Rełakanty ŭ Litvie zapłaciać dvojčy? Raźbirajemsia, jak žyć biez pahadnieńnia ab padatkach

U pačatku 2025 hoda Litva denansavała pahadnieńnie ź Biełaruśsiu ab paźbiahańni padvojnaha padatkaabkładańnia (PPP), padpisanaje jašče ŭ 1995 hodzie. Heta nie aznačaje imhniennaha razryvu, dakumient dziejničaje da kanca 2025 hoda. A što potym?

Jak adabjecca hety razryŭ na biełarusach, što žyvuć u Litvie i atrymlivajuć dachod u Biełarusi, naprykład, ad zdačy kvatery? A kali čałaviek zastajecca rezidentam Biełarusi, ale pry hetym zarabiŭ hrošy ŭ Litvie? Raźbirajemsia razam z ekśpiertam u halinie jurydyčnaha i padatkovaha kansultavańnia Śviatłanaj Babincavaj.

Hety materyjał maje hipatetyčny i ahulny charaktar, jaho nielha ŭsprymać jak rekamiendacyju i/ci spasyłacca na jaho pry zvarocie ŭ padatkovyja orhany. Pa-pieršaje, nie ŭsio zrazumieła z zakanadaŭstvam. Pa-druhoje, kožnaja padatkovaja situacyja patrabuje indyvidualnaha razhladu.

Jak tolki pahadnieńnie pierastanie dziejničać, adrazu nadydzie padvojnaje padatkaabkładańnie? Biełarusy ŭ Litvie buduć pavinny płacić padatki dvojčy — u Litvie i Biełarusi?

Nie. Admiena PPP nie aznačaje aŭtamatyčnaje padvojnaje padatkaabkładańnie.

Jano mahčymaje, ale nie abaviazkovaje: naprykład, padatkovaja moža pahadzicca zaličyć padatak, spłačany ŭ inšaj krainie.

Chm. Tady jak heta pracuje?

Navat kali PPP pamiž krainami niama, heta nie značyć, što jany nie imknucca paźbiahać padvojnaha padatkaabkładańnia hramadzian. Ale z PPP pracedura značna praściejšaja. Padatkapłacielščyk pradstaŭlaje dakumienty (naprykład, daviedku ab padatkach, utrymanych u krainie krynicy dachodu), i jamu bieź lišniaj biurakratyi zaličvajuć hety padatak.

Kali PPP niama, kožnaja kraina kirujecca nacyjanalnym zakanadaŭstvam. U Padatkovym kodeksie Biełarusi jość artykuł ab zaliku zamiežnych padatkaŭ (art. 224. Śpiecyjalnyja pałažeńni. Paźbiahańnie padvojnaha padatkaabkładańnia). Padobnyja normy jość i ŭ litoŭskim padatkovym zakanadaŭstvie (art. 37 Zakona ab padachodnym padatku).

U hetym vypadku zalik padatku, spłačanaha za miažoj, taksama mahčymy, ale nie harantavany: pracedura składaniejšaja i patrabuje indyvidualnaha razhladu.

Kraina rezidenctva moža vyłučać bolš žorstkija patrabavańni da dakumientaŭ (naprykład, Litva moža patrabavać pierakładać ich na litoŭskuju movu) abo ŭvohule admović u zaliku. Kali staŭka padatku ŭ krainie krynicy dachodu vyšejšaja, čym u krainie rezidenctva, roźnicu nie viernuć.

Naprykład, rezident Biełarusi zapłaciŭ u Litvie padatak pa staŭcy 20%. U Biełarusi staŭka — 13%. Biełaruś zaličyć tolki 13% ad dachodu, a astatnija 7% stanuć vašaj strataj.

Kali staŭka padatku, spłačanaha za miažoj, nižejšaja, čym u krainie rezidenctva, roźnicu pryjdziecca dapłačvać.

Niezaležna ad taho, abkładuć padatkam dvojčy ci nie, kłopataŭ z dekłaracyjami i daviedkami stanie bolš.

Pačakajcie, ale ž heta nie va ŭsich vypadkach? «Padpadajuć» tolki tyja, u kaho rezidenctva ŭ adnoj krainie, a dachod/iaho častka — u inšaj, praŭda?

Viadoma. Kali i rezidenctva, i dachody čałavieka ŭ adnoj krainie (niavažna, u Biełarusi ci ŭ Litvie), dla jaho ničoha nie źmienicca. Naprykład, kali biełarus nie źjaŭlajecca padatkovym rezidentam RB (žyŭ u Biełarusi mienš za 183 dni ŭ hodzie), jamu nie treba dekłaravać litoŭskija dachody ŭ Biełarusi. Abaviazacielstvy pierad biełaruskaj padatkovaj uźnikajuć tolki ŭ vypadku, kali čałaviek pa vynikach hoda pryznajecca rezidentam Biełarusi. I, viadoma, kali jon atrymaŭ niejki dachod u Biełarusi.

Nahadajcie, jakija žyćciovyja situacyi vyklikajuć prablemy z padatkovaj

Heta ŭsie vypadki, kali vy atrymlivajecie dachod, jaki abkładajecca padachodnym padatkam, u krainie, jakaja nie źjaŭlajecca vašaj krainaj rezidenctva. Naprykład, biełarus žyvie ŭ Litvie, źjaŭlajecca jaje rezidentam, ale ŭ Biełarusi zdaje kvateru. Abo ŭ jaho depazit u Biełarusi, abo niejkaja padpracoŭka, abo vyjhryš u łatareju, abo jon atrymaŭ dyvidendy ci hrašovy padarunak nie ad blizkich svajakoŭ.

Biełarus moža pajechać pracavać u Litvu, ale pa vynikach padatkovaha hoda zastacca rezidentam Biełarusi. U takim vypadku pad pahrozaj padvojnaha padatkaabkładańnia apyniecca jaho litoŭskaja zarpłata.

Okiej, davajcie raźbiarom vypadak z arendaj kvatery ŭ Biełarusi — jak było i jak stanie

Kali padatkovy rezident Litvy zdaje kvateru ŭ Biełarusi, jon pavinien dekłaravać hety dachod u Litvie (niavažna, dziejničaje PPP ci ŭžo nie).

Pa PPP dachod ad arendy nieruchomaści moža abkładacca padatkam u krainie, dzie znachodzicca heta nieruchomaść (to bok u Biełarusi), i jon aŭtamatyčna zaličvajecca ŭ inšaj krainie (u Litvie).

Kali PPP nie pracuje, paraŭnoŭvajem padatki ŭ Biełarusi i Litvie i źviartajemsia ŭ Litvu z prośbaj zaličyć užo spłačanaje. Kali nie zaličvaje — dachod abkładajecca dvojčy. Biada.

A ŭ Biełarusi ž staŭki za doŭhaterminovuju arendu nie ŭ pracentach, a ŭ fiksavanych sumach. Naprykład, u Minsku — 50 BYN za pakoj u miesiac, u abłasnych centrach — 46 BYN i h. d.

Tak. Ale heta nie prablema. U Litvie daviadziecca dapłacić roźnicu: 15% (litoŭskaja staŭka) ad atrymanaha dachodu minus spłačany padatak u Biełarusi.

A kali hramadzianin RB, rezident Litvy, pradaje kvateru ŭ Biełarusi? U Biełarusi jon, dziakujučy lhotam, ničoha nie płacić (naprykład, heta pieršaja kvatera za piać hadoŭ), a ŭ Litvie?

Za prodaž kvatery ŭ Biełarusi ŭ 2025 hodzie, chutčej za ŭsio, pryjdziecca zapłacić padatak u Litvie (kali ŭ Biełarusi dziejničaje lhota i padatak nie spłačvajecca).

Kali ŭ Biełarusi zapłačany padatak (13%), možna pasprabavać jaho zaličyć. U vypadku pośpiechu ŭ Litvie pryjdziecca dapłacić tolki 2% (roźnicu ź litoŭskaj staŭkaj).

Ale nie fakt, što spłačany padatak u Biełarusi Litva zaličyć.

Davajcie jašče raźbiarem prykład z depazitam u Biełarusi

Banki ŭ RB samastojna ŭtrymlivajuć padatak z naličanych pracentaŭ i pieraličvajuć jaho ŭ biudžet, tamu ŭ Biełarusi ničoha rabić nie treba. U Litvie litoŭskamu rezidentu daviadziecca zadekłaravać hetyja hrošy. Kali atrymajecca zrabić zalik, zastaniecca dapłacić 2% (roźnicu pamiž staŭkami 13% i 15%).

Ale tut mohuć być niuansy? Naprykład, termin depazitu: kali ŭkład u BYN lažyć bolš za hod, a ŭ valucie — bolš za dva hady, padachodny padatak nie spahaniajecca.

Tak, niuansaŭ šmat. Tamu ŭsie žyćciovyja situacyi pradkazać składana. Z padatkami treba raźbiracca indyvidualna.

Ale ahulny ałharytm možna prapanavać?

Ahulny paradak dziejańniaŭ taki:

1. Vyznačyć svajo rezidenctva: dzie vy źjaŭlajeciesia padatkovym rezidentam.
2. Praanalizavać padatki ŭ abiedźviuch krainach.
3. Sabrać dakumienty, što paćviardžajuć spłatu padatkaŭ.
4. Prakansultavacca z padatkovymi orhanami.

Okiej, zrazumieła. A jak z terminami? Adkazvać pa novych praviłach, biez uliku PPP, treba budzie ŭžo viasnoj 2026 hoda ci tolki pa vynikach 2026 hoda?

Pakul niezrazumieła. Pavodle pracedury, denansacyja ŭstupaje ŭ siłu z 1 studzienia 2026 hoda. Heta značyć, dachody, atrymanyja da kanca 2025 hoda, padpadajuć pad umovy PPP, a z 2026 hoda — užo nie. Tamu tearetyčna spravazdačnaść i vypłaty pa nacyjanalnym zakanadaŭstvie pryjdziecca rabić tolki ŭ 2027 hodzie.

Ale heta tearetyčna, a jak budzie na praktycy — pakul nieviadoma.

Naprykład, litoŭskaja padatkovaja pakul nie daje kansultacyj pa dachodach za 2025 hod. Nie vyklučana, što nacyjanalnyja zakanadaŭstvy abiedźviuch krain źmieniacca ciaham 2025 hoda, i tady źjaviacca novyja praviły. Tamu treba sačyć za zakanadaŭstvam.

• 1
• 0
• 2
• 0
• 0
• 0
• 0
• 0