Astranaŭty Butč Uiłmar i Suni Uiljams viarnulisia na Ziamlu paśla dzieviaci vymušanych miesiacaŭ u kosmasie
Paśla dzieviaci miesiacaŭ u kosmasie astranaŭty NASA Butč Uiłmar i Suni Uiljams viarnulisia dadomu. Jany pavinny byli pravieści na Mižnarodnaj kaśmičnaj stancyi vosiem dzion, ale ich misiju daviałosia padoŭžyć z-za techničnych prablem z karablom Starliner kampanii Boeing, piša Bi-bi-si.
Uiłmar i Uiljams viarnulisia na Ziamlu ŭ kapsule SpaceX Crew Dragon razam z astranaŭtam NASA Nikam Chejham i rasijskim kasmanaŭtam Alaksandram Harbunovym.
Jany adstykavalisia ad MKS u 5:05 pa Hrynvičy (8:05 pa Minsku) u aŭtorak i pryvadnilisia kala ŭźbiarežža Fłarydy viečaram taho ž dnia.
«Spusk byŭ uražlivy, — skazała pradstaŭnica NASA Džejden Dženinhs. — U nas byli aptymalnyja ŭmovy dla pryvadnieńnia».
Šlach ad MKS da pavierchni Ziamli zaniaŭ 17 hadzin.
Spačatku kapsuła Crew Dragon uvajšła ŭ atmaśfieru Ziamli, vytrymlivajučy tempieraturu da 1600°C.
Tyja, chto znachodziŭsia na borcie, adčuvali značnyja pierahruzki, prykładna ŭ čatyry razy bolšyja za siłu ziamnoha pryciahnieńnia.
Aparatu ŭdałosia miakka pryvadnicca z dapamohaj čatyroch bujnych parašutaŭ.
Saha Suni i Butča pačałasia ŭ červieni 2024 hoda.
Astranaŭty ŭdzielničali ŭ pieršym vyprabavańni kaśmičnaha karabla Starliner, raspracavanaha Boeing.
Padčas palotu da kaśmičnaj stancyi kapsuła sutyknułasia z šeraham techničnych prablem, tamu viartańnie astranaŭtaŭ dadomu paličyli zanadta ryzykoŭnym.
U pačatku vieraśnia minułaha hoda Starliner viarnuŭsia na Ziamlu biez ekipaža.
Heta aznačała, što dla viartańnia Butča i Suni patrebny byŭ novy karabiel.
Tamu NASA abrała nastupny pa hrafiku palot: kapsułu SpaceX, jakaja prybyła na MKS u kancy vieraśnia.
Na kapsule Crew Dragon na stancyju prylacieli dva astranaŭty zamiest čatyroch, pakinuŭšy dva svabodnyja miescy dla Butča i Suni.
Prablema była ŭ tym, što palot SpaceX byŭ zapłanavany na šeść miesiacaŭ, tamu termin znachodžańnia astranaŭtaŭ na MKS byŭ padoŭžany da sakavika 2025 hoda.
Prybyćcio ziamnoha ekipaža ŭ niadzielu ŭ ramkach misii Crew-10 stała apošnim krokam, nieabchodnym dla viartańnia Butča i Suni.
Paśla karotkaj pieradačy spraŭ novaj kamandzie ich misija padyšła da kanca.
Kamientary