Bolšaja častka dapamohi ad ZŠA pastupić va Ukrainu tolki letam

28 krasavika Ukraina atrymała pieršuju partyju zbroi ad ZŠA z zaćvierdžanaha niadaŭna pakieta dapamohi. Heta procitankavyja rakiety, rakietnyja snarady i 155-milimietrovyja artyleryjskija snarady. 

Druhaja partyja hetaj zbroi i bojeprypasaŭ prybyła 29 krasavika. A 30 krasavika ŭ Polšču prybyła novaja partyja rakiet-pierachopnikaŭ Patriot ź Ispanii. Sa słoŭ vysokapastaŭlenaha ispanskaha čynoŭnika, chutka jany buduć na ŭkrainskim froncie.

Za apošni tydzień na składy NATO ŭ Jeŭropie prybyła mnostva samalotaŭ, ciahnikoŭ i hruzavikoŭ z bojeprypasami i sistemami ŭzbrajeńnia mienšaha pamieru dla adpraŭki Ukrainie.

Ale, pa słovach aficyjnych asob, na pastaŭku zbroi, abiacanaj Złučanymi Štatami, Vialikabrytanijaj i Hiermanijaj, jakija za apošnija try tydni abviaścili ab novaj bujnoj vajennaj padtrymcy, mohuć syści miesiacy, pierš čym jana pastupić u kolkaści, dastatkovaj dla ŭmacavańnia abaranazdolnaści Ukrainy na poli boju.

Heta stavić pad sumnieŭ zdolnaść Ukrainy strymlivać rasijskija ataki, praź jakija Kijeŭ užo niekalki miesiacaŭ znachodzicca ŭ niavyhadnym stanoviščy, piša vydańnie.

Sa słoŭ vysokapastaŭlenaha amierykanskaha čynoŭnika, Rasija praciahnie damahacca niaznačnych pośpiechaŭ na ŭschodzie i paŭdniovym uschodzie Ukrainy napiaredadni 9 maja, Dnia Pieramohi. Adnak ukrainskija vajskoŭcy nie pacierpiać poŭnaha krachu na linii frontu, niahledziačy na vostry niedachop bojeprypasaŭ.

Tym nie mienš, analityki va ŭradzie ZŠA i za jaho miežami kažuć, što, imavierna, u lepšym vypadku nastupić leta, a ŭ horšym — kaniec hoda, pierš čym Ukraina zmoža stabilizavać svaje pazicyi na linii frontu dziakujučy novamu ŭlivańniu dapamohi.

Adzin amierykanski čynoŭnik adznačyŭ, što spatrebicca čas, kab vyrašyć, jakija pradmiety možna było b pieradać Ukrainie, nie vysilvajučy padraździaleńni NATO, jakija pavinny być bajazdolnymi, naprykład, tyja, jakija vykarystoŭvajuć bajavyja mašyny piachoty Bradley i bronietransparciory Humvee, jakija byli častkaj amierykanskaha pakieta.

Inšyja vidy ŭzbrajeńnia, takija jak 155-milimietrovyja artyleryjskija snarady, u jakich adčajna maje patrebu Ukraina, znachodziacca ŭ deficycie va ŭsim śviecie.

Čakajecca, što novaja sistema Patriot pastupić va Ukrainu nie raniej za kaniec červienia. Jaje pastaŭka moža supaści z pastaŭkaj inšaj bujnoj sistemy ŭzbrajeńnia, u jakoj Ukraina daŭno maje patrebu: źniščalnikaŭ F-16. Choć Ukraina zapytvała vajskovyja samaloty amal z samaha pačatku vajny ŭ lutym 2022 hoda, čakajecca, što jany buduć pastaŭlenyja tolki hetym letam — i spačatku ŭ nievialikaj kolkaści.

• 0
• 0
• 1
• 2
• 2
• 1
• 9
• 0