Aŭstralijec pražyŭ 100 dzion z štučnym tytanavym sercam u čakańni donarskaj transpłantacyi

Aŭstralijec, jaki pakutavaŭ ad vostraj sardečnaj niedastatkovaści, staŭ pieršym čałaviekam u śviecie, jaki paśpiachova pražyŭ 100 dzion z całkam štučnym tytanavym sercam u čakańni pierasadki donaraŭskaha. Aŭstralijskija daśledčyki i daktary, jakija praviali apieracyju, zajavili, što impłantat mieŭ «biassprečny kliničny pośpiech», piša Bi-bi-si.

Pacyjentam staŭ 40-hadovy mužčyna z Novaha Paŭdniovaha Uelsa (štat na paŭdniovym uschodzie Aŭstralii). Jon dobraachvotna pahadziŭsia stać pieršym atrymalnikam całkam štučnaha serca ŭ Aŭstralii (i šostym u śviecie).

Pieršaja piaciorka takich impłantacyj była praviedzienaja letaś u ZŠA. Tady ŭsie pacyjenty atrymali donaraŭskija sercy jašče da vypiski z balnicy. Samy doŭhi pieryjad pamiž impłantacyjaj i transpłantacyjaj donarskaha serca składaŭ 27 dzion.

Aŭstralijskamu pacyjentu ŭstanavili pryładu 22 listapada ŭ balnicy Śviatoha Vincenta ŭ Sidnei padčas šaścihadzinnaj apieracyi, jakuju pravodziŭ kardyjatarkalny chirurh i chirurh-transpłantołah Poł Jansc.

Štučnaje serca było raspracavana kampanijaj BiVACOR, štab-kvatera jakoj znachodzicca ŭ Kalifornii. Ź im pacyjent pražyŭ bolš za 100 dzion, pakul u pačatku sakavika jamu narešcie nie pierasadzili donaraŭskaje serca.

Vynachodnictva ŭjaŭlaje saboj pieršuju ŭ śviecie impłantavanuju rotarnuju kryvianosnuju pompu, jaki moža całkam zamianić čałaviečaje serca, vykarystoŭvajučy technałohiju mahnitnaj levitacyi dla ŭznaŭleńnia naturalnaha kryvacioku zdarovaha serca.

Impłantat, jaki pakul znachodzicca na rańnich stadyjach kliničnych daśledavańniaŭ, byŭ raspracavany dla pacyjentaŭ ź bivientrykularnaj sardečnaj niedastatkovaściu ŭ kančatkovaj stadyi, jakaja zvyčajna ŭźnikaje, kali inšyja zachvorvańni — najčaściej infarkt i išemičnaja chvaroba serca — nastolki paškodzili abo asłabili serca, što jano nie moža efiektyŭna pierapampoŭvać kroŭ pa arhaniźmie.

Zasnavalnik kampanii BiVACOR, aŭstralijski bijainžynier Denieł Tyms, jaki vynajšaŭ pryładu paśla śmierci baćki ad chvaroby serca, adznačyŭ, što heta «zachaplalna — bačyć, jak dziesiacihodździ pracy ŭvasablajucca ŭ žyćcio».

«Usia kamanda BiVACOR hłyboka ŭdziačnaja pacyjentu i jaho siamji za toje, što jany davierylisia našamu całkam štučnamu sercu, — havorycca ŭ jaho zajavie. — Ich mužnaść prakładuć šlach da taho, kab jašče nieźličonaja kolkaść pacyjentaŭ atrymała hetuju ratavalnuju technałohiju».

Pavodle dadzienych urada Aŭstralii, jaki vydzieliŭ 50 miljonaŭ dołaraŭ na raspracoŭku i kamiercyjalizacyju pryłady BiVACOR u ramkach prahramy «Štučnaje serca: na pieradavoj», štohod bolš 23 miljonaŭ čałaviek va ŭsim śviecie pakutujuć ad sardečnaj niedastatkovaści, ale tolki šeść tysiač mohuć atrymać donarskaje serca.

• 0
• 0
• 0
• 0
• 0
• 0
• 0
• 0