Piać faktaŭ pra novaha premjera Turčyna — lubić baskietboł, pracuje z 14 hadoŭ
Alaksandra Turčyna, jaki apošnija hady byŭ kiraŭnikom Minskaj vobłaści, pryznačyli premjer-ministram zamiest Ramana Hałoŭčanki. Što viadoma pra jaho bijahrafiju.
U škole lubiŭ chimiju i baskietboł
Turčynu 49 hadoŭ. Jon rodam z Navahrudka. Jaho maci była miedykam, baćka pracavaŭ u administracyi rajvykankama.
Alaksandr Turčyn skončyŭ škołu sa srebnym miedalom. Adzinaja čaćviorka ŭ jaho była pa ałhiebry. Sam jon raskazvaŭ, što bolš za ŭsio lubiŭ vyvučać chimiju. Taksama zachaplaŭsia baskietbołam, hety vid sportu bolš za ŭsio lubić i ciapier.
Dyrektar škoły ŭ razmovie «Salidarnaściu» charaktaryzavała jaho jak flehmatyka, jaki vonkava mała źmianiŭsia ź junactva.
Padpracoŭvaŭ z 14 hadoŭ
Budučy čynoŭnik skončyŭ Biełaruski dziaržaŭny ekanamičny ŭniviersitet.
U 14 hadoŭ jon uładkavaŭsia na pradpryjemstva, dzie vypuskali aŭtamabilnyja filtry. «Ich treba było pakavać u pramaślennuju papieru — heta rypieńnie zhadvaju i ciapier», — dzialiŭsia Turčyn.
U rodnym Navahrudskim rajonie pracavaŭ zahadčykam kramy kałhasa «Avanhard», padatkovym inśpiektaram. Paźniej staŭ hałoŭnym kantraloram-revizoram Ministerstva finansaŭ pa Navahrudskim rajonie i Hrodzienskaj vobłaści.
U 2004—2010 hadach byŭ spačatku načalnikam finansavaha adździeła, a zatym namieśnikam staršyni Karelickaha rajvykankama.
«Ja dumaju, kali Turčyn syšoŭ z rajona, usie pra heta škadavali. Jaho niešta chvalavała, jon pieražyvaŭ za rajon», — raskazvaŭ pra jaho «Salidarnaści» dyrektar miascovaha pryvatnaha pradpryjemstva.
Paźniej Turčyn — staršynia kamiteta pa ekanomicy Minskaha abłvykankama (2010—2012), namieśnik staršyni Minskaha abłvykankama (2012-2015). U 2015—2016 byŭ pamočnikam Łukašenki pa Homielskaj vobłaści. U 2016—2018 uznačalvaŭ Aparat Savieta ministraŭ.
U 2018—2019 pracavaŭ pieršym vice-premjeram, a paśla kiraŭnikom Minskaj vobłaści.
Jon apisvaŭ svoj hrafik hubiernatara: pracoŭny dzień pačynajecca ŭ 7.40, a zaviaršajecca kala 20.00, pry hetym subota nie adnosicca da liku vychodnych.
Stajaŭ za dekretam №7
Turčyna nazyvajuć aŭtaram libieralnaha dekreta №7 «Ab raźvićci pradprymalnictva».
U jaho dobryja adnosiny z bahatymi ludźmi krainy, takimi jak haspadar «Karony» Pavieł Tapuzidzis.
Žonka taksama z Navahrudka
Žonka Turčyna Ina taksama z Navahrudka.
A dačka čynoŭnika Darja vučyłasia ŭ toj ža navahrudskaj škole №4, što i jon. Paśla skončyła Minski abłasny licej. Zhodna z bazaj «Biełpoł», niejki čas pracavała ŭ kampanii «Patyjo», jakaja vałodaje sietkaj kramaŭ «Piaty elemient».
Mieŭ reputacyju prarynkavaha čynoŭnika
Turčyn mieŭ reputacyju prychilnika rynačnaj ekanomiki. Jon uvachodzić u Radu pa raźvićci pradprymalnictva.
«U nas niama žadańnia karać i raskułačvać biznes», — zapeŭnivaŭ u 2018-m Turčyn na mižnarodnym Kastryčnickim ekanamičnym forumie (KEF). Ale z taho času situacyja ŭ krainie mocna źmianiłasia.
Paśla vybaraŭ 2020 hoda trapiŭ pad sankcyi Jeŭrasajuza, Šviejcaryi i Vialikabrytanii.
«Nijakaj istotnaj karekciroŭki ekanamičnaha kursu nie budzie», — zajaviŭ Turčyn adrazu paśla pryznačeńnia.
«Dla mianie jon rynačnik, ale kanfarmist», — daŭ charaktarystyku Turčynu adzin ź biełaruskich biznesoŭcaŭ.
Kamientary