Ci prajhrali ludzi, jakija pajšli za Babarykam? Adkazvaje Kraŭcoŭ
«Byŭ raspaŭsiudžany mif, što kali vyjdzie 2% nasielnictva na vulicu, to režym zrazu ŭpadzie. 2% zabiaśpiečyli. Režym nie ŭpaŭ. Prynamsi, dastavierna pravierana hipoteza, što heta tak nie pracuje».
U efiry «Jeŭraradyjo» ŭ Ivana Kraŭcova spytali, ci ličyć jon stratehiju 2020-ha hoda pamyłkovaj, a ludziej, jakija pajšli za Babarykam, prajhrancami. Na heta pytańnie były siabra štaba Viktara Babaryki adkazaŭ:
«Padychod jakraz akazaŭsia pravilnym. Byŭ raspaŭsiudžany mif, što kali vyjdzie 2% nasielnictva na vulicu, to režym adrazu ŭpadzie. 2% zabiaśpiečyli. Režym nie ŭpaŭ. Prynamsi, dastavierna pravierana hipoteza, što heta tak nie pracuje. I ŭsie tyja, chto zajmalisia hetym ža ŭ 2006-m, u 2010 hodzie, u ich jość mahčymaść pahladzieć na svaje vočy, jak heta pracuje nasamreč».
Adnak Kraŭcoŭ upeŭnieny ŭ tym, što ŭ 2020-m hodzie šaniec na pieramieny byŭ:
«Nichto nikoli nie moža, na žal, harantavać vynik. Ja dumaju, šaniec byŭ, ja dumaju, u pieršyja tydni žniŭnia sapraŭdy byŭ šaniec, što niechta ź dziejnych biełaruskich uładnych elitaŭ ci siłavikoŭ moža prajavić siabie i skarystacca situacyjaj. Ale hetaha nie atrymałasia».
«Kali pytańnie pra toje, atrymałasia ci nie, to tak, nie atrymałasia, na žal. (…) Kali pytańnie pra toje, ci była stratehija, to tak, jana była. Była stratehija masavaj mabilizacyi i, skažam tak, elitarnaha tranzitu. Skazać, što ludziam chłusili, ja prosta nie vielmi razumieju, pra što čałaviek pytajecca».
«Nie stracić pryvatnaha siektara»
Na pytańnie adnosna taho, jakuju stratehiju jon bačyć najlepšaj u sučasnych umovach, kali źmianiłasia źniešniaja palityka ZŠA, mianiajecca situacyja i palityka ŭ Jeŭropie, raspačalisia pracesy, nakiravanyja na spynieńnie vajny va Ukrainie, Kraŭcoŭ adznačyŭ, što asnoŭnaja taktyčnaja zadača — «viarnucca ŭ krainu i pačać tam znoŭ niejkim čynam prysutničać i pracavać». Druhaja zadača — adkryć krainu ŭ pieršuju čarhu dla biznesu.
Važnaść hetaha Kraŭcoŭ abhruntoŭvaje tym, što, na jaho pohlad, nastupny šaniec tranzitu ŭłady ŭ Biełarusi budzie pieradusim źviazany z tymi hrupami ŭpłyvu, jakija buduć znachodzicca ŭ Biełarusi.
«Ja nie vieru, što z-za miažy niechta zmoža mocna paŭpłyvać na heta. I nam vielmi važna, kab aporaj hetaha tranzitu byŭ chutčej biznes i pryvatny siektar, jaki va ŭmovach, jak by tak skazać, adsutnaści realnaj palityki, samy, napeŭna, prademakratyčny, pramadernizacyjna nastrojeny kłas elit», — davodzić babarykaniec.
Zrazumieła, zaŭvažaje Kraŭcoŭ, što pradstaŭniki biznesu nie źjaŭlajucca «aktyvistami ŭ čystym vyhladzie», ale kali vybirać pamiž imi, namiekłaturaj, i siłavikami, to «vybar adnaznačna na karyść biznesu».
Palityk adznačaje, što i ŭ 2020 hodzie mienavita pryvatny siektar adyhraŭ istotnuju rolu: «i Babaryka byŭ z pryvatnaha siektara, i my, usia jaho kamanda, jakaja rabiła potym i kampaniju dla trya žančyn — heta ŭsie byli ludzi z pryvatnaha siektara». Tamu važna nie tolki nie zhubić, ale i ŭmacoŭvać biełaruski biznes u lubych formach, kab u vypadku situacyi tranzitu jon moh adyhrać svaju rolu:
«Pažadana, kab my hetaha pryvatnaha siektara nie stracili. A dla hetaha treba kłapacicca tym, jak jon isnuje ŭ krainie. A ty viedaješ, jak jon isnuje ŭ krainie, kali ŭ ciabie SWIFT adklučany, kali ty nie možaš pajechać, nichto nie choča ź Biełaruśsiu pracavać».
Chto vinavaty
Jak zaŭvažaje Kraŭcoŭ, prostaha adkazu na pytańnie, chto vinavaty ŭ situacyi ź biełaruskim biznesam, nie isnuje. Na jahony pohlad, «adkaznaść na ŭsich bakach»:
«Pa-pieršaje, biezumoŭna, toje, što kamanda Cichanoŭskaj paśla adjezdu ź Biełarusi prykładała vialikija namahańni dla taho, kab damahčysia izalacyi krainy, heta krychu ŭsio ž paŭpłyvała. (…)
Nakont Zachadu, u čym vina? Heta adsutnaść doŭhaterminovaj stratehii pa Biełarusi, tamu što Zachad vielmi marudna ŭvodziŭ sankcyi. Kali byli pratesty, sankcyi byli minimalnymi.
Sankcyi pačalisia tolki ŭ 2021 hodzie, istotnyja. I toj efiekt, jaki musiŭ być, efiekt niečakanaści, efiekt cisku, nu, jaho nie atrymałasia. (…)
Łukašenka. Biezumoŭna, toje, što zdaryłasia ŭ 2020 hodzie, z hetaj situacyi možna było vyjści značna bolš hodna. Možna było pasłuchać ludziej, možna było chacia b prysłuchacca da prablemy.
Bo ludzi vychodzili ŭ 2020 hodzie nie za toje, kab całkam źmianić dziaržavu. Jany faktyčna vychodzili za madernizacyju. Im chaciełasia toje samaje — žyć dobra, nu, tolki źmianić niejak karcinku. Viedaješ, kab na televizary niejkija inšyja byli vyjavy. Ja liču, z hetaha treba było skarystacca».
Kamientary
Nijakaj arhanizacyi pratestu, zabastovak. Zvalili pieršyja, sieli zadnicaj na ciopłyja hranty.
Nie prajhrali, kažaš? Nu vy, hadziny, dakładna nie prajhrali. Ale ŭsiamu svoj čas.
Chorošo, nakoniec, priznaliś, čto i nie sobiraliś pobieždať, i čto-to, riealno, mieniať.