ЗША наносяць авіяўдары па паўстанцах-хусітах у Емене пасля загаду Трампа
ЗША пачалі «рашучую і магутную» хвалю авіяўдараў па паўстанцах-хусітах у Емене, заявіў прэзідэнт Дональд Трамп, растлумачыўшы сваё рашэнне нападамі ўзброенай групоўкі на судны ў Чырвоным моры — адным з найважнейшых сусветных маршрутаў для транспарціроўкі нафты і паліва, піша ВВС.
«Сёння я загадаў УС ЗША прыступіць да рашучых і магутных дзеянняў супраць еменскіх тэрарыстаў: хусітаў», — напісаў Трамп у сваёй сацсетцы Truth Social, растлумачыўшы, што гэта адказ на тое, што хусіты не спыняюць абстрэлы амерыканскіх і іншых караблёў, самалётаў і беспілотнікаў.
«Паведамляю тэрарыстам-хусітам: ваш час скончыўся. Вы павінны спыніць атакі сёння ж. У адваротным выпадку вас чакаюць такія пякельныя мукі, якіх вы яшчэ не адчувалі», — дадаў прэзідэнт ЗША.
«Нашы адважныя ваенныя прама цяпер наносяць паветраныя ўдары па базах тэрарыстаў, іх лідарам і супрацьракетнай абароне, каб абараніць амерыканскія марскія, паветраныя і ваенна-марскія актывы і аднавіць свабоду суднаходства», — напісаў Трамп.
У сваёй заяве хусіты абвінавацілі ЗША і Вялікабрытанію ў «злоснай» агрэсіі супраць жыхароў Саны. Аднак вядома, што Лондан не мае дачынення да суботніх удараў па Емене.
Падкантрольнае хусітам Міністэрства аховы здароўя паведаміла, што ў выніку ўдараў загінулі сама меней 19 чалавек і 11 атрымалі раненні.
Хусіты — гэта паўстанчая групоўка, якая падтрымліваецца Іранам і лічыць Ізраіль сваім ворагам. Яна кантралюе сталіцу Емена Сану і паўночны захад краіны, але не з'яўляецца міжнародна прызнаным урадам краіны.
Трамп заклікаў Іран спыніць падтрымку хусітаў, папярэдзіўшы, што Вашынгтон прыцягне Тэгеран «да поўнай адказнасці».
Пасля пачатку вайны ў сектары Газа паўстанцы-хусіты ў Емене, якія карыстаюцца падтрымкай Ірана, заявілі аб сваёй салідарнасці з ХАМАС.
Яны пачалі абстрэльваць ракетамі і беспілотнікамі судны, якія праходзяць па вузкім Баб-эль-Мандэбскім праліве, шырыня якога складае каля 30 км.
Па дадзеных Кангрэса ЗША, у перыяд з лістапада 2023 года па кастрычнік 2024 года хусіты здзейснілі 190 нападаў у Чырвоным моры.
Хусіты сцвярджаюць, што страляюць па судах, якія ідуць у Ізраіль, аднак далёка не ўсе з абстраляных судоў накіроўваліся туды.
З цягам часу хусіты сталі ўсё больш актыўна абстрэльваць судны, яны таксама запускалі ракеты і беспілотнікі ў бок Ізраіля.
З-за нападаў хусітаў амаль усе суднаходныя кампаніі прыпынілі рэйсы праз Чырвонае мора, накіроўваючы свае судны ў абыход.
Чырвонае мора лічыцца адным з найважнейшых у свеце маршрутаў па перавозцы нафты, звадкаванага газу і іншых тавараў.
Групоўка заявіла арабскім СМІ, што працягне свае атакі, і авіяўдары не аслабяць іх падтрымку палестынцаў.
«Гэтая агрэсія не застанецца без адказу, і нашы еменскія ўзброеныя сілы гатовыя адказаць на эскалацыю далейшай эскалацыяй», — заявілі прадстаўнікі групоўкі.
Як выглядае знутры рэзідэнцыя Лукашэнкі «Краснасельскае»13
Каментары