Мінчукі ў міні-чаце абураліся расійскай агрэсіяй. Завялі крыміналку за рэабілітацыю нацызму
Крымінальную справу за «рэабілітацыю нацызму» распачаў СК у адносінах трох жыхароў Мінска, якія камунікавалі паміж сабою ў тэлеграм-чаце. Іх затрымалі, паведаміла прэс-служба Следчага камітэта.
СК піша, што расследуючы крымінальную справу «экстрэмісцкай накіраванасці», следчыя сутыкнуліся з «групай радыкалаў», якія нібыта распаўсюджвалі нацысцкую ідэалогію.
Згодна з матэрыяламі справы, у пачатку 2022 года 32-гадовы доктар-стаматолаг стварыў тэлеграм-чат і дадаў у яго двух сваіх знаёмых (33 і 34 гадоў). Мужчыны там абмяркоўвалі розныя бытавыя тэмы.
«Пасля пачатку спецыяльнай ваеннай аперацыі ва Украіне перапіска набыла радыкальную афарбоўку», — паведамляе СК.
Паводле прэс-рэліза, мужчыны абмяркоўвалі там пачатак вайны, абураліся ўварваннем расіян ва Украіну, «абражалі і ўсяляк дыскрэдытавалі рускіх, заклікалі да агрэсіі і гвалту да прадстаўнікоў названай нацыянальнасці, узбуджаючы нянавісць і распальваючы нацыянальную варожасць».
«Жыхары сталіцы правялі аналогію з дзеяннямі нацыстаў», — піша СК, але сцвярджае, што суразмоўцы апраўдвалі ідэалогію Гітлера.
Заведзена крымінальная справа па ч. 3 арт. 130-1 (рэабілітацыя нацызму) Крымінальнага кодэкса.
Акрамя таго, СК піша, што затрыманыя ў 2020 годзе, «паддаўшыся павевам каляровых рэвалюцый», абражалі Лукашэнку і «ўдзельнічалі ў здзяйсненні злачынстваў, якія курыруюцца тэлаграм-каналамі экстрэмісцкіх і тэрарыстычных арганізацый».
СК лічыць, што ў дзеяннях затрыманых былі прыкметы злачынстваў, прадугледжаных Крымінальным кодэксам Рэспублікі Беларусь:
- ч. 1 арт. 368 (абраза Лукашэнкі);
- ч. 1 арт. 342 (актыўны ўдзел у групавых дзеяннях, якія груба парушаюць грамадскі парадак, пацягнулі парушэнне працы транспарту, прадпрыемстваў і арганізацый);
- ч. 1 арт. 130 (наўмысныя дзеянні, накіраваныя на ўзбуджэнне нацыянальнай варожасці і варожасці па прыкмеце нацыянальнай прыналежнасці).
-
Кашалёк Лукашэнкі стаў уладальнікам брэнду музычнага фестывалю, куды запрашаюць расійскіх Z-спевакоў
-
«Літва — зона камфорту». Як 21-гадовая беларуска бясплатна вучыцца ў тэхнічным універсітэце і працуе ў IT
-
У Мінску — усплёск рэспіраторных захворванняў. Каля дзіцячай інфекцыёнкі знялі чаргу з машын хуткай дапамогі
Цяпер чытаюць
Муж галоўнай гераіні прапагандысцкага фільма БТ скончыў жыццё самагубствам17
Каментары