Песні ананімнай спявачкі Клаўдзіі Пятроўны ва Украіне сярод лідараў праслухоўванняў. А што вядома пра яе асобу?
У чым феномен і хто на самой справе выканаўца Klavdia Petrivna?
Ва Украіне расце папулярнасць спявачкі, аўтаркі песень і музыкі, якая выступае пад псеўданімам Klavdia Petrivna і не паказвае свой твар публіцы.
Яна хутка набрала папулярнасць у TikTok, а яе трэкі збіраюць мільёны праслухоўванняў на YouTube і стрымінгавых сэрвісах. На пачатак 2024 года Klavdia Petrivna ўзначаліла чарты ўкраінскіх радыёстанцый з песняй «Знайдзі мяне».
Значным складнікам увагі да спявачкі з'яўляецца ананімнасць. Да гэтага часу яна не паказала свайго твару. Падрабязнасці аб яе творчасці і біяграфіі застаюцца загадкай для шырокай публікі. Гэта параджае розныя тэорыі адносна яе сапраўднага імя і асобы.
Некаторыя крыніцы выказваюць меркаванне, што за псеўданімам можа хавацца жанчына ва ўзросце 35-40 гадоў, іншыя лічаць, што гэта можа быць маладая дзяўчына. Існуе тэорыя, што Klavdia Petrivna — спецыяльны праект, голас якога створаны з дапамогай нейрасеткі.
Каманда спявачкі садзейнічае дыскусіі аб асобе артысткі, выкарыстоўвае неадназначны тэкст у апісаннях пад яе афіцыйнымі відэа і на старонках у сацыяльных сетках.
Дакладна вядома толькі тое, што спявачка 4 ліпеня 2023 года апублікавала ў тыктоку відэа са сваімі дэма-версіямі песняў. А праз месяц, 3 жніўня, у сваім асабістым канале ў тэлеграме — дэмаальбом, які складаўся з 7 песняў, якія былі запісаны з дапамогай дадатку для iPhone для запісу музыкі GarageBand.
Выканаўца хутка атрымала папулярнасць, а радок з яе песні «Я шчаслівая» — «Доктар гаворыць, што гэта дэпрэсія, мама гаворыць, што я лянівая» — працытавала Алена Зяленская падчас Трэцяга саміту першых лэдзі і джэнтльменаў, калі гаварыла пра важнасць ментальнага здароўя.
Восенню мінулага года спявачка падпісала кантракт з маладым украінскім лэйблам NEBO Music. А праз некаторы час дырэктарка лэйбла ў адным з інтэрв'ю расказала, што Klavdia Petrivna — гэта маладая дзяўчына, якая яшчэ вучыцца ў музычным каледжы.
Сцвярджаецца, што спявачку і лэйбл звёў яе сябар — папулярны ўкраінскі выканаўца OSTY. Сумесна яны выпусцілі некалькі трэкаў.
Як адзначае СЕО лэйбла Кацярына Шаўчэнка ў адным з інтэрв'ю, у песнях выканаўцы прадстаўлены вобраз тыповай жанчыны, настрой якой мяняецца да 35 разоў на дзень. Яна можа падавацца інфантыльнай, але ў той жа час паказвае, што здольная натхняць і матываваць мужчыну.
На сёння самай папулярнай песняй Klavdia Petrivna з'яўляецца «Знайдзі мяне» з 16 мільёнамі праглядаў. На другім месцы з 10 мільёнамі — «Я шчаслівая».
Знакамітасць упершыню з'явілася на публіцы ў красавіку падчас вялікага сольнага канцэрта ўкраінскага выканаўцы Арцёма Піваварава, з якім спявачка да гэтага запісала кліп на песню «Барабан». Але на сцэне яна была ў доўгай чырвонай накідцы, якая цалкам схавалі яе твар і цела. А на галаве быў чорны плецены капялюш.
Спявачка працягвае захоўваць ананімнасць, а слухачы спрачацца, кім яна насамрэч з'яўляецца, і чакаць, калі ж нарэшце выканаўца пакажа сваё аблічча.
Каментары
Патрыярхат вайшоў ў чат 🤢🤢