Zasoŭvańnie ŭ śmietniki palitykaŭ i akcyja «Ruskija iduć damoŭ». Čym viadomy Dziamjan Hanuł, jakoha siońnia zabili ŭ Adesie?
Siońnia stała viadoma pra zabojstva ŭ Adesie viadomaha aktyvista i vałanciora, 31-hadovaha Dziamjana Hanuła. Čym jon viadomy, piša Bi-bi-si.
Imia Hanuła viadomaje z 2013—2014 hadoŭ, kali jon u składzie «Pravaha siektara» byŭ udzielnikam Revalucyi Hodnaści, a ŭ Adesie ŭznačalvaŭ siłavy błok miascovaj jačejki pravaradykalnaj partyi.
Hanuł taksama byŭ udzielnikam supraćstajańnia 2 maja 2014 hoda na Kulikovym poli, dzie ŭ Domie prafsajuzaŭ u vyniku sutyknieńniaŭ pamiž prarasijskimi i praŭkrainskimi aktyvistami zahinuli 47 čałaviek.
Napiaredadni, 13 sakavika, stała viadoma, što Jeŭrapiejski sud pa pravach čałavieka pryznaŭ, što ŭłady Ukrainy dapuścili peŭnyja parušeńni i pavinny vypłacić kampiensacyi siemjam zahinułych i paciarpiełym u hetych sutyknieńniach. JESPČ adznačyŭ, što hetyja padziei ŭ značnaj stupieni byli vyklikany rasijskaj prapahandaj.
Paśla tych trahičnych padziej Hanuł byŭ udzielnikam mnohich haradskich akcyj pratestu. Jon stvaryŭ hramadskuju arhanizacyju «Vuličny front» i razam z adnadumcami vystupaŭ suprać niezakonnych budoŭlaŭ. Časta akcyi pratestu zakančvalisia sutyknieńniami.
U 2017 hodzie Hanuł byŭ fihurantam kryminalnaj spravy. U toj čas deputat parłamienta, a ciapier kamandzir 3-j asobnaj šturmavoj bryhady Andrej Bilecki prapanoŭvaŭ uziać aktyvista na paručalnictva. Pa hetaj spravie paciarpiełym byŭ tahačasny kiraŭnik palicyi Adeskaj vobłaści Dźmitryj Hałavin.
Siarod akcyj Hanuła taksama była «Śmiećcievaja lustracyja» ŭ 2014 hodzie, kali palitykaŭ sadžali ŭ śmiećcievyja kantejniery.
Heta adbyłosia ŭ Adesie ź viadomym palitykam Niestaram Šufryčam i tahačasnym kiraŭnikom Fondu sacyjalnaha strachavańnia Aleham Rudenkam.
Hanuł nieadnarazova ŭdzielničaŭ u akcyjach pierad kansulatam Rasii ŭ Adesie. U listapadzie 2021 hoda razam z adnadumcami jon prynios tudy trunu z nadpisami «Hruz 200» i «Ruskija iduć damoŭ».
U pačatku 2022 hoda, kali ŭ Adesie pavinien byŭ adbycca kancert rasijskaha repiera Basty — Hanuł damohsia jaho admieny.
Jon taksama byŭ inicyjataram demantažu miemaryjalnych došak i pomnikaŭ kamunistyčnym dziejačam.
Jak raspaviała raniej žurnalistka Ukrainskaj słužby Bi-bi-si, jakaja razmaŭlała z zahinułym, Hanuł vyhladaŭ čałaviekam, nadzvyčaj abaznanym u historyi horada. Jon vystupaŭ za zachavańnie histaryčnych pomnikaŭ, ale zaklikaŭ adroźnivać, jak jon kazaŭ, «ruskija markiery» — pomniki, jakija Rasija ŭstanaŭlivała ŭ Adesie dla farmiravańnia vobrazu «ruskaha horada».
Zahinuły aktyvist taksama pravodziŭ akcyi ŭ abaronu žyvioł. U pryvatnaści, jon arhanizoŭvaŭ u Adesie pratesty suprać ekspłuatacyi žyvioł u cyrku.
Hanuła nieadnarazova zapałochvali. U 2020 hodzie nieviadomyja raźbili bitami i spalili jaho aŭtamabil.
U mai 2023 hoda ŭ Adesie nieviadomyja ŭ vajskovaj formie źbili jaho. Palicyja zaviała kryminalnuju spravu, adnak jana nie dajšła da suda.
Kamientary