Амерыканскі інстытут вывучэння вайны (ISW) у чарговай зводцы адзначае, што расійскія ўзброеныя фармаванні, узяўшы Бахмут, апынуліся там у небяспечным становішчы — але расійская прапаганда і вайсковыя блогеры амаль не распавядаюць пра гэта, а святкуюць перамогу.
Апісаўшы спрэчкі расіян пра тое, каго і як трэба ўзнагароджваць за ўзяцце Бахмута, аналітыкі ISW нагадваюць аб фактычным становішчы спраў, як яно ім бачыцца.
«Перабольшаная ўвага да заяваў аб перамозе ў Бахмуце адцягвае ўвагу ад таго хісткага становішча, у якім аказаліся расійскія вайскоўцы ў Бахмуце і вакол яго […] Расійскія вайскоўцы ў Бахмуце знаходзяцца ва ўразлівым становішчы асабліва таму, што іх наступ у гэтым раёне, хутчэй за ўсё, выдыхся, а гэта дае ўкраінскай арміі магчымасць для новых контратак на ўжо аслабленыя флангі ля Бахмута», — піша ISW.
Дадатковую рызыку, з пункту гледжання ISW, прадстаўляе і абвешчаны заснавальнікам ПВК «Вагнер» Яўгенам Прыгожыным вывад яго частак з Бахмута ў тыл на працягу некалькіх дзён.
Міністэрству абароны Расіі ў выпадку сыходу «вагнераўцаў», магчыма, прыйдзецца затыкаць гэты ўчастак дрэнна навучанымі і экіпаванымі звычайнымі часткамі — такімі ж, якія толькі што, у маі, адступалі на флангах на поўнач і поўдзень ад горада.
Пры гэтым у расійскай інфармацыйнай прасторы гэтая небяспека ў асноўным ігнаруецца, піша Бі-бі-сі.
У сваю чаргу, амерыканская газета New York Times, пераказваючы меркаванні вайсковых экспэртаў аб узяцці расіянамі Бахмута, называе яго «піравай перамогай», якая ніяк не наблізіць расійскую армію да заяўленай мэты — захопу ўсёй тэрыторыі Данецкай вобласці.
«Калі адкінуць палітыку і сімвалічнае значэнне ўзяцця Бахмута, эксперты кажуць, Масква наўрад ці зможа канвертаваць заваёву разгромленага горада ў далейшае прасоўванне да канчатковай мэты спадара Пуціна — захопу ўсяго Данбаса», — піша NYT.
«Горад […] уяўляе сабой у асноўным груду руін, без электрычнасці, вады і ўсяго іншага, што трэба для акупацыйных частак, і не можа служыць базай для далейшага наступу на ўкраінскую тэрыторыю. Украінская армія адступіла на значна больш зручныя абарончыя лініі на вышынях за горадам», — адзначаюць аўтары газеты.
Акрамя таго, следам за ваеннымі экспертамі NYT адзначае, што расіяне панеслі ў шматмесячным штурме Бахмута сур'ёзныя страты — хоць памер дакладна не вядомы.
Страты былі з абодвух бакоў, і да ўкраінскага камандавання, як нагадвае газета, таксама ёсць шмат пытанняў — і ўнутры краіны, і ў заходніх ваенных экспертаў: ці варта было губляць столькі салдат у вулічных баях, марнаваць столькі боепрыпасаў, замест таго, каб адысці на больш зручныя лініі абароны.
Цяпер чытаюць
Стала вядома пра смерць 41-гадовага былога палітвязня з Гродна Аляксея Аўсюкевіча7
Каментары