Amal pałova adkładaje hrošy, što zastalisia paśla ŭsich nieabchodnych vydatkaŭ.
Instytut sacyjałohii NAN Biełarusi pravioŭ acenku i analiz finansavaj piśmiennaści nasielnictva krainy ŭ kantekście roznych sacyjalnych hrup, piša Myfin.by.
U daśledavańni havorycca, što prykładna dźvie traciny biełarusaŭ nie viaduć rehularny piśmovy ŭlik siamiejnaha biudžetu. Tych, chto ŭličvaje svaje vydatki, akazałasia ŭsiaho 33-37% u zaležnaści ad hrupy.
Daśledčyki adznačajuć, što pieravažajučaj stratehijaj kiravańnia finansami źjaŭlajecca «reštkavaje źbieražeńnie», kali adkładajucca srodki, što zastalisia paśla ŭsich nieabchodnych vydatkaŭ.
Hetaj stratehii prytrymlivajecca 41-46% pradstaŭnikoŭ usich sacyjalnych hrup.
«U toj ža čas «efiektyŭnuju stratehiju vydatkaŭ», jakaja praduhledžvaje pryjarytetnaje farmiravańnie źbieražeńniaŭ i vydatkoŭvańnie tolki tych srodkaŭ, što zastalisia, vykarystoŭvaje tolki tracina apytanych siarod moładzi i tolki čverć u kožnaj z astatnich hrup», — adznačajuć sacyjołahi.
Pry hetym krychu mienš za 20% apytanych va ŭsich hrupach, akramia piensijanieraŭ, uvohule nie robiać źbieražeńniaŭ praź niedachop srodkaŭ. Siarod piensijanieraŭ hetaja dola składaje 23%.
Tyja biełarusy, jakim usio ž udajecca adkładvać hrošy, u bolšaści majuć finansavuju «padušku», jakoj u vypadku straty asnoŭnaj krynicy dachodu chopić tolki na karotki pieryjad — ad adnaho da troch miesiacaŭ.
Ź śćviardžeńniem ab nieabchodnaści adkładać hrošy na budučuju piensiju zhodnyja kala 40% biełarusaŭ (siarod moładzi — 38,2%, pracujučych — 39,6%, piensijanieraŭ — 41,2%).
Maładyja ludzi pry hetym bolš aptymistyčna hladziać na svajo budučyniu: tolki 18,2% ź ich ličać, što praz svajo finansavaje stanovišča nikoli nie atrymajuć u žyćci toje, čaho chočuć (siarod pracujučych — 23,6%, piensijanieraŭ — 39,9%).
Taksama respandentaŭ paprasili ŭjavić, što jany vyjhrali 50 tysiač rubloŭ, i padzialicca, kudy b jany nakiravali hetyja hrošy.
Siarod moładzi bolšaść palepšyli b žyllovyja ŭmovy (31,1% apytanych), a pracujučyja biełarusy i piensijaniery pieravažna adkłali b atrymanyja srodki (adpaviedna 25,9% i 35,3% respandentaŭ).
Kamientary