U Minsku źjaviŭsia samy karotki aŭtobusny maršrut

Jašče minułym letam transpartnyja arhanizacyi zadumali, jak lepš pierarabić sietku naziemnych maršrutaŭ u suviazi z płanavanym adkryćciom novych stancyj (tady jašče ličyłasia, što adkryć mietro mohuć paśpieć da 3 lipienia ci, prynamsi, da 7 listapada, choć, jak viadoma, adkryćcio adbyłosia tolki ŭ kancy śniežnia).

Z tych časoŭ transpartniki niekalki razoŭ mianiali płany, pierarablali, palapšali, prysłuchoŭvalisia da vodhukaŭ. I pačynajučy z 2025 hoda pačali ŭvodzić źmieny. Nie ŭsie adrazu, a dazavana: spačatku paru maršrutaŭ, potym jašče paru. Realnaść, darečy, dzie-nidzie ŭsio adno trochi adroźnivajecca navat ad ćviorda zaćvierdžanych płanaŭ.

Čarhovaja porcyja źmienaŭ padaśpieła akurat u pieršy dzień viasny: pamianialisia maršruty z 1 sakavika, a niekatorych — z 3 sakavika.

Adna ź cikavych źmien — transfarmacyja aŭtobusnaha maršrutu №45. Da hetaha času jon chadziŭ pa takim maršrucie «Dyśpietčarskaja stancyja Družnaja — Minskrybpram». Heta značyć, jon pierasiakaŭ praktyčna pałovu horada.

Pavialičyć

Ciapier ža jaho skaracili i pieraviali na inšuju dyśpietčarskuju: «Kurasoŭščyna». Što pryviało da taho, što hety maršrut staŭ adnym z samych karotkich u Minsku i samym karotkim siarod tych, što nie vyjazdžajuć za miežy MKAD.

Jakija maršruty aŭtobusaŭ u Minsku naohuł samyja karotkija? Jany choć i źjaŭlajucca nibyta hramadskim transpartam, ale ŭsio ž transpartam trochi śpiecyfičnym.

Naprykład, aŭtobus №197 maje taki maršrut: «Stancyja mietro Mahiloŭskaja — elektradepo Mahiloŭskaje». Pramiežkavych prypynkaŭ niama. Praciahłaść maršrutu ŭ bok depo — 1,78 km, u bok stancyi mietro — 3 km (tamu što treba razvaročvacca pad kalcavoj na praciahu vulicy Bajkalskaj). U darozie — 4 chviliny. U dzień vykonvajecca ŭsiaho pa 6 rejsaŭ: try ranicaj i try ŭviečary.

Aŭtobus, zrazumieła, patrebien dla padvozu rabotnikaŭ depo mietrapalitena, choć na im nie zabaraniajecca prajazdžać i inšym pasažyram. Ale pry takoj častacie i takoj vuzkaj śpiecyjalizacyi nazvać jaho paŭnavartasnym hramadskim transpartam ciažka.

Pavialičyć

Jość jašče aŭtobus №142: «Malinaŭka-4 — Pramvuzieł Zachodni». U jaho dva pramiežkavyja prypynki. Praciahłaść maršrutu — 3,1 km u abodva baki. U darozie — 7 chvilin. U dzień vykonvajecca 26 rejsaŭ. Aŭtobusam možna padjechać i da handlovych centraŭ, raźmieščanych za MKAD u rajonie CEC-4, ale ŭsio ž jon «zatočany» na padvoz rabotnikaŭ pramzony.

Pavialičyć

Aŭtobus №157 idzie ad dyśpietčarskaj stancyi «Karbyšava» ŭ dziŭny były vajskovy haradok na vulicy Manieviča za MKADam. Daŭžynia maršrutu — 4,1 km, u dzień vykonvajecca ŭsiaho 2 (dva) rejsy. U darozie — 14 chvilin.

Pavialičyć

Možna jašče zhadać aŭtobusy №153 i №153d «Tankavaja — Uručča» (3,7—3,9 km), №135 «Uručča-4 — Novaja Baravaja» (5,4 km) i niekatoryja inšyja maršruty. Ale ŭsie jany sastupajuć abnoŭlena-źmienienamu aŭtobusu №45.

Ciapier maršrut №45 skaraciŭsia ŭ razy i ciahniecca ŭsiaho na 2,9 kiłamietra. U jaho piać pramiežkavych prypynkaŭ, pryčym jon prachodzić praz stancyju mietro «Słucki Haściniec». U darozie — 10 chvilin. Z pałovy siomaj ranicy da pałovy dvanaccataj nočy vykonvajecca 29 rejsaŭ — i pry hetym z 10-j da 15-j hadziny «dzirka».

Heta značyć, u astatni čas ščylnaść rejsaŭ dobraja, heta paŭnavartasny hramadski transpart nie tolki dla zavadčan, ale i naohuł dla ŭsich minčukoŭ. Viadoma, usim niama patreby jeździć u pramzonu na vulicu Ściebianiova, ale prynamsi ad najbližejšych damoŭ, zavoda abo liceja možna padskočyć prypynak-druhi da mietro.

Pavialičyć

• 3
• 0
• 1
• 0
• 1
• 0
• 0
• 0