«Prakuror skazaŭ, što mnie treba pakinuć Biełaruś». Byłaja palitźniavolenaja Alena Maŭšuk raskazała pra ŭmovy svajho vyzvaleńnia
Žycharka Pinska Alena Maŭšuk — adna z troch palityčnych źniavolenych, adpuščanych režymam Łukašenki 12 lutaha. Vydańnie «Lusterka» pahavaryła ź joj i daviedałasia, što ŭmovaj jaje pamiłavańnia i vyzvaleńnia byŭ adjezd ź Biełarusi. Darohu da miažy žančyna nie bačyła, tamu što kanvairy nadzieli na jaje tvar masku.
«Uładzimiraŭna, vaša pamiłavańnie razhladałasia»
— Kali vy daviedalisia, što vas vyzvalajuć?
— Usio heta było spantanna. Ja pracavała na fabrycy, viarnułasia paśla pieršaj źmieny, i my ŭsie pajšli na viačeru. Da mianie padyšoŭ kantralor i skazaŭ: «Maŭšuk, pojdziem z nami». My pryjšli ŭ atrad, mnie skazali vynieści ŭsio — usie svaje rečy.
Dziažurny pamočnik načalnika kałonii pavioŭ mianie ŭ štab. Tam byŭ prakuror, jaki skazaŭ: «Uładzimiraŭna, vaša pamiłavańnie razhladałasia». Ja vielmi źniervavałasia, tamu što nie zrazumieła: ci to jano razhladałasia, ci to jašče tolki budzie razhladacca.
Paśla prakuror skazaŭ, što jano ŭžo razhledžana, ale z umovaj, što mnie treba pakinuć Biełaruś. Jon spytaŭ, ci byli ŭ mianie takija namiery. Ja adkazała, što ŭžo prahavaryła toje, što nie chaču žyć u Biełarusi. Voś i ŭsio. Ja na voli.
— Adjezd ź Biełarusi byŭ umovaj vašaha vyzvaleńnia? Tak vam skazali?
— Tak. Heta ŭsio było vielmi chutka.
— Kali vy napisali prašeńnie ab pamiłavańni i jak heta adbyłosia?
— Mianie nichto nie prymušaŭ heta zrabić. Ja vyrašyła sama pasprabavać. Napisała prašeńnie ŭ lipieni 2024 hoda. Nie była ŭpeŭnienaja, što ŭ mianie jość šaniec, ale padumała, što moža atrymacca.
«Pakul mianie vieźli da miažy, ja ničoha nie bačyła»
— Hetuju noč vy praviali jašče ŭ kałonii ci vas kudyści vyvieźli?
— Adrazu paśla viačery mianie z rečami zabrali. Ja krychu pačakała, pryjechała mašyna, i mianie pavieźli ŭ Minsk. Unačy ja znachodziłasia ŭ SIZA KDB. Nie viedaju, kolki ja tam času praviała. Potym mianie zabrali.
— Vas vieźli ŭ słužbovaj mašynie siłavikoŭ?
— Pakul mianie vieźli da miažy, ja ničoha nie bačyła. Kali ja vyjšła z pamiaškańnia, na mianie nadzieli masku, i tamu ja ničoha nie bačyła.
— Da miažy vas supravadžali kanvairy?
— Tak. Užo potym, kali my pryjechali na miažu, nas sustreli ludzi, i ź mianie źniali masku, viarnuli pašpart.
«Časam supracoŭniki prasili inšych asudžanych niešta mnie padkinuć»
— Vy znachodzilisia ŭ papraŭčaj kałonii № 24 u Zareččy. Apišycie miascovyja ŭmovy.
— Ciapier tam idzie ramont. Ale zimoj było vielmi choładna, aciapleńnie pracavała drenna. Pa ježy — nu, niadrenna kormiać. Adrazu było drenna, ale apošnija dva hady pačali dobra karmić.
— Jakim było staŭleńnie nahladčykaŭ da vas?
— Da mianie było vielmi praduziataje staŭleńnie. Ja nie vyłaziła z ŠIZA, kudy mianie ŭvieś čas sadžali. Časam supracoŭniki prasili inšych asudžanych niešta mnie padkinuć. Za heta mianie adpraŭlali ŭ štrafny izalatar. Taksama pa inšych drobiaziach.
— Vas źbivali supracoŭniki kałonii?
— Nie, mianie nie bili. Ale vielmi ciažka było ź miedycynskaj častkaj. Niemahčyma było damahčysia atrymańnia niejkich lekaŭ abo ŭkołaŭ.
U mianie pahoršyŭsia słych, ja prasiła vyvieźci mianie ŭ haradskuju balnicu, kab zrabić zdymak, ale hetaha tak i nie zrabili. Sa zrokam taksama źjavilisia prablemy, ale mianie praz heta taksama nie vyvieźli. Jašče na mitynhu ja atrymała traŭmu nahi, jana turbuje mianie voś užo piaty hod, i ja nie viedaju, što ź joj. Takoje voś było abychodžańnie.
48-hadovaja Alena Maŭšuk znachodziłasia za kratami z 10 žniŭnia 2020 hoda. Maci troch dziaŭčynak była zatrymanaja ŭ Pinsku ŭ paślavybarčuju noč padčas akcyi pratestu. Prysudžanaja da 6 hadoŭ pazbaŭleńnia voli, pazbaŭlenaja taksama baćkoŭskich pravoŭ. Pavodle źviestak pravaabaroncaŭ, skardziłasia na hvałt u kałonii. Jaje muž prysudžany da 6,5 hoda pazbaŭleńnia voli.
Kamientary