Aktyŭnaje seksualnaje žyćcio vielmi časta pačynajuć dastatkova rana, u 11-12 hadoŭ. Praŭda, tut jość adno vialikaje «ale»

Na pohlad seksołaha-psichaterapieŭta Vasila Šaŭlakova, seksualnaść biełarusaŭ dastatkova jaskrava vyjaŭlenaja. Heta bačna jak u kultury, tak i ŭ historyi. Ciapier jana pieražyvaje novy vitok źmien, źviazanych jak z raźvićciom ličbavych technałohij, tak i z transfarmacyjaj uzajemaadnosin pamiž ludźmi, u tym liku ŭ pary.

Što da prablem, ź jakimi źviartajucca biełarusy, to ŭ intervju ANT śpiecyjalist zaŭvažaje, što asnoŭnyja składanaści źviazanyja z roznymi seksualnymi rasstrojstvami i dysfunkcyjami, kali čałaviek nie moža paŭnavartasna realizoŭvać svaju seksualnuju aktyŭnaść u adnosinach. Taksama aktualnyja pytańni jakaści seksualnaha žyćcia, jaho biaśpieki i ekałahičnaści.

Akramia taho, siońnia asablivaja ŭvaha nadajecca temie narmatyŭnaści — dzie prachodzić miaža pamiž zdarovymi seksualnymi adnosinami i tymi składanaściami, jakija patrabujuć uśviedamleńnia i prapracoŭki.

Što rabić, kab byt nie pazbaviŭ seksualnaha žyćcia

Šaŭlakoŭ źviartaje ŭvahu na toj fakt, što asnoŭnaja składanaść u padtrymańni aktyŭnaha seksualnaha žyćcia ŭ pary źviazana z rucinaj, pobytam, pracaj i dziećmi. Z časam u adnosinach časta hublajecca intymnaść, a ŭ partnioraŭ nie zastajecca prastory nie tolki adno dla adnaho, ale i dla siabie.

Kali partniory pačynajuć zaŭvažać prablemu i sprabavać jaje vyrašyć, akazvajecca, što nazapasiłasia ŭžo zanadta šmat niavyrašanych pytańniaŭ, kryŭdaŭ i rasčaravańniaŭ.

Pieraadoleć hety kryzis byvaje składana, ale heta mahčyma. U takich situacyjach dapamahajuć adkryty dyjałoh, pošuk novych formaŭ uzajemadziejańnia, uśviadomlenaje adnaŭleńnie intymnaści. A kali spravicca samastojna nie ŭdajecca, možna źviarnucca da śpiecyjalistaŭ, jakija dapamohuć razabracca z prablemami i viarnuć harmoniju ŭ adnosiny.

Jak zachavać seksualnaje žyćcio pary ŭ stałym uzroście

Pa słovach seksołaha-psichaterapieŭta, kab zachavać harmaničnaje seksualnaje žyćcio ŭ stałym uzroście, pary važna ŭličvać try klučavyja faktary: zdaroŭje, fizičnaja aktyŭnaść i seksualnaja praktyka.

«Ličycca, što kali ŭ čałavieka dastatkova aktyŭnaje, jarkaje seksualnaje žyćcio da, naprykład, 55 hadoŭ, to dalej asabliva ničoha nie mianiajecca. Viadoma, seksualnaja aktyŭnaść krychu źnižajecca, jana stanovicca bolš pačućciovaj, bolš eratyčnaj, bolš dalikatnaj.

Ludzi stanoviacca bolš andrahinnymi, ich rysy maskulinnaści, fieminnaści, mužnaści i žanockaści ŭvachodziać u peŭnuju harmoniju, i heta dazvalaje pary bolš pačućciova ŭdavacca ŭ seksualnaść», — davodzić Šaŭlakoŭ.

Pa słovach seksołaha, niekatoryja śpiecyjalisty ličać, što žančynam stałaha ŭzrostu padtrymać seksualnuju aktyŭnaść moža dapamahčy harmanalnaja padtrymka.

Adnak hetaje pytańnie zastajecca sprečnym, bo paralelna z hetym isnuje i inšaje mierkavańnie. Jaho prychilniki ličać, što naturalnaja pierabudova arhanizma važnaja dla pierachodu ad «padletkavaj» seksualnaści da stałaj. Umiašańnie ŭ hety praces moža vyklikać niepažadanyja reakcyi z boku psichiki i fizijałohii.

Jak vyznačyć pryčynu źnižeńnia seksualnaj funkcyi

Viadoma, što parušeńnie seksualnaj funkcyi moža być źviazana ź fizičnymi ci psichałahičnymi prablemami.

Kali seksualnyja prablemy supravadžajucca stresam, vyharańniem, pieražytymi kryzisami ci psichałahičnymi traŭmami, to, chutčej za ŭsio, pryčyna mienavita ŭ psichicy. Časta možna adsačyć, što parušeńni pačalisia paśla peŭnaj padziei ci ŭ składany pieryjad žyćcia.

Jak tłumačyć seksołah-psichaterapieŭt, pry psichałahičnych pryčynach stan niestabilny: u adzin dzień usio dobra, u inšy — nie. Taksama moža naziracca zaležnaść ad partniora: z adnym usio atrymlivajecca, ź inšym uźnikajuć ciažkaści. Takaja dynamičnaść — vidavočnaja prykmieta taho, što prablema psichałahičnaja.

Kali parušeńni pastajannyja i nie zaležać ad nastroju, partniora abo abstavin, heta moža śviedčyć pra fizijałahičnyja pryčyny. U adroźnieńnie ad psichałahičnych prablem, jakija mohuć źmianiacca ź ciaham času, fizičnyja parušeńni, jak praviła, patrabujuć miedycynskaha ŭmiašańnia.

Ci narmalna nie chacieć seksu

«Naša seksualnaść — heta vielmi dynamičny praces, dzie niama pastajanstva. My ŭvieś čas znachodzimsia ŭ niekatorym źmianieńni ad pavyšeńnia našaj seksualnaj aktyŭnaści da jaje panižeńnia. I hetyja chvali ŭvieś čas pranizvajuć naša žyćcio», —

zaŭvažaje seksołah i adznačaje važnaść razumieńnia hetaj dynamiki, kab usprymać źnižeńnie albo źmienu svajoj ciahi, uzbudžeńnia jak nianormu.

Adnak, pa słovach śpiecyjalista, u apošnija dziesiacihodździ ahulny ŭzrovień stresu ŭzros nastolki, što mnohija ludzi prosta nie vytrymlivajuć. Heta pryvodzić da źnižeńnia enierhii, psichaemacyjnaha vyharańnia, što niepasredna adbivajecca na seksualnaj aktyŭnaści.

Ź fizijałahičnaha punktu hledžańnia, zaŭvažaje Šeŭlakoŭ, seks nie źjaŭlajecca žyćciova nieabchodnym, jak son ci charčavańnie. Adnak jaho adsutnaść upłyvaje na jakaść žyćcia, źmianšaje ŭzrovień zadavalnieńnia, emacyjnuju blizkaść u adnosinach i matyvacyju da źmien.

Mužčynskaja palihamija: mif ci realnaść?

Jak śćviardžaje śpiecyjalist, palihamnaść mužčyn — heta chutčej stereatyp, čym bijałahičnaja nieabchodnaść. Daśledavańni pakazvajuć, što palihamnaści niama. Žadańnie mieć adrazu niekalkich partnioraŭ — indyvidualnaja asablivaść, jakaja moža być ułaścivaja jak mužčynu, tak i žančynie.

«Jość mužčyny i žančyny, jakim patrabujecca dastatkova vialikaja raznastajnaść seksualnych adnosin, seksualnych partnioraŭ. Jość ludzi, jakim heta nie patrebna. I heta bolš zaležyć chutčej ad kultury vychavańnia, ad ich jarkaj ahresiŭnaści, u tym liku pałavoj kanstytucyi.

My nikoli nie źjaŭlajemsia niejkim praduktam našych instynktaŭ, tym bolš što daŭno dakazana, što nasamreč instynktaŭ jak takich niama. To-bok my sami zaŭsiody vybirajem, što my budziem rabić, jak my budziem rabić, i niasiom za heta niekatoruju adkaznaść», — davodzić Šaŭlakoŭ.

Jak ličbavizacyja paŭpłyvała na zumieraŭ?

Sučasnaje maładoje pakaleńnie vyrasła ŭ epochu ličbavych technałohij, što paŭpłyvała na ich adnosiny da seksualnaści i intymnaha žyćcia. Dziakujučy internetu, sacsietkam i kniham padletki stali značna raniej atrymlivać infarmacyju pra seksualnaść.

«Hetaje infarmavańnie, z adnaho boku, značna stymuluje seksualnaje raźvićcio, i na siońnia my možam užo śmieła kazać, što ŭ 9 hadoŭ heta ŭžo padletak. I aktyŭnaje seksualnaje žyćcio vielmi časta na siońnia pačynajuć dastatkova rana, heta ŭ 11-12 hadoŭ.

Praŭda, tut jość adno vialikaje «ale». Heta tyčycca ŭ asnoŭnym daśledavańnia ŭłasnaha cieła, jaho reakcyi, daśledavańnia cieła partniora, seksualnaha ŭzajemadziejańnia, ale heta nie datyčycca pałavoha akta», —

davodzić seksołah-psichaterapieŭt i źviartaje ŭvahu na vyniki daśledavańniaŭ, jakija pakazvajuć, što ŭzrost ustupleńnia ŭ paŭnavartasnyja pałavyja i seksualnyja adnosiny značna źmiaściŭsia. Zaraz heta adbyvajecca zvyčajna ŭ 19-20 hadoŭ.

Jak adznačaje śpiecyjalist, sučasnaja moładź stavicca da seksu bolš śviadoma, imknučysia razabracca ŭ svaich žadańniach i miežach, pierš čym pačynać aktyŭnaje pałavoje žyćcio.

• 11
• 1
• 1
• 6
• 3
• 1
• 0
• 1