«Rejhan pieravaročvajecca ŭ trunie». Demakraty daručyli adkazvać Trampu sienatarcy, čyj pradzied uciok u Amieryku z Kojdanava

Prezident ZŠA Donald Tramp vystupiŭ ź pieršym paśla vybaraŭ zvarotam da Kanhresu ZŠA. Pa amierykanskaj palityčnaj tradycyi, apazicyja zaŭsiody zapisvaje svoj adkaz na vystupleńnie prezidenta. Na hety raz Demakratyčnaja partyja daručyła apaniravać Trampu sienataru ad štata Mičyhan Elisie Słotkin.

U svaim dziesiacichvilinnym adkazie Słotkin padvierhła krytycy pieršyja kroki Trampa na pasadzie prezidenta, nazvaŭšy ich nieabdumanymi. Pa jaje słovach, ceny na tavary i pasłuhi ŭ krainie praciahvajuć raści, a ŭ novaj administracyi niama jasnaha płana, jak z hetym zmahacca.

Asobna pradstaŭnica demakrataŭ zakranuła adnosiny z Ukrainaj. Jana ŭzhadała pra rezanansnuju sustreču Trampa i vice-prezidenta Džej Dzi Vensa z Uładzimiram Zialenskim u Biełym domie.

«Hety epizod u Avalnym kabiniecie byŭ nie prosta kiepskim realici-šoŭ. Jon adlustravaŭ usiu sutnaść padychodu Trampa da mižnarodnaj palityki.

Prezident Tramp lubić havaryć pra mir praź siłu. Ale na samaj spravie hetuju frazu jon skraŭ u Ronalda Rejhana. Ale paśla taho śpiektakla, jaki razyhraŭsia ŭ Avalnym kabiniecie na minułym tydni, mahu skazać adno: Rejhan, vidać, pieravaročvajecca ŭ trunie», — adznačyła Słotkin.

Jana dadała, što Tramp «addaje pieravahu zaihryvać z dyktatarami kštałtu Uładzimira Pucina i bić našych sajuźnikaŭ, jak Kanada, pa tvary», majučy na ŭvazie taryfnuju vajnu, jakuju Tramp pačaŭ z susiedam.

Raskrytykavała sienatarka i mihracyjnuju palityku Trampa, abvinavaciŭšy jaho ŭ adsutnaści spačuvańnia da nielehałaŭ. Heta niadziŭna, uličvajučy jaje siamiejnuju historyju.

Elisa Słotkin naradziłasia ŭ jaŭrejskaj siamji, jaje baćki vałodajuć fiermaj u vioscy Choli ŭ Mičyhanie. Fierma źjaŭlajecca častkaj vialikaj kampanii Hygrade Meat Company, jakuju jašče ŭ pieršaj pałovie XX stahodździa zasnavaŭ pradzied Elisy Samuel Słotkin. Jon naradziŭsia ŭ Kojdanavie (sučasnym Dziaržynsku) pad Minskam i byŭ adnym ź dzieviaci dziaciej u siamji miascovaha tałmudysta. U toj čas miastečka było adnym z centraŭ chasidyzmu.

Samuel z samaha dziacinstva nie adpaviadaŭ baćkoŭskim čakańniam: jon maryŭ vyjechać u ZŠA i razbahacieć. Na ŭcioki jon navažyŭsia ŭ 14 hadoŭ, tady ŭ jaho jašče nie było pašparta. Samuel upłaŭ pierasiek pamiežnuju raku, kab paźbiehnuć sustrečy z rasijskimi i niamieckimi pamiežnikami, zatym dabraŭsia da Hałandyi. Adtul u 1899 hodzie padletak vypraviŭsia ŭ ZŠA — na toj čas tam prymali mihrantaŭ biez pašpartoŭ.

U kišeni ŭ chłopca byli ŭsiaho dalar i vosiemdziesiat centaŭ. Pieršapačatkova Samuel chacieŭ stać mastakom, ale paźniej pad upłyvam svajakoŭ zaniaŭsia miasnym biznesam.

U 1914 hodzie Samuel zasnavaŭ kampaniju Hygrade, jakaja stała pijanieram u vytvorčaści pierapracavanaha i ŭpakavanaha miasa. Kampanija Słotkina stvaryła chot-dohi Ball Park Franks, jakija i siońnia zastajucca samymi pradavanymi ŭ ZŠA. Ź ciaham času Słotkin staŭ miljanieram, raskazvaŭ The New Yorker.

Samuel prybyŭ u ZŠA ŭ razhar masavaj jaŭrejskaj imihracyi z Uschodniaj Jeŭropy. Jak minimum siemiora ź jahonych vaśmi bratoŭ i siaścior taksama pierabralisia ŭ Amieryku, tam ža ŭ vyniku apynuŭsia i baćka Samuela. U 1924 hodzie Kanhres ZŠA pryniaŭ Zakon Džonsana-Ryda, jaki faktyčna zakryŭ krainu dla jaŭrejaŭ z Uschodniaj Jeŭropy. U vyniku bolšaść kojdanaŭskich chasidaŭ byli zabityja nacystami padčas Chałakostu.

Praŭnučku Samuela Elisu ciapier nazyvajuć uzychodziačaj zorkaj Demakratyčnaj partyi. Jana doŭha pracavała analitykam CRU, była pamočnicaj ministra abarony ŭ administracyi Baraka Abamy. U 2018 hodzie Słotkin była abranaja ŭ Pałatu pradstaŭnikoŭ, a letaś vyjhrała vybary ŭ Sienat — u 48 hadoŭ jana stała samaj maładoj žančynaj-demakratkaj u vierchniaj pałacie. Słotkin charaktaryzujuć jak umieranuju demakratku. U Pałacie pradstaŭnikoŭ u jaje była reputacyja centrystki, najbolš schilnaj da kampramisaŭ z respublikancami.

• 43
• 2
• 0
• 0
• 3
• 2
• 0
• 1