калі ўсё пайшло не туды. Гэта калі Беларусь павінна была падпісаць з Міжнародным валютным фондам ліст і надалей праграму рэформаў пачынаць. Усё было ўзгоднена. Гэта, хіба, 2016-ты год быў.
І Лукашэнка ў апошнюю хвіліну адмовіўся падпісваць. Здавалася, што гэта канец рэформаў і нічога не будзе ўвогуле.
І я пыталася тады ў Калаўра: «А план «Б» — што будзем рабіць, калі мы ідзём абсалютна іншым шляхам?» Ён сказаў: «У мяне ёсць толькі план «А», і я буду працаваць па плане «А». Калі трэба працаваць па плане «Б», то гэта буду не я. Ну проста таму, што ёсць рэчы, якія трэба рабіць правільна. А калі вы хочаце іх рабіць няправільна, то я вам для гэтага сапраўды не патрэбны».
Прыгадала эканамічная аглядальніца і супрацьстаянне Калаўра з урадам у 2018 годзе:
«Яны публічна пачалі ціснуць на Нацбанк — «грошы, станок уключай, эканоміцы мала грошай». Я кажу: «Павел Уладзіміравіч, а што будзе, калі ўсё ж вас паламае адміністрацыя, урад, і дадрукаваць трэба будзе?» Ён падняў адну брыво і спытаў: «Нас?» І такім неперадавальным тонам: «Нас не паламаюць».
Глядзіце цалкам:
Каментары