Šrajbman: Kali budzie prapanova, jakuju biełaruskija ŭłady paličać vartaj taho, to adpuścić mohuć usich

Biełaruskija prapahandysty pastajanna paŭtarajuć, što znakavych palitviaźniaŭ nichto nie vypuścić. Adnak analityk Arciom Šrajbman prapanuje nie ŭsprymać hetyja słovy ŭsurjoz.

«Ja nie vieru biełaruskim prapahandystam. Ich zdolnaści da pieraabuvańnia ja vielmi šanuju, liču, što heta toje, što jany zasvoili za minułyja hady. Dumaju, kali Łukašenka vyrašyć inakš, rastłumačyć, čamu treba było rabić tak, jany taksama zmohuć», —

pierakonvaje Šrajbman u intervju «Jeŭraradyjo» i dadaje, što los znakavych fihur ź liku palitviaźniaŭ zaležyć ad taho, što prapanujuć režymu naŭzamien:

«Kali budzie prapanova, jakuju biełaruskija ŭłady paličać vartaj taho, to ja ŭpeŭnieny, što niama nijakich limitaŭ, miežaŭ na toje, što jany mohuć rabić z palitviaźniami, u sensie — kaho adpuścić. Dumaju, što adpuścić mohuć usich, ci kaho spatrebicca».

Inšy varyjant, jaki razhladaje analityk — najaŭnaść situacyi, pry jakoj režym paličyć pryvabnymi byłyja prapanovy, jakija raniej takimi nie ličyŭ.

«Situacyja taksama źmianiajecca. U sensie ich upeŭnienaści ŭ rasijskaj padtrymcy. My bačym, što Łukašenka ŭžo skardzicca na prablemy na rasijskim rynku. I nie pieršy raz užo, napeŭna, niekalki miesiacaŭ apošnich. Tamu heta moža taksama ich pazicyju pa zapytach niejak panižać», — zaŭvažaje Šrajbman.

«Uličvajučy toje, što ŭsich palitviaźniaŭ možna pry vyzvaleńni vycisnuć z krainy ci prosta padvieźci na miažu, ja tut nie baču nijakaj palityčnaj ci niejkaj inšaj prablemy», — upeŭnieny analityk.

Jakija vyhady bačyć režym u pieramovach z ZŠA

Imknieńnie biełaruskaha režymu da pieramoŭ ab admienie sankcyj mienavita z ZŠA analityk tłumačyć niekalkimi abstavinami.

«Pa-pieršaje, jany bolš [palityčna] hnutkija. Pa-druhoje, (…) jany (biełaruskija ŭłady — NN) žyvuć u tym śviecie, dzie Jeŭropa i ŭsie jeŭrapiejskija krainy — prosta vasały Vašynhtona. I toje, što Vašynhton skaža, jany zrobiać. I ŭ hetym rečyščy jany ličać: a čaho nam damaŭlacca z vasałami, kali my možam adrazu praz hałavu damovicca z Vašynhtonam. Jon vyrašyć za nas našy prablemy ŭ Jeŭropie».

Šrajbman adznačaje, što taki pohlad na adnosiny Jeŭropy i ZŠA nierealistyčny. Asabliva siońnia.

Akramia hetaha, na pohlad analityka, biełaruskija ŭłady bačać, što Tramp — maksimalna mierkantylny palityk, tamu jamu nie spatrebiacca bolš hłybokija sastupki Łukašenki, jak hetaha patrabuje ES, u pravavych dakumientach jakoha zapisany kankretnyja ŭmovy źmiakčeńnia sankcyjnaj palityki ŭ adnosinach da Biełarusi. I jany ŭklučajuć nie tolki vyzvaleńnie palitviaźniaŭ. Heta i viartańnie palitemihracyi, i sumlennyja vybary, i rasśledavańnie źbićcia ludziej i represij 2020 hoda.

«Jeŭrapiejskija dypłamaty nie mohuć praihnaravać hetyja normy. Kali budzie niejki vialiki palityčny vyklik, vialikaja palityčnaja patreba niejak kamunikavać z Łukašenkam, to palityčnyja lidary Jeŭrasajuza, napeŭna, mohuć niejak adyści troški ŭbok ci źmianić hetyja normy. Patreby takoj niama, ale Trampu heta ŭvohule nie cikava, tamu z Trampam i ź jaho administracyjaj lahčej handlavacca».

Na pohlad Šrajbmana, jon nie ŭpeŭnieny, što staŭka biełaruskich uładaŭ na ZŠA spracuje, bo «samyja cikavyja sankcyi — heta tyja, što ŭvodziŭ Jeŭraźviaz». Analityk zaŭvažaje, što najbolš balučyja sankcyi ŭ tych dvuch siektarach, pra jakija išła havorka ŭ artykule The New York Times, — kalij i banki, uviali krainy Jeŭrasajuza. Tamu admiena amierykanskich sankcyj nie pryviadzie da istotnych źmien u stanoviščy «Biełaruśkaliju» i biełaruskaj bankaŭskaj sistemy.

«Spadziavacca, što z-za salidarnaści z Trampam Jeŭrasajuz abaviazkova budzie admaŭlacca ad svajoj palityki pa Biełarusi, nie vidavočna», — davodzić Šrajbman.

Adnak sproby znajści kantakty z ZŠA analityk prapanuje razhladać u bolš šyrokim kantekście:

«Łukašenka ŭsie hetyja vyzvaleńni chvalami palitviaźniaŭ i ŭvohule ŭsie svaje dypłamatyčnyja namahańni apošnich miesiacaŭ razhladaje jak častku ahulnaha pracesu mahčymaj pierazahruzki ŭ śviecie: «Budzie niejkaje zamireńnie ZŠA, Zachadu i Rasii, niejkaja ździełka pa Ukrainie, i mnie patrebna ŭ jaje ŭbudavacca».

I tamu, kali takaja meta staić, kali taki scenar ličycca vierahodnym, to varta z samym mahutnym hulcom z zachodniaha boku sprabavać narmalizavać adnosiny da hetaha momantu. Tak pavysiacca šancy, što ciabie mohuć kudyści zaprasić na niejkija pieramoŭnyja farmaty, tak pavysiacca šancy, što pra ciabie nie zabuducca, kali buduć zdymać sankcyi z Rasii, i hetak dalej».

Pavialičyć

Jak aktualnaja situacyja ŭ śviecie moža paŭpłyvać na Biełaruś

Šrajbman adznačaje, što niepasredna na Biełaruś pracesy, jakija ciapier adbyvajucca ŭ śviecie i vakoł Ukrainy, nijak nie ŭpłyvajuć, akramia chiba tolki taho, što heta dadaje bolš niavyznačanaści dla Łukašenki.

«My bačym, što jon nie viedaje, čaho čakać ad hetaj administracyi ZŠA i ad jaje pierazapusku adnosin z Rasijaj, tamu što jon spraviadliva havoryć, što kali amierykanskija i zachodnija kampanii viernucca ŭ Rasiju, ale kali pry hetym (jon pra heta nie kaža, ale heta častka hetaha scenaryju) nie adkryjucca handlovyja šlachi dla Biełarusi na Zachad, to biełaruskaja ekanomika apyniecca ŭ najciažejšaj situacyi».

Akramia ryzyki dla krainy, analityk nazyvaje i mahčymaści: «Čym mienš transatłantyčnaj salidarnaści, tym lahčej raźbiracca paasobku z kožnym sa svaich učorašnich ci siońniašnich apanientaŭ».

«Kali voś hety «marš Trampa» budzie nadavać niejkich siłaŭ i ŭpeŭnienaści ŭ sabie jeŭrapiejskim ultrapravym, kali, naprykład, pačnuć błakavać jeŭrapiejskija sankcyi bolš aktyŭna, to heta taksama vyhoda dla Łukašenki»,

— davodzić analityk i zaŭvažaje, što jość śpiektr roznych niepradkazalnych nastupstvaŭ, prapanujučy pahladzieć na toje, što budzie ź pieramovami pa Ukrainie.

«Kali pieramirje sapraŭdy atrymajecca zabiaśpiečyć, (…) heta moža paŭpłyvać na Biełaruś jak pazityŭna z punktu hledžańnia taho, što biełaruskaje pytańnie budzie abmiarkoŭvacca na hetych mirnych pieramovach, i tady mahčymaja peŭnaja demilitaryzacyja, deeskałacyja ŭ rehijonie, mahčyma, pabudova bolš prazrystaj Biełarusi dla ŭsich susiedziaŭ, u tym liku dla Ukrainy, kab jana nie stvarała dla jaje pahrozu», — razvažaje Šrajbman.

Analityk maluje i inšy scenaryj, kali Rasija ŭ adkaz na źjaŭleńnie va Ukrainie amierykanskich miratvorcaŭ uviadzie svoj vajskovy kantynhient u Biełaruś:

«My znachodzimsia ŭ punkcie, dzie nastolki vialikaja niavyznačanaść, što ja mahu namalavać vielmi roznyja scenary. Prosta ciapier ja nie baču nijakich upłyvaŭ pracesaŭ uźlotu ŭltrapravych ci papulistaŭ u Jeŭropie ci ZŠA na žyćcio zvyčajnaha biełarusa. Budziem ščyrymi — my znachodzimsia trochi ŭ inšym kantekście».

• 7
• 2
• 0
• 3
• 0
• 2
• 0
• 0