«Alternatyva dla Hiermanii», jakaja vystupaje suprać mihrantaŭ, pieramahaje va Uschodniaj Hiermanii, dzie i tak amal niama mihrantaŭ
Tut partyja atrymała kala 30% hałasoŭ, apiaredziŭšy ŭsie astatnija. Uschodnija niemcy vinavaciać u svaich biedach mihrantaŭ, na jakich trymajecca ekanamičny dabrabyt Zachodniaj Hiermanii.
Lidarka ultrapravaj «Alternatyvy dla Hiermanii» Alisa Vajdel nazyvaje vynik svajoj partyi na daterminovych vybarach u Bundestah histaryčnym.
Pavodle źviestak ekzitpołaŭ «Alternatyva dla Hiermanii» (AfD) zaniała druhoje miesca siarod partyj, atrymaŭšy ad 19,5% da 20% hałasoŭ.
«My dabilisia histaryčnaha vyniku. My nikoli nie byli macniejšymi na fiederalnym uzroŭni», — zajaviła Vajdel, choć hety vynik i mienšy za toj, na jaki raźličvała partyja.
Lidarka partyi paćvierdziła svaju hatoŭnaść da supracoŭnictva z błokam CHDS/CHSS, ale paabiacała, što praz čatyry hady jaje partyja abhonić chryścijanskich demakrataŭ, bo CHDS, na jaje dumku, padmanvaje svaich vybarščykaŭ, śpisvajučy ich z rachunkaŭ i pravodziačy vyklučna levuju palityku.
Najbolš mocnuju padtrymku «Alternatyva dla Hiermanii» atrymała znoŭ va Uschodniaj Hiermanii, dzie apiaredziła ŭsie astatnija partyi, nabraŭšy, pa prahnozach telekanała ARD, kala 30% hałasoŭ vybarščykaŭ.
Pra toje, čamu ŭschodnija niemcy hałasujuć inakš, čym astatniaja Hiermanija, my pisali raniej u asobnym artykule.
Ściana ŭ hałavie. Čamu ŭschodnija niemcy hałasujuć inakš?
«Alternatyva dla Hiermanii» prytrymlivajecca nacyjanalistyčnych, jeŭraskieptyčnych pohladaŭ i vystupaje za ŭzmacnieńnie žorstkaści mihracyjnaj palityki Hiermanii, kab abaranić «niamieckuju kulturu», ale napraŭdzie heta zvyčajnaja śpiekulacyja na ŭjaŭnym strachu małazabiaśpiečanych ludziej stracić svaju pracu na karyść tannych pracaŭnikoŭ.
Praz heta da jaje taksama prymykajuć raznastajnyja nieanacysckija, rasisckija, isłamafobnyja i ksienafobnyja ruchi.
Svajho pośpiechu partyja dasiahnuła na chvali mihracyjnaha kryzisu, jaki zachłynuŭ Jeŭrapiejski sajuz z vosieni 2015 hoda, kali ŭ razy ŭzrasła płyń biežancaŭ i nielehalnych mihrantaŭ z Paŭnočnaj Afryki, Blizkaha Uschodu i Paŭdniovaj Azii.
Byłyja kamunistyčnyja krainy akazalisia bolš uraźlivymi da ksienafobskaj radykalizacyi, bo na praciahu dziesiacihodździaŭ nie mieli takoha ž kantaktu z pradstaŭnikami inšych krain i kultur, jaki mieli žychary krain Zachadu. Uschodniaja Hiermanija nie stała vyklučeńniem.
U časy paślavajennaha adnaŭleńnia ekanomiki Zachodniaja Hiermanija adčuvała vostry deficyt pracoŭnaj siły, straciŭšy na vajnie značnuju častku pracazdolnaha mužčynskaha nasielnictva. Situacyja abvastryłasia z pačatku 1960-ch hadoŭ, kali HDR zakryła miažu, spyniŭšy prytok imihrantaŭ, jaki dazvalaŭ častkova zakryvać patreby Zachodniaj Hiermanii.
Zamiest niemcaŭ Hiermanija pačała najmać hastarbajtaraŭ z Turcyi, dzie byŭ mocny ekanamičny kryzis. U nastupnyja dziesiacihodździ byłyja hastarbajtary pieraciahnuli ŭ Hiermaniju svaje siemji, naturalizavalisia i atrymali niamieckaje hramadzianstva. Na momant abjadnańnia Hiermanii tut žyło niekalki miljonaŭ čałaviek tureckaha pachodžańnia.
Va Uschodniaj Hiermanii masavaha pryciahnieńnia hastarbajtaraŭ paśla vajny nie było. Hamahiennaje niamieckaje hramadstva, kali sutyknułasia z realijami nacyjanalnaj raznastajnaści ŭ Zachodniaj Hiermanii, akazałasia nadzvyčaj ksienafobnym.
Na heta taksama nakłalisia prablemy pierabudovy ekanomiki i vialikaha biespracoŭja — zamiežniki ŭsprymalisia vyklučna jak tyja, chto adbiraje pracu ŭ karennych. Prytok mihrantaŭ u čas mihracyjnaha kryzisu tolki ŭzmacniŭ hetyja pierakanańni.
Zachodnim niemcam, jakija paŭstahodździa pražyli z tymi ž turkami ŭ adnoj krainie, ksienafobija akazałasia mienš ułaścivaja. Da taho ž mnohija byłyja mihranty atrymali prava hołasu i taksama mahli ŭpłyvać na vyniki vybaraŭ.
Ciapier čytajuć
Biełaruska narakaje, što siem hadoŭ nie moža znajści pastajannuju pracu. A ŭ emihracyi stała jašče składaniej16
Kamientary