Bolšaść ludziej ličać myła takim ža abaviazkovym elemientam hihijeny, jak i vadu. Adnak dermatołahi hladziać na heta inakš. Myła jany prapanujuć pakinuć tolki dla myćcia ruk.
Kožny dzień my sutykajemsia z brudam, bakteryjami i potam, a duš z myłam zdajecca prostym sposabam ačyścicca. Adnak, jak piša Time, dermatołahi nie źjaŭlajucca prychilnikami myła.
Čym niebiaśpiečna myła?
Myła moža niehatyŭna ŭździejničać na skuru pa niekalkich pryčynach. Jak adznačajuć ekśpierty, jano stvarajecca z tłuščaŭ abo alejaŭ, źmiašanych z hidraksidam natryju (ćviordaje myła) abo hidraksidam kaliju (vadkaje myła). Hetyja rečyvy efiektyŭna vydalajuć brud, ale zanadta ahresiŭnyja, bo rujnujuć lipidy, jakija ŭtrymlivajuć vilhać u skury.
Myła parušaje achoŭny barjer skury. Daśledavańni pakazali, što čym čaściej čałaviek myjecca z myłam, tym bolš paškodžvajecca jaho skura. Heta pryvodzić da jaje suchaści, bolšaj adčuvalnaści i pavyšaje ryzyku infiekcyj.
Myła źmianiaje kisłotna-ščołačny bałans skury. Skura pa pryrodzie maje kiślejšy pH, čym myła. Kali parušajecca bałans, achoŭnyja funkcyi skury słabiejuć. Asabliva škodnaje drenna zmytaje myła — reštki praciahvajuć niehatyŭna ŭździejničać na pH.
Pa słovach ekśpiertaŭ, myła zabivaje nie tolki škodnyja, ale i karysnyja bakteryi. Choć ideja «čystaj» skury hučyć pryvabna, mnohija bakteryi žyćciova važnyja dla jaje zdaroŭja.
Myła źmiaščaje aramatyzatary i niepatrebnyja chimikaty. Vytvorcy dadajuć u jaho parfumiernyja adduški, jakija stvarajuć adčuvańnie śviežaści, ale nasamreč mohuć vyklikać razdražnieńnie i alerhiju.
Čym zamianić myła?
Dermatołahi rekamiendujuć vykarystoŭvać srodki dla ačyščeńnia skury (klinsiery) zamiest myła. Jany miakčejšyja i nie parušajuć achoŭny barjer skury, u adroźnieńnie ad ahresiŭnaha myła.
Niamieckija vučonyja ŭ 2021 hodzie vyśvietlili, što navat pry častym vykarystańni klinsieraŭ jany nie nanosiać škody achoŭnamu barjeru skury.
Asabliva važna zamianić myła na bolš miakkija srodki dla ačyščeńnia skury tym, u kaho jana suchaja ci adčuvalnaja. Da hetaj katehoryi adnosiacca pažyłyja ludzi i žančyny ŭ pieryjad mienapaŭzy, u jakich harmanalnyja źmieny robiać skuru bolš suchoju.
Tolki miakkija ačyščalnyja srodki nieabchodna vykarystoŭvać ludziam, jakija pakutujuć na ekzemu, a taksama tym, chto šmat pacieje z-za aktyŭnych trenirovak i maje rehularny kantakt svajoj skury sa skuraj inšych (naprykład, naviedvaje baksiorskija zały ci zajmajecca adzinaborstvami).
Adnak navat u vypadku z ačyščalnymi srodkami važna ich vybirać pravilnyja i paźbiahać praźmiernaha vykarystańnia. Śpiecyjalisty rekamiendujuć pry vybary šukać tyja, na etykietcy jakich paznačana «pH-zbałansavany». Pry hetym ćviordyja klinsiery lepšyja za vadkija hieli dla duša.
Paźbiahać varta tych, u jakich u składzie majucca ahresiŭnyja inhredyjenty, takija jak: pienaŭtvaralniki (łaŭryłsulfat natryju, kakamidaprapiłbetain), jakija mohuć pierasušvać skuru, a taksama aramatyzatary i kansiervanty (naprykład, bienziłhiemifarmal), jakija mohuć vyklikać alerhiju. Pierad vykarystańniem lepš pratestavać novy ačyščalny srodak na pieradpleččy, kab pierakanacca, što inhredyjenty nie vykličuć reakcyju.
Niekatoryja dermatołahi ličać, što navat klinsiery nie varta vykarystoŭvać dla ŭsiaho cieła kožny dzień. Jany rekamiendujuć vykarystoŭvać ich tolki dla padpach, pachviny i noh.
Niekatoryja dermatołahi vykazvajucca jašče bolš kateharyčna. Jany rekamiendujuć vykarystoŭvać klinsiery ŭ dušy tolki tady, kali sapraŭdy jość zabrudžvańni, ale nie štodnia. U bolšaści vypadkaŭ dla ačyščeńnia skury dastatkova zvyčajnaj vady.
Hety padychod źviazany z tak zvanaj hihijeničnaj hipotezaj. Niekatoryja vučonyja ličać, što zališniaje ačyščeńnie skury ŭ apošnija dziesiacihodździ pryviało da źnižeńnia karysnych bakteryj, što, u svaju čarhu, mahło pavialičyć raspaŭsiudžanaść alerhij i infiekcyj.
Vyklučeńnie dla ruk
Dermatołahi ličać myła nieabchodnym tolki dla myćcia ruk, ale nie dla duša.
Paśla pastajannaha kantaktu ź ludźmi, poručniami ŭ mietro, prybiralniami i inšymi zabrudžanymi pavierchniami časam patrabujecca bolš intensiŭnaje vydaleńnie mikrobaŭ, i ŭ takich vypadkach lepš vykarystoŭvać myła.
Jak tłumačać śpiecyjalisty, skura na rukach bolš toŭstaja, čym na bolšaści častak cieła, tamu jana mienš schilnaja da pierasušvańnia ad častaha kantaktu z myłam.
Kamientary