«Гэта БНФаўцы, і я іх ненавіджу!» На судзе над Аўтуховічам ваўкавыскі міліцыянт расказаў пра маральную ізаляцыю сваёй сям'і пасля ўдзелу ў рэпрэсіях
У гродзенскай турме працягваюць судзіць Мікалая Аўтуховіча і яго дзясяцярых «паплечнікаў». На гэтым тыдні дапытвалі пацярпелых — інспектара міліцыі і амапаўца. Міліцыянт з Ваўкавыска Віктар Лутчанка паскардзіўся: пагрозы ён атрымліваў і да падпалу маёмасці, і пасля таго. Пагражалі ўсёй сям’і, тэлефанавалі яго бацькам і казалі, што «ваш сын памёр». А калі згарэў дом і машына, яго жонцы на працы казалі: так табе і трэба!
Часам пацярпелыя блытаюцца ў паказаннях. У такіх выпадках на дапамогу прыходзяць пракуроры і зачытваюць мінулыя паказанні пацярпелых.
Адзін з пацярпелых — міліцыянт з Ваўкавыска Віктар Лутчанка, якому спалілі недабудаваны дом і аўтамабіль.
Спачатку ён патрабаваў 19 тысяч рублёў кампенсацыі, цяпер хоча больш за 44 тысячы плюс грошы за маральную шкоду (яшчэ 15 тысяч рублёў). Тлумачыць апошняе тым, што стаў «злы і нервовы».
Цікава, што спачатку ў падпале машыны міліцыянта падазравалі выпадковага хлопца, які здымаў на тэлефон, як гарыць машына.
У 2020 годзе гэты хлопец прыцягваўся па адміністрацыйных артыкулах, «сведкам» быў сённяшні пацярпелы Лутчанка. Міліцыянт расказаў, што больш за 40 разоў быў сведкам па такіх справах: «здымаў усё на відэа», пасля паказваў запісы ў судзе.
І аднойчы пасля суда нейкі хлопец сказаў сілавіку: яшчэ ўбачымся!
А ў вечар, калі гарэла машына, непадалёк аказаўся якраз той самы хлопец, стаяў з тэлефонам у руках. Гэтым разам ён таксама не змаўчаў, паведаміўшы міліцыянту: гэта табе карма! Лутчанка адразу падумаў — гэты і падпаліў! Але ж цягам следства высветлілася, што хлопец аказаўся на месцы злачынства выпадкова.
І спачатку пацярпелы лічыў, што машына загарэлася сама — у старых «Аўдзі» бываюць праблемы з печкай. Пра падпал ён даведаўся ад калег-сілавікоў пазней, калі яго выклікалі на допыт.
Лутчанка паскардзіўся: пагрозы ён атрымліваў і да падпалу маёмасці, і пасля таго. Пагражалі ўсёй сям’і, тэлефанавалі яго бацькам і казалі, што «ваш сын памёр». А калі згарэў дом і машына, яго жонцы на працы казалі: так табе і трэба!
Таксама Лутчанка выказаўся, што «банда Аўтуховіча» — гэта «бэнээфаўцы, і ён іх ненавідзіць».
Але ўсе пакуты не прайшлі для міліцыянта дарма: ён расказаў, што нядаўна яго павысілі, нават далі персанальнае аўто.
Вольга Маёрава не сцярпела і выказалася: хачу сказаць гэтаму чалавеку — зменіцца ўлада і ўсё будзе зусім інакш!
Грамадзянскі пазоў аб кампенсацыі матэрыяльнай і маральнай шкоды Лутчанку быў выстаўлены ўсім абвінавачаным. З пазовам не пагадзіўся ніхто, акрамя Паўла Савы.
«Менавіта Павел Сава падчас папярэдняга следства даў паказанні, у якіх прызнаўся ў здзяйсненні падпалаў маёмасці пацярпелага Віктара Лутчанкі, падрабязна распавёўшы пра тое, як і з кім яны планаваліся і здзяйсняліся», — пісала «СБ».
Яшчэ адзін пацярпелы — амапавец Алег Сядач. Яго машыну падпалілі ў Гродна. Ён спачатку хацеў 10 тысяч рублёў матэрыяльнай кампенсацыі, праўда, калі даведаўся, што эксперты налічылі шкоды на 4,4 тысячы, то пагадзіўся і з такой лічбай. Маральную шкоду амапавец ацаніў у 20 тысяч: маўляў, гэта банда, хай усе яму заплацяць.
Абвінавачаныя ў сваю чаргу працягвалі скардзіцца на ўмовы ўтрымання. Галіна Дзербыш казала, што ў турэмнай ежы знаходзіць пацучыную поўсць. Яна лічыць гэта ціскам праз яе адмову ўзводзіць паклёп на іншых абвінавачаных. Суддзя на гэта адказаў: такія прэтэнзіі не да яго, а да начальства турмы.
Чытайце па тэме:
«Мы выйдзем шчыльнымі радамі». Падрабязнасці таго, што адбываецца на працэсе Аўтуховіча, уражваюць і вымушаюць задумацца
Падумаў, што гарыць яго машына, і пабег так хутка, што парваў сухажылле. Дзіўны пацярпелы па справе Аўтуховіча
Цяпер чытаюць
Лойка пра будучага пераемніка Лукашэнкі: Адчуваецца, што дзядуля рыхтуецца, прыкідвае і глядзіць варыянты10
Каментары