«Увесь працэс заняў 10 хвілін». Палітвязень Святаслаў Герасімук і яго дзяўчына ўзялі шлюб у брэсцкім СІЗА
16 сакавіка ў СІЗА-7 Брэста адбылася цырымонія шлюбу палітвязня Святаслава Герасімука і ягонай нявесты Таццяны.
Са Святаславам яны разам ужо 5 гадоў. 22 снежня яго затрымалі па арт. 293 ч. 2. і змясцілі ў СІЗА за ўдзел у акцыі пратэсту пасля выбараў у жніўні 2020-га.
Таццяна распавяла «Брэсцкай Вясне», як гэта — стаць жонкай палітвязня. Шлюб, заключаны ў такой складанай жыццёвай сітуацыі, толькі ўмацаваў яе перакананні ў тым, што ўсё будзе добра. «Гэта толькі часовыя цяжкасці, якія трэба пераадолець. Галоўнае не здавацца і працягваць ісці наперад. Бо за сваё шчасце трэба змагацца».
У студзені ў адным са сваіх лістоў Святаслаў зрабіў Тані прапанову. Яны доўга не маглі вызначыцца, дзе распісацца — у СІЗА ці ўжо пасля суда, у калоніі. У выніку пара зразумела, што больш чакаць яны не могуць і хочуць узяць шлюб неадкладна.
«Мы не бачыліся 3 месяцы, таму гэты дзень для мяне быў больш, чым асаблівы. Увесь гэты час я бачыла Святаслава толькі ў снах. Да апошняга моманту не магла паверыць, што вось-вось я з ім сустрэнуся ўжывую».
За тыдзень да прызначанай даты нявеста напісала палітвязню пра гэта ў лісце. «Хлопцы ў камеры яму дапамаглі падрыхтавацца. На цырымоніі Святаслаў быў у джынсах, пінжаку і туфлях. Дарэчы, я ніколі да гэтага моманту не бачыла яго ў дзелавым стылі».
Спачатку Таццяну разам з супрацоўніцай ЗАГСа прывялі ў маленькі пакой з абразамі на сценах. Таня вельмі хвалявалася, і жанчына, якая праводзіла цырымонію, усяляк яе супакойвала. Сказала, што пастараецца даць магчымасць пабыць пары разам даўжэй, наколькі гэта будзе магчымым. «Як толькі Святаслава завялі, мы абнялі адно аднаго. У мяне адразу пакаціліся слёзы, але ён папрасіў не плакаць. Вельмі складана было стрымаць эмоцыі, але мне ўдалося. З таго моманту лік часу я згубіла».
Далей работніца ЗАГСа зачытала прамову. Жаніх і нявеста ўвесь гэты час стаялі, трымаючыся за рукі. Ім дазволілі абмяняцца пярсцёнкамі, абвясцілі мужам і жонкай. Завяршылася цырымонія ў СІЗА пацалункам. «Перад тым, як яго павялі, мы яшчэ раз змаглі абняць адно аднаго. Увесь працэс заняў хвілін 10. Але гэтыя 10 хвілін упершыню за 3 месяцы далі мне магчымасць адчуць сябе шчаслівай».
Калі Таня выйшла з СІЗА, яе ўжо сустракалі сябры з кветкамі. «У гэты момант стрымліваць эмоцыі я больш не магла. Адназначна магу сказаць: нягледзячы на абставіны і месца правядзення цырымоніі, гэты дзень стаў адным з найлепшых дзён у маім жыцці».
Са слоў жонкі, Святаслаў Герасімук, нягледзячы ні на што, трымаецца ў СІЗА на пазітыве. «З баявым настроем ён па-ранейшаму верыць у лепшае і ведае, які б тэрмін яму ні далі, у канчатковым выніку ўсё будзе добра. Ён гэтак жа, як і я, гатовы змагацца за сваё шчасце».
Цяпер чытаюць
Лукашэнка абмеркаваў з Рыжанковым «крокі па аднаўленні даверу з заходнімі краінамі»12
Каментары