Siły biaśpieki Pakistana vyzvalili nie mienš za 155 pasažyraŭ zachoplenaha bajevikami ciahnika, kala 30 ekstremistaŭ źniščany. Pra heta paviedamlaje telekanał Geo TV sa spasyłkaj na krynicy ŭ siłavych strukturach.
Siłaviki praciahvajuć apieracyju pa vyzvaleńni astatnich pasažyraŭ, jakich na momant napadu mahło być kala 450 čałaviek. Dakładnaja kolkaść ekstremistaŭ nieviadomaja. Taksama paviedamlajecca, što 17 vyzvalenych zakładnikaŭ byli špitalizavanyja dla akazańnia nieadkładnaj miedycynskaj dapamohi. Charaktar ich traŭmaŭ nie ŭdakładniajecca.
Pa danych telekanała, napadniki adciahnuli ciahnik u addaleny rehijon na miažy z Afhanistanam i Iranam. Paśla pačatku śpiecapieracyi pa vyzvaleńni zakładnikaŭ bajeviki raźbilisia na drobnyja hrupy. Krynicy Geo TV śćviardžajuć, što ekstremisty vykarystoŭvajuć spadarožnikavyja telefony i padtrymlivajuć suviaź ź mierkavanymi arhanizatarami napadu, jakija znachodziacca ŭ Afhanistanie. Apieracyja ŭskładniajecca tym, što bajeviki vykarystoŭvajuć zakładnikaŭ jak žyvy ščyt.
U aŭtorak bajeviki ekstremisckaj hrupoŭki «Vyzvalenčaja armija Biełudžystana» zachapili 450 pasažyraŭ ciahnika ŭ Pakistanie, jaki śledavaŭ z horada Kvieta (administracyjny centr pravincyi Biełudžystan) u Piešavar (administracyjny centr pravincyi Chajbier-Pachtunchva).
Ekstremisty padarvali čyhunačnyja šlachi, a zatym adkryli ahoń pa ciahniku. Mašynist byŭ paranieny. Padčas napadu adbyłasia pierastrełka pamiž supracoŭnikami słužby biaśpieki ciahnika i bajevikami.
Kamientary