Iłan Mask padzialiŭsia płanami zapuścić da Čyrvonaj płaniety bieśpiłotnuju viersiju kaśmičnaha karabla abo navat niekalkich užo ŭ kancy 2026 hoda, kali adkryjecca startavaje akno dla palotaŭ da Marsa.
Hetaj infarmacyjaj pradprymalnik padzialiŭsia ŭ intervju televiadučamu Džo Rohanu, pieradaje vydańnie Naked Science. Akramia taho, Mask raspavioŭ pra klučavyja napramki raspracovak u kampanii i svajo bačańnie dalejšaha zasvajeńnia Čyrvonaj płaniety.
Kiraŭnik SpaceX adznačyŭ, što startavaje akno dla zapusku da Marsa adkryvajecca raz na 26 miesiacaŭ, a nastupnaje čakajecca ŭ listapadzie-śniežni 2026 hoda. Pavodle bazavych płanaŭ, u hetym aknie Starship pavinien adpravicca na Čyrvonuju płanietu, i, pa mahčymaści, nie adzin. Hałoŭnaja meta misii — vyprabavać sistemu pasadki na Mars. Adnak Mask padkreśliŭ, što heta nadzvyčaj składanaja zadača, tamu harantavać jaje vykanańnie ŭžo ŭ 2026 hodzie davoli ciažka.
Heta vielmi niaprosty etap, bo pasadka na Mars pryncypova adroźnivajecca ad viartańnia Starship na Ziamlu, dzie karabiel tarmozić u ščylnaj atmaśfiery «brucham», a taksama ad pasadki na Miesiac, dzie niama atmaśfiery i, adpaviedna, uździejańnia jaje turbulentnaści. Marsijanskaja hazavaja abałonka ŭ 160 razoŭ mienš ščylnaja za ziamnuju, što ŭskładniaje tarmažeńnie, ale, razam z tym, nie dazvalaje razhladać čysta «vakuumnuju» pasadku.
Mask padkreśliŭ, što zapusk niekalkich karabloŭ važny dla taho, kab acanić biaśpieku apošniaha etapu palotu da Marsa. Važna zrazumieć, ci zmohuć usie aparaty pryziamlicca biezdakorna abo ŭźniknuć zboi. U apošnim vypadku treba budzie vyznačyć, jakija elemienty pracesu pasadki patrabujuć dapracoŭki.
Pradprymalnik taksama papiaredziŭ, što času na stvareńnie samadastatkovaj kałonii na Marsie nie tak užo i šmat — kala 15 nastupnych «akon» dla palotaŭ tudy (390 miesiacaŭ, pryblizna treć stahodździa). Na jaho dumku, pytańnie treba vyrašać terminova, bo isnuje ryzyka hibieli sučasnaj cyvilizacyi z-za roznych pahroz, uklučajučy jadziernuju vajnu.
Siarod mahčymych pahroz Mask zhadaŭ i demahrafičnyja prablemy. Jon adznačyŭ, što pry značnym skaračeńni nasielnictva technałahičny ŭzrovień Ziamli moža apuścicca nižej za toj, jaki nieabchodny dla adpraŭki karabloŭ na Mars.
«Cyvilizacyja prosta «pamre ŭ darosłych padhuźnikach»», — dadaŭ miljarder.
Jon nahadaŭ, što pry ciapierašnim uzroŭni naradžalnaści Paŭdniovaja Kareja stracić 96% svajho nasielnictva ŭsiaho praz try pakaleńni, i padobny los moža čakać mnohija krainy.
«Demahrafičny kałaps nastupaje chutka <…> i, zdajecca, paskarajecca ŭ mnohich častkach śvietu», — padsumavaŭ biznesmien.
Mask koratka paŭtaryŭ svoj płan asvajeńnia Čyrvonaj płaniety: dastaŭka tudy miljona ton abstalavańnia ź Ziamli i miljona čałaviek. Pakolki terafarmavańnie zojmie šmat času, pieršyja pasialency buduć žyć u kupałach abo padziemnych schoviščach.
Adnak u jaho słovach źjavilisia i novyja detali. Kali raniej Mask śćviardžaŭ, što palacieć da Marsa možna za try miesiacy, to ciapier jon havoryć užo pra šeść miesiacaŭ. Vierahodna, SpaceX vyrašyła pierajści da bolš ekanamičnych pa paliŭnych vydatkach, ale bolš praciahłych schiem palotu da čaćviortaj płaniety.
Taksama pradprymalnik paviedamiŭ, što ŭ 2025 hodzie kampanija, chutčej za ŭsio, upieršyniu pasadzić karabiel Starship na startavuju viežu. Kali ŭsio pojdzie pa płanie, možna budzie navat vykanać paŭtorny zapusk u kosmas. Praŭda, na pieršych etapach paśla pasadki karablu moža spatrebicca značny čas na ahlad i drobny ramont. Pry hetym paŭtornaje vykarystańnie pieršaj stupieni stanie mahčymym značna raniej — zadoŭha da kanca 2025 hoda.
Mask padkreśliŭ, što davodka Starship usio jašče dalokaja ad zaviaršeńnia. Samym składanym elemientam jon nazvaŭ ciepłavy ščyt. U adroźnieńnie ad ciepłavych plitak šatłaŭ NASA, šaścikutnyja plitki Starship vyrableny z adnolkavaha materyjału — sumiesi šklanych vałoknaŭ i sintetyčnaha sapfiru (aksidu aluminiju), raźmieščanych u peŭnym paradku. Heta faktar źjaŭlajecca pieravahaj ščyta Starship nad vuhlarod-vuhlarodnymi plitkami šatłaŭ, jakija vykarystoŭvalisia na najbolš nahružanych učastkach (naprykład, na krai kryła) i mahli raskołvacca ad udaraŭ izalacyjnaj pieny — mienavita heta pryviało da hibieli adnaho z šatłaŭ i siami kasmanaŭtaŭ na jaho borcie.
Tym nie mienš, SpaceX jašče pracuje nad hieamietryjaj vałoknaŭ, ich praporcyjami i pakryćciom plitak. Adnak, jak zajaviŭ Mask, kali jašče niadaŭna jon sumniavaŭsia, ci atrymajecca vyrašyć usie hetyja prablemy, to ciapier u hetym upeŭnieny.
«Naša Niva» — bastyjon biełaruščyny
PADTRYMAĆ
Kamientary