Papularny polski bank uvioŭ jašče adno abmiežavańnie dla biełarusaŭ
Polski bank Santander spyniŭ vydaču ipatečnych kredytaŭ biełarusam biez DNŽ. Pra heta paviedamlajuć ryełtary, taksama hetuju infarmacyju paćvierdzili na infalinii banka, kudy žurnalist Most patelefanavaŭ jak hramadzianin Biełarusi, zacikaŭleny ŭ atrymańni kredytu na žyllo.
Pa novych praviłach, kab atrymać kredyt u banku, hramadzianin Biełarusi pavinien vałodać kartaj pobytu, jakaja budzie sapraŭdnaja nie mienš jak 12 miesiacaŭ z momantu padačy dakumientaŭ. Naprykład, pry padačy zajavy na kredyt 6 červienia 2024 hoda termin dziejańnia karty pobytu pavinien zakančvacca nie raniej za 6 červienia 2025 hoda, rastłumačyli ŭ banku.
Ryełtar Dzianis Jaromienka ŭ tyktoku pryvioŭ jašče adnu katehoryju asob, u jakich mahu ŭźniknuć prablemy z atrymańniem ipatečnaha kredytu ŭ Santander, — heta hramadzianie Biełarusi, jakija naradzilisia ŭ Rasii.
Patrabavańnie DNŽ dla atrymańnia ipateki zjaŭlajecca ŭniviersalnym praktyčna va ŭsich polskich bankach, da hetaha času Santander zjaŭlaŭsia vyklučeńniem. Raniej bank zadavalniaŭ zajaŭki biełarusaŭ, jakija znachodzilisia ŭ Polščy pa vizie ci pa «štampie ŭ pašparcie» — heta značyć, kali termin dziejańnia vizy ci inšaha dakumienta, jaki lehalizuje znachodžańnie ŭ Polščy, skončyŭsia, ale hramadzianin Biełarusi paśpieŭ padać zajavu na DNŽ u Polščy i čakaŭ rašeńnia.
Dzianis Jaromienka rekamiendavaŭ biełarusam pierad padačaj dakumientaŭ na ipatečny kredyt pasprabavać adkryć valutny rachunak u lubym banku. Jon rastłumačyŭ heta tym, što praces adkryćcia rachunku ŭklučaje pravierku z boku ŭnutranaj biaśpieki banka. Tamu kali rachunak budzie adkryty, to i šancy na adabreńnie ipatečnaha kredytu značna ŭzrastajuć.
Jakija jašče abmiežavańni ŭvioŭ bank
Kartu pobytu, sapraŭdnuju na 12 miesiacaŭ napierad, bank ciapier patrabuje ŭ hramadzian Biełarusi i pry adkryćci rachunkaŭ. A mnohim biełarusam, jakija adkryli rachunki pa starych praviłach, nie majučy karty pobytu, bank zabłakavaŭ dostup da internet-bankinhu i mabilnaha dadatku. Taksama šmat u kaho nie prachodzili płaciažy praz BLIK.
Tym, chto patrapiŭ pad błakiroŭku, ale padaŭ u bank DNŽ, dostup viarnuli. A tym, chto tak i nie atrymaŭ dakumient, davodzicca asabista ŭ adździaleńni banka vykonvać apieracyi, jakija raniej byli dastupny ŭ interniet-bankinhu. Apieracyi pa kartach, u tym liku pry pry dapamozie Apple Pay, Google Pay ci Samsung Pay, im pa-raniejšamu dastupnyja.
Ciapier čytajuć
Pajšoŭ z žyćcia 32-hadovy Maksim Čarniaŭski — zasnavalnik supołki «Nadakučyŭ nam hety Łukašenka» pačatku 2010-ch15
Kamientary
Santander – bank španski!
A papularny jon pa ŭsim śviecie!