Kali Amieryka zdradzić Ukrainie, śviet źmienicca niezvarotna

Pryznajusia, što navat u lutym 2022 ja nie byŭ u takoj tryvozie. Tady prynamsi była peŭnaść, što my, biełarusy i Ukraina, Centralnaja Jeŭropa, Jeŭropa, kali brać šyrej, usio ž «pad abaronaj NATA i ES». Što navat kali Zachad nie ŭmiešvajecca naŭprost i navat baicca davać Ukrainie zbroju, dastatkovuju dla pieramohi, to NATA, Zachad u vyniku svaim parasonam strymajuć Rasiju na niejkaj linii, što ich cisk urešcie pryviadzie da viartańnia da miru ŭ rehijonie.

A ciapier my zusim niečakana apynulisia ŭ realnaści, dzie zaŭtra moža nie stać NATA i ES.

Tramp chvalić Pucina, abvinavačvaje Zialenskaha ŭ raźviazvańni vajny. Nastupny krok, i jon užo bačny na haryzoncie, — spynieńnie Vašynhtonam dapamohi Ukrainie.

Havorka nie pra Afhanistan, dzie byŭ chaos i dzie za dva dziasiacihodździ Amieryka (pry dapamozie ŭsich sajuźnikaŭ) ničoha nie sumieła źmianić. Havorka pra krainu, jakaja mužna vytrymała ŭdar supierdziaržavy, nie razvaliłasia i narmalna funkcyjanuje.

Pakidańnie Ukrainy na raspravu Rasii, kali jano zdarycca, nielha budzie nazvać inakš jak betrayal — zdrada.

Što my nazirajem zaraz?

Pucin pastaviŭ umovaj pieramirja adychod Zialenskaha. I Tramp, faktyčna, padyhryvaje jamu.

A Zialenski, dziakujučy čyjoj asabistaj mužnaści Ukraina vystajała, admaŭlajecca sychodzić, bo heta pryniziła i demaralizavała b Ukrainu, paralizavała b supraciŭ i tamu što dla hetaha niama nijakich ni praŭnych, ni palityčnych padstaŭ.

Jeŭropa ŭ šoku: «Ach, jak niepryhoža! Jak tak možna!» — ale zaciahvaje z kankretnymi krokami. Bo akurat taki momant, što ŭ Niamieččynie niama kamu, vybary, a astatnim, mienšym, strašna ŭziać na siabie adkaznaść.

Nahadaju, što Maskva abiacaje «zachavańnie suvierenitetu i niezaležnaści Ukrainy» — pry ŭmovie pryznańnia joju novych miežaŭ pa linii adminhranic Chiersonskaj i Zaparožskaj abłaściej i advodzie vojskaŭ za hetuju liniju, absalutna nieabaronienuju ŭmacavańniami. Što, u svaju čarhu, aznačała b poŭnuju demaralizacyju ŭkrainskaha hramadstva i vychad vojskaŭ Rasii na pravy bierah Dniapra. Što amal napeŭna aznačaje, što rasijanie zmohuć nastupnym krokam, nieŭzabavie, inscenizavać prośby Adesy i Dniapra dałučycca da Rasii, kab kančatkova adrezać Ukrainu ad mora.

Alternatyva dla Ukrainy — praciahnuć supraciŭ biez dapamohi ZŠA, z dapamohaj tolki častki jeŭrapiejskich krain. Heta budzie ciažkaja bitva. Drama ŭ tym, što ŭ Jeŭropy niama dosyć sistem supraćpavietranaj abarony, jakija mahli b zamianić amierykanskija «Petryaty», niedastatkova sistem suviazi, mnoha čaho niedastatkova.

Čamu Tramp dziejničaje tak? Usie hadajuć.

Sam Tramp tłumačyć svaje dziejańni žadańniem spynić vajnu, pralićcio kryvi lubym koštam — faktyčna vychodzić koštam niezaležnaści i cełasnaści Ukrainy, a moža i ŭvohule isnavańnia hetaj dziaržavy.

Fiscal conservatives, prychilniki minimizacyi dziaržaŭnych vydatkaŭ ZŠA, prosta suprać luboj traty amierykanskich hrošaj. Mnohija trampisty ličać lubych sajuźnikaŭ abuzaj, na jakich Amieryka bolš tracić, čym vyjhraje. Maŭlaŭ, chto choča być pad abaronaj Amieryki, chaj płacić za heta — u hetaje rečyšča kładziecca i prapanavanaje Kijevu pahadnieńnie ab dostupie da nietraŭ. Heta kardynalna novy padychod: 80 apošnich hadoŭ zamiežnapalityčnaj fiłasofijaj Amieryki była apora na sietku sajuzaŭ i svabodny handal.

Inšaje tłumačeńnie: što Tramp vieryć, što zmoža pieraciahnuć na svoj bok Rasiju ŭ procistajańni z Kitajem.

Naprošvajecca i cyničnaje tłumačeńnie: addača Pucinu Ukrainy spravakuje, što kapitały i ludzi ź Jeŭropy paciakuć u ZŠA (bo kudy ž jašče?), a krainy Jeŭropy kinucca ŭ nohi da Trampa i pahodziacca na kabalnyja handlovyja ŭmovy, kab jon abaraniŭ choć ich.

Jakim by ni było tłumačeńnie, jakim by ni byŭ matyŭ, ale Zialenski, Ukraina, ukraincy, pry hetym akazvajucca zdradžanyja, a Rasii padorać pieramohu, jakoj jana tak i nie zdoleła zdabyć na poli boju.

Ukrainie abiacali padtrymku as long as it takes, stolki, kolki treba — niavažna, Bajden pieršy abiacaŭ, nie Bajden — prezident Amieryki abiacaŭ, a sam Tramp užo ŭ jakaści prezidenta toje paŭtaraŭ, značyć, Amieryka abiacała i zdradziła.

Jakija b raźliki, cyničnyja ci pamyłkovyja, ni stajali za hetym, kali hetaja zdrada zdarycca, heta źmienić śviet biespavarotna na doŭhija hady. Sistema adnosin, jakaja ŭźnikła paśla 1945 hoda, spynić isnavańnie. Ale moža być, heta ŭsio tonkaja hulnia ci Amieryka jašče spynicca za krok ad prorvy? Nichto nie viedaje.

* * *

Kali vam važnaja praca, jakuju robiać žurnalisty «Našaj Nivy», padtrymajcie nas, kali łaska, danatam praz «Patreon» ci lubuju inšuju płatformu abo praz redaktaraŭ i žurnalistaŭ, jakich vy viedajecie asabista.

Zbor praz Patreon biaśpiečny. Nichto nie bačyć, na što vy achviarujecie. Bačny tolki vaš płaciež na Patreon, a my atrymlivajem paśla hrošy ad hetaj płatformy.

Kab pačać padtrymlivać nas praz Patreon — pierachodźcie pa spasyłcy. 

Taksama vy možacie padtrymać nas praz PayPal abo praz Buy Me a Coffee. 

Siarod inšaha vy možacie zrabić danat u kryptavalucie:

TMMGVZZ9BNxKmK1pT82Zd1trxvhQZeEwYe (USDT Tron)

• 24
• 2
• 2
• 8
• 9
• 5
• 9
• 0