«U nas u horadzie niama takoha popytu, kab płacić takija padatki». Ipešniki razvažajuć, jak pracavać u novych umovach
Z pačatku hoda dla mnohich pradprymalnikaŭ admianili sproščanuju sistemu padatkaabkładańnia. Što ciapier robiać tyja, kaho zakranuli źmieny? IP raskazali, jakija varyjanty jany šukajuć, kab nie stracić u hrašach.
«Raschodaŭ jak takich u mianie niama, tamu padatak ličycca ad usioj vyručki»
Uładzimir siem hod jak zajmajecca mižnarodnaj łahistykaj. Z 2019-ha adkryŭ svajo IP. Da padatkovych źmien jon pracavaŭ pa sproščanaj sistemie i płaciŭ 5% padatku. Ciapier pierachodzić na ahulnuju sistemu z padatkam u 16%.
«Raschodaŭ jak takich u mianie niama: ja pracuju doma, z abstalavańnia kampjutar dy kresła. Tamu padatak budzie ličycca ad usioj vyručki», — kaža mužčyna.
Kab nie stracić u hrašach, jon budzie pavialičvać košt svaich pasłuh.
«Naprykład, ja viazu tavar za sto dalaraŭ, a klijent płacić 150. Z hetych 50 dalaraŭ mnie treba addać 16% padatku. Budu pavialičvać svoj profit. Adnak klijent istotna nie adčuje, ja pracuju z zamiežnikami», — tłumačyć Uładzimir.
Možna było b adkryć firmu i pracavać pa sproščanaj sistemie, ale pradprymalnik nie bačyć u hetym sensu.
«Vyvad hrošaj na kartku daviałosia b rabić praz dyvidenty, i ź ich taksama płacić 16% padachodnaha padatku».
«Budu pavyšać ceny»
Volha jak IP akazvaje buchhałtarskija pasłuhi. Pa jaje padlikach, padatki dla jaje vyrastuć u 2,6 raza.
«Heta kali vyličać raschody, a inakš rost byŭ by ŭ try razy. Mnie vyhadna ŭkazvać raschody jak 20% ad vyručki, biez paćviardžeńnia dakumientami», — kaža žančyna.
Jana ŭžo na piensii, ale niahledziačy na źmieny ŭ padatkach, zakryvacca nie płanuje.
«Piensija sami razumiejecie jakaja. Jašče jość zdaroŭje pracavać. Budu pavyšać ceny. Abmierkavali heta z klijentami jašče da Novaha hoda, kab jany razumieli, čaho čakać. Jany biezvychodna adreahavali, — uśmichajecca. — Buchhałtar im patrebny, dyj daŭno pracavali razam».
«Tut takaja pastka, što pieraafarmleńnie nie dapamoža»
«Tut takaja pastka, što pieraafarmleńnie nie dapamoža, — kaža jašče adzin pradprymalnik pra mahčymy vychad. — Adzin varyjant, kali ŭ canie pasłuhi šmat zatrat, to paznačać ich, ale tut patrebny tałkovy buchhałtar. Nu i skaračać bieznajaŭny raźlik i staracca pracavać za najaŭnyja».
Ihar akazvaje santechničnyja pasłuhi ŭ abłasnym horadzie. Naniać buchhałtara jamu budzie kaštavać ad 50 dalaraŭ u miesiac, u zaležnaści ad abjomu pracy.
«Jość pasłuhi, u jakich 50-60% — heta materyjały i padatki. Naprykład, ustalavać pralnuju mašynu kaštuje 80 rubloŭ, ale dla hetaha patrebny kran, šłanhi, pierachadniki. Heta niedzie 35 rubloŭ. Byvajuć pasłuhi, dzie tolki praca», — udajecca ŭ detali mužčyna.
Pradprymalnik taksama źbirajecca padymać ceny — i dla arhanizacyj, i dla fizasob.
«Mnohija znajomyja płanujuć zakryvacca abo pierachodzić na najaŭnyja raźliki. Ciapier IP mała čym adroźnivajecca ad mikrafirmy. Adzinaje, što da troch rabotnikaŭ abmiežavańnie.
Samaje kryŭdnaje, što jany pavyšajuć padatki i nie prapanoŭvajuć ničoha ŭzamien. U nas u horadzie niama takoha popytu i abarotu, kab płacić takija padatki nie pa sproščanaj sistemie», — dzielicca nabalełym Ihar.
«800 lišnich rubloŭ kožny miesiac treba addać na padatki»
Vasil z žonkaj handlujuć praduktami, trymajuć dźvie nievialikija kropki ŭ handlovym centry. Jany płaciać adziny padatak. Raniej heta było 137 rubloŭ na miesiac za kožnuju kropku. Z hetaha hoda staŭka istotna vyrasła — da 548 rubloŭ.
«Zarobak u apošni čas na dvaich składaŭ 2000-2500 rubloŭ. Ciapier ź ich jašče 800 lišnich kožny miesiac treba addać», — pryvodzić ličby pradprymalnik.
Mužčyna daŭno pracuje jak IP, kaža, raniej kali padatki pavyšali, heta było plus 5-10%. Taki skačok upieršyniu.
«Pasprabujem padniać krychu ceny, choć heta absalutna nie vyjście sa stanovišča, jany i tak rastuć u zakupačnym košcie. Dyj pakupnickaja zdolnaść narodu, možna skazać, nijakaja. Paru miesiacaŭ papracujem pa novych staŭkach, a što dalej — absalutna nie viedajem».
Čytajcie taksama:
Apublikavali abnoŭleny Padatkovy kodeks. Raskazvajem pra asnoŭnyja źmieny
Biełaruski paradoks. Navat šalony popyt na budaŭničyja materyjały nie dapamoh cemientnym zavodam vyjści na prybytkovaść?
Ciapier čytajuć
Hiryn, Bury i navat Knyrovič adreahavali na artykuł pra samuju modnuju paru biełaruskaj apazicyi28
Kamientary