Jakija prablemy hramadstva moh by vyrašyć Turčyn, kali b jon byŭ libierałam u centry sistemy? I ci moh by?
U 2017-2019 hadach Alaksandr Turčyn svajoj paraŭnalnaj adkrytaściu stvaryŭ sabie pazityŭny vobraz u vačach niedziaržaŭnaj presy. Hety vobraz ledź nie libierała i rynačnika, pabudavany na zachapleńniach žurnalistaŭ, zamacavaŭsia i staŭ žyć sam pa sabie, ni razu nie budučy ni paćvierdžanym, ni pierahledžanym.
Realnych pieradumovaŭ dla stvareńnia takoha vobrazu nie isnavała navat u travajednyja hady, nie kažučy pra toje, što zdolnaść zachavać siabie ŭ sistemie ŭ kryvavyja 2020-2024, a taksama ŭzvysicca da premjer-ministra ŭ 2025-m całkam naadvarot charaktaryzujuć maralnyja pierakanańni Turčyna.
Ale navat kali ŭjavić na chvilinu, što ŭ dyktatarskaj Biełarusi niejkim cudam na pasadzie akazaŭsia premjer-libierał. Jakija z prablem hramadstva i jak jon moh by vyrašyć, budučy atočanym śpiecsłužbami, Administracyjaj Łukašenki i nie saboj pryznačanym uradam?
Pra heta dla «Našaj Nivy» parazvažali dva adstaŭnyja čynoŭniki, jakija na słužbie pierasiakalisia i z Turčynam asabista, i z aparatam Savieta ministraŭ.
Kali ścisła, to ich vierdykt adnaznačny — navat kali b Turčyn byŭ sapraŭdnym libierałam, u jaho b ničoha nie atrymałasia.
«Kali ludziej chvaluje pytańnie adnaŭleńnia na pracy paśla zvalnieńniaŭ za palityku — to Turčyn nie toj, chto b heta vyrašyŭ.
Heta nie jahonaja śfiera kampietencyj, z hetym lepš iści ŭ indyvidualnym paradku da namieśnikaŭ pa biaśpiecy na sami pradpryjemstvy.
Kali ž centralizavana i ahułam, z hetym treba iści da Łukašenki i prasić jaho. Prasić pa tonkim pytańni. A za kaho? Za masy? «Jak ty možaš za ŭsich paručycca?» — spytaje jaho Łukašenka. I na hetym razmova skončycca. I heta nie kažučy pra toje, što Turčyn navat za svaich paprasić nie moža i nie byŭ u hetym zaŭvažany. I nie kažučy taksama pra toje, što sama pastanoŭka pytańnia viarnuć kahości kudyści idzie ŭ razrez z tym, što havoryć načalnik Turčyna», — skazaŭ adzin z surazmoŭcaŭ «Našaj Nivy».
Moža być, Turčyn moh by vyraŭniać kadravuju palityku, pačać nabirać kiraŭnikoŭ pa pryncypie prafiesijanalizmu, a nie palityčnaj łajalnaści? Atačyć siabie takimi ž łatentnymi libierałami, jak jon, nibyta, sam?
«Pa-pieršaje, jahonaja pasada hetaha nie dapuskaje: Łukašenka vyznačaje, Saŭmin vykonvaje, Administracyja praviaraje.
Pa-druhoje, vakoł jaho nikoli nie było nijakich jahonych ludziej. Jon navat u abłvykankam nikoha nie pryznačyŭ, heta nie ŭ jahonym charaktary, heta čysty vykanaŭca, Hałoŭčanka №2.
A kali prosta parazvažać, na jakija kadravyja rašeńni moh by mieć upłyŭ premjer-ministr, to i jany vielmi ścipłyja. Heta tolki asobnyja pradpryjemstvy arhanizacyj, paparadkavanych naŭprost Saŭminu: Biełdziaržcharčpram, Biellehpram, Biełnaftachim, Biellesbumpram, Biełkapsajuz. Pradpryjemstvaŭ u hetych kancernach sapraŭdy šmat. Ale.
I tut nie premjer-ministr naŭprost vyrašaje, a kuryrujučy vice-premjer, da jakoha prychodzić načalnik kancerna z prapanovami, vyrašaje ich ź vice-premjeram, a toj niasie na podpis premjeru, što ŭ bolšaści vypadkaŭ farmalnaść.
Kali ž premjer-ministr vyrašyć pryniać aktyŭny ŭdzieł, to akažacca, što samich kiraŭnikoŭ kancernaŭ jon nie pryznačaje, heta robić Łukašenka. Načalnikaŭ vialikich pradpryjemstvaŭ u padviedamasnych kancernach, takich jak «Azot», «Naftan», i hetak dalej, jon taksama nie pryznačaje. Heta vyrašaje Administracyja Łukašenki. Inšymi słovami, ja b nijakich nadziej z Turčynym nie źviazvaŭ»,
— skazaŭ inšy naš surazmoŭca.
Kamientary
ale úsio minavała