«Farsiravać Dniapro luboj canoj». Rasija sprabuje pierajści raku pad Chiersonam

Pry hetym u kancy lutaha Z-kanały paviedamlali pra padrychtoŭku 18-j ahulnavajskovaj armii da farsiravańnia Dniapra i zachopu Chiersona «čaho b heta ni kaštavała», źviartaje ŭvahu telehram-kanał «Ahientstvo».

Rasijskija vajskoŭcy, pa słovach Alaksandra Prakudzina, sprabavali pierasiačy raku ŭ čatyroch miescach: praz bahnistyja vyspy ŭ vuści Dniapra, jakija znachodziacca ŭ šeraj zonie; pa Antonaŭskim aŭtamabilnym i čyhunačnym mastach na ŭschod ad Chiersona; u siołach Lvova i Źmijeŭka.

Sproby pierapravicca praz Dniapro rasijskija vajskoŭcy robiać kožny dzień, skazaŭ Prakudzin. Čynoŭnik paviedamiŭ sa spasyłkaj na ŭkrainskuju raźviedku, što «namieśnik kamandujučaha rasijskimi vojskami ŭ hetym rajonie pastaviŭ zadaču farsiravać raku luboj canoj».

Na dumku ŭkrainskaha čynoŭnika, rasijskaje kamandavańnie raźličvaje zachapić siało na pravym bierazie Dniapra, kab vykarystoŭvać heta padčas mirnych pieramoŭ. Rasija «sprabuje pastavić ptušačku», kab zaśviedčyć svaju prysutnaść na pravym bierazie na padstavie hetaha vystaŭlać pretenzii na ŭvieś rehijon, skazaŭ staršynia abłasnoj administracyi.

Rasijskija padraździaleńni niasuć «vialikija straty» zabitymi i paranienymi, sprabujučy pierajści praz raku, skazaŭ Prakudzin. Ź jahonych słoŭ, ukrainskaja raźviedka paviedamiła, što rasijskija vajskoŭcy «całkam razumiejuć, što heta samahubčaja misija», i nie ŭsie «hatovyja ŭ hetym udzielničać». Siarod zahinułych rasijan byli jak navabrancy, tak i vajskoŭcy, jakija ŭdzielničajuć va ŭvarvańni va Ukrainu bolš za dva hady, paviedamiŭ Prakudzin sa spasyłkaj na dakumienty rasijan.

Pra toje, što «18-ja ahulnavajskovaja armija rychtujecca luboj canoj farsiravać Dniapro i vyzvalać Chierson», 21 lutaha pisaŭ Z-kanał «Dva majora». Na nastupny dzień jon pierapościŭ apublikavanaje inšym rasijskim pravajennym kanałam «ProsViet « videa pieramiaščeńnia vajskovaj techniki pad Chiersonam. «Dva majora» paviedamili, što «kali ŭsio ž apieracyju ŭdasca pravieści, heta budzie adnym z samych składanych etapaŭ vajny».

Pry hetym inšy Z-kanał «Pozyvnoj OSETIN» adreahavaŭ na paviedamleńni ab padrychtoŭcy apieracyi pastom, u jakim napisaŭ pra niedachop łodak i patencyjnyja straty «dziasiatkaŭ» ludziej pad udarami bieśpiłotnikaŭ.

U niadzielu «Dva majora» ŭ zvodcy paviedamili pra «dziejańni ŭ astraŭnoj zonie pojmy raki Dniapro i ŭzajemnyja ŭdary bakoŭ».

Z kanca minułaha leta Rasija rezka ŭzmacniła abstreły Chiersona, u vyniku jakich tolki za čatyry miesiacy, pačynajučy sa žniŭnia, zahinuli nie mienš za 37 mirnych žycharoŭ, jašče 494 byli paranienyja. Ukrainskija ŭłady nazyvali hetyja abstreły častkaj płana Maskvy pa farsiravańni Dniapra i zachopu Chiersona, jaki USU viarnuli pad svoj kantrol vosieńniu 2022 hoda.

U śniežni rasijskija i ŭkrainskija vajskovyja krynicy ŭžo paviedamlali pra abmiežavanyja sproby rasijskich dyviersijnych hrup pierapravicca praz Dniapro pad Chiersonam.

• 2
• 2
• 2
• 3
• 5
• 1
• 18
• 0