Štodnia za achovu Pucina adkazvaje sotnia čałaviek, navat ježu jamu hatujuć kuchary-feesbešniki — jany ž praviarajuć usie pradukty, navat rybu, jakuju łović rasijski prezident.
Centr «Daśje» pravioŭ rasśledavańnie taho, jak abaraniajuć Pucina.
Słužba biaśpieki prezidenta Rasii jość faktyčna samastojnym padraździaleńniem i adkazvaje jak za achovu pieršaj asoby, tak i za abaronu jaho šmatlikich rezidencyj, pryhatavańnie ježy, pryborku pamiaškańniaŭ i navat stryžku hazona ŭ Nova-Aharova.
Chto achoŭvaje
Rasśledavalniki zmahli identyfikavać 33 ciełaachoŭnikaŭ prezidenta Rasii, jakija jaho supravadžali na praciahu 2024 hoda, i sabrać pra ich infarmacyju z dastupnych krynic.
U vyniku atrymaŭsia abahulnieny partret ciełaachoŭnika Pucina: siaredni ŭzrost — 36 hadoŭ, koratka stryžany, vysokaha rostu, biez vusoŭ i barady. Tatuiroŭki i pirsinh stroha zabaronieny.
Pieravažnaja bolšaść — vychadcy z rehijonaŭ ci ź nievialikich haradoŭ u jeŭrapiejskaj častcy Rasii. Mnohija pryjšli na słužbu, skončyŭšy Akademiju FSA (Fiederalnaj słužby achovy) u Arle, ale jość i vychadcy ź inšych struktur, naprykład, śpiecnaza.
Budučyja ciełaachoŭniki prachodziać tyja ž stadyi adboru, što i astatnija supracoŭniki FSA. Akramia niekalkich sumoŭjaŭ abaviazkovyja test na prafiesijnuju prydatnaść, sustreča ź psichołaham i prachodžańnie palihrafa. Adna z hałoŭnych umovaŭ pry pryjomie na pracu — patryjatyčny nastroj.
Aficyjnaja zarpłata pucinskaj achovy nie kazačnaja. Pavodle ŭciečak z baz danych, ciapier jany atrymlivajuć u rajonie 200 tysiač rubloŭ (kala 2300 dalaraŭ) — jak kantraktniki na froncie. Adnak i heta ŭ dva razy bolš za siaredni zarobak supracoŭnika FSA.
Kolki ŭsiaho achovy
Pa padlikach «Daśje», Pucin maje jak minimum piać adjutantaŭ. Kali jany znachodziacca pobač ź im, to atrymlivajuć słužbovy mabilny telefon.
Zrazumieć, kolki čałaviek adnačasova achoŭvajuć prezidenta Rasii, rasśledavalnikam dapamahli materyjały budaŭnictva rezidencyi ŭ Nova-Aharova. U siaredzinie 2010-ch hadoŭ tam byli pabudavany dom pryjomaŭ, haścinica i niekalki techničnych abjektaŭ.
U haścinicy mierkavałasia raźmiaścić pakoi dla adjutantaŭ, supracoŭnikaŭ vyjaznych padraździaleńniaŭ, daktaroŭ. Usiaho budynak pavinien byŭ źmiaścić 116 čałaviek achovy, u tym liku 5 bajcoŭ śpiecnaza. Haraž byŭ raźličany na 32 kiroŭcaŭ.
Hrupa supravadžeńnia Pucina ŭ zamiežnych pajezdkach składaje ad 80 da 100 čałaviek. Pry hetym jaje ŭdzielniki raździalajucca na dźvie častki. Adny padarožničajuć niepasredna ź pieršaj asobaj, inšyja prybyvajuć na miesca zahadzia, kab padrychtavacca da sustrečy, vyśvietlić pratakolny składnik (što i jak budzie naviedvać, z kim sustrakacca, što rabić, jak prylataje i adlataje, što patrabujecca dla hetaha).
Pa žadańni Pucina Fiederalnaja słužba achovy zabiaśpiečyć luby vid transpartu. Aŭtamabili znachodziacca ŭ padparadkavańni haraža asobaha pryznačeńnia.
U niekatorych vypadkach kartež supravadžajuć bajavyja viertaloty, jak heta było padčas vizitu Pucina ŭ Čačniu letaś u žniŭni. Bronieciahnikom taksama zajmajecca śpiecsłužba, pryčym nie tolki pytańniami biaśpieki, ale i dyzajnam vahonaŭ. Samalot pieršaj asoby pry nieabchodnaści prykryvaje bajavaja avijacyja, a na jaho borcie prykładna ŭ kancy 2021 hoda byli ŭstanoŭleny ciepłavyja pastki.
Na ziamli ad pahroz z pavietra kiraŭnika dziaržavy achoŭvajuć kompleksy «Pancyr-S1». Narešcie, supracoŭniki FSA absłuhoŭvajuć jachty Pucina.
Kuchary Pucina
Navat kuchary Pucina — heta supracoŭniki FSA, jakich, jak i ŭsich, vučać stralać.
Kuchary pracujuć u palčatkach, niekalki razoŭ u dzień mianiajuć formu i praviarajuć, kab na rukach nie było parezaŭ. Stroha vykonvajecca tavarnaje susiedstva: ryba, miasa, sadavina i harodnina zachoŭvajucca asobna. Pradukty staranna padbirajucca.
Pucin addaje pieravahu vyłaŭlenaj rybie i miasu, jakoje zdabyta na palavańni. Z ptuški jon jeść tolki kuraniat, vyraščanych na nievialikich fiermach. Usie pradukty prachodzić strohuju pravierku supracoŭnikami pierasoŭnaj łabaratoryi, ekspres-testami, navat kali heta ryba, jakuju złaviŭ sam rasijski prezident.
Kuchary supravadžajuć Pucina ŭ pajezdkach niezaležna ad taho, ci heta kamandziroŭka, ci adpačynak, ci indyvidualnaje mierapryjemstva. Supracoŭniki FSA pieršymi kaštujuć usie pryhatavanyja stravy.
Strohija patrabavańni pradjaŭlajucca nie tolki da ježy, ale i da pamiaškańnia. U rezidencyjach Pucin addaje pieravahu vyznačanamu tempieraturnamu režymu i «kab nidzie nie dźmuła». Rabočy kabiniet prybirajuć kožny dzień z vykarystańniem śpiecyjalnych srodkaŭ, pryčym rabić heta pačali jašče da pandemii, a pamiaškańni pravietryvajuć va ŭsie dni, akramia pieryjadu ćvicieńnia alešyny i biarozy.
Były supracoŭnik FSA raskazaŭ «Daśje», što Pucin daviaraje tolki svaim ciełaachoŭnikam, a astatnich supracoŭnikaŭ śpiecsłužby časta trymajuć u nieviadomaści adnosna jaho płanaŭ. Ludziam mohuć skazać, što jon adpačyvaje na peŭnym leciščy, i ŭsie biehajuć, achoŭvajuć hetaje lecišča, a jon moža być uvohule ŭ inšym miescy.
Ciapier čytajuć
«Mnie soramna, ale ja navat nie pamiataju». Stali viadomyja novyja padrabiaznaści z pracesu zdymak emihrantaŭ dla kino na BT12
Kamientary