«У мяне прыём каштуе 120 рублёў, чаму я павінна працаваць за 44, бл**ь, рублі?!» Дактары абмяркоўваюць рэгуляванне цэн

Напрыклад, першасны прыём спецыяліста, кандыдата медыцынскіх навук з лютага не можа каштаваць даражэй за 45 рублёў, а доктара медыцынскіх навук, а таксама дацэнта і кандыдата медыцынскіх навук — 47 рублёў.

Гучыць нямала змрочных прагнозаў наконт таго, што абмежаванне цэн на прыём будзе выштурхоўваць высокакваліфікаваных спецыялістаў на рынак працы суседніх краін.

— Досвед любой развітой краіны паказаў, што эфектыўная якасная медыцына — гэта страхавая медыцына. Гэта галіна эканомікі, якая дае зарабляць усім, хто задзейнічаны ў ёй. Гэта высокія стандарты, адукаванасць, кваліфікацыя, уніфікацыя, празрыстасць, законнасць, абароненасць абодвух бакоў і гарантыі, — разважае адна доктарка.

Яна дадае:

— У недаразвітай краіне не даюць працаваць нават энтузіястам, якія ведаюць, як трэба, могуць рэалізаваць гэтыя веды, але няма калі і за што. Немагчыма якасна апытаць пацыента, выказаць меркаванне пра дыягназ, прызначыць даабследаванне, тэрапію, запоўніць паперы за паўгадзіны.

Жанчына сумна жартуе і прапаноўвае выпіць, не чокаючыся, за матэрыяльную ўзнагароду высокаінтэлектуальнай працы.

— Можа, дзеячы ад улады лічаць, што доктар — адзінка настолькі адухоўленая, што сілкуецца толькі хлебам надзённым? І пытанні быцця яго цікавяць толькі з пункту гледжання працы мозгу і двух кругоў кровазвароту? І дзяцей у дактароў, напэўна, не бывае. І патрэб з жаданнямі…

Сярод дактароў ёсць тыя, хто ў захапленні ад ідэі Мінздароўя. Вядомая гінекалагіня-блогерка выставіла ў сторыс паведамленне калегі, якая пахвалілася, што раней яе прыём у прыватным медцэнтры каштаваў 38 рублёў, а ў лютым цана стане вышэйшай.

— Я раней казала, што для большасці, можа, нічога і не здарылася. Здарылася толькі ў мяне, а таксама ў блізкіх мне крутых лекараў, у якіх прыём быў 90, 100, 150 рублёў. Найлепшыя розумы і цудоўныя людзі таксама сумуюць, — пракаментавала доктарка.

Доктарка паскардзілася, што ёй вельмі непрыемна разумець, што ўсё, чаго яна дабівалася доўгія гады, абясцэнена ў грашовым эквіваленце яе роднай краіны.

— Як нармальны спецыяліст можа пачаць зарабляць у тры разы менш? Чаму я павінна гэта цярпець? У мяне прыём каштуе 120 рублёў, чаму я павінна працаваць за 44, бл**ь, рублі?!

Гінекалагіня думае, што 2025 год можа стаць апошнім у яе доктарскай кар’еры, бо не гатовая мірыцца з рэгуляваннем кошту яе працы.

— Сем гадоў я будавала свой блог, набірала папулярнасць, была сабой і знайшла аматараў мяне як спецыяліста. І няхай асудзяць, што я зноў пра грошы. А як жа дапамога людзям? Мне п****й, што падумаюць. Я жыць хачу нармальна, а часам нават добра.

Іншыя з абураных медыйных дактароў тлумачаць, колькі грошай яны ўклалі ў сваю адукацыю пасля таго, як скончылі медыцынскі ўніверсітэт.

Адна высоказапатрабаваная доктарка-неўролаг адзначыла:

— Вучыцца і падвышаць сваю кваліфікацыю мне падабаецца, я раблю гэта рэгулярна ўжо 15 гадоў. 10 гадоў я працую неўролагам, а вучуся разоў у сто больш, чым ва ўніверсітэце. Шмат прачытаных кніг, гадзіны прагледжаных вебінараў і канферэнцый, курсы перападрыхтоўкі ў Беларусі і Расіі, навучанне новым методыкам лячэння, паездкі на вочныя семінары ў Расію — усё гэта крута. Мне вельмі падабаецца тое, што я не спыняюся на дасягнутым і іду ўвесь час наперад.

Іншая гінекалагіня выказваецца яшчэ больш жорстка:

— З такімі ўмовамі клеіць дома вейкі больш выгадна і бяспечна ў плане адказнасці, чым працаваць доктарам. Я не ведаю, як мы будзем працаваць. Я не ведаю, як і навошта цяпер імкнуцца развівацца, навучацца і дзе браць гэтую чортаву матывацыю якасна аказваць медыцынскія паслугі. Цяпер яе нуль. Я ведаю, гэта не ваша праблема зараз. Але маўчаць мне пра гэта складана. Я ў роспачы.

Доктарка скардзіцца, што на сваю дадатковую адукацыю патраціла не менш за 2 тысячы даляраў. Яна сцвярджае, што дзякуючы гэтаму атрымала веды, якіх ёй не далі ні ва ўніверсітэце, ні на дзяржаўных курсах павышэння кваліфікацыі.

— Гэта быў мой выбар — навучыцца аказваць адэкватную дапамогу без фантазій і здагадак. Але каб гэтаму навучыцца, трэба зарабіць на навучанне такога ўзроўню.

Гінекалагіня дадала, што выдаткоўвала на чарговы медыцынскі семінар грошы, якія адрывала ад сваёй сям’і.

— Я разлічвала, што мае веды, навыкі, магчымасць лепш ставіць дыягназы, лепш дапамагаць людзям, дапамогуць мне акупіць мае ўкладанні. А хтосьці зверху лічыць, што я атрымліваю звышпрыбыткі. Таму трэба ўрэгуляваць кошт паслуг, якія я аказваю. Бо няма чаго разлічваць акупіць свае ўкладанні і наогул няма чаго даваць магчымасць зарабіць на гэтыя ўкладанні.

Ёсць сярод высоказапатрабаваных і тыя, хто абяцае скараціць свой працоўны час — хаця б у сацыяльных сетках. Адна рэпрадуктолаг паскардзілася, што кожны дзень пасля працы звычайна адказвала на 20-30 паведамленняў з пытаннямі ад пацыентаў.

Цяпер яна падкрэслівае, што кансультаваць будзе выключна ў працоўны час:

— Я больш не адказваю на паведамленні ў месенджарах. І нават калі вы пішаце ў інстаграм ці адмінам клінікі «проста спытаць» — калі ласка, запішыцеся на прыём і «проста спытайце». А свой асабісты час я буду траціць на сваё жыццё і здароўе, а не на жыццё і здароўе пацыентаў.

Цікава і тое, як пацыенты рэагуюць на навіну аб тым, што з лютага цэны ў прыватных цэнтрах павінны пайсці ўніз. Вядомая блогерка-доктарка паскардзілася, што зараз у яе пачаліся масавыя адмены візітаў.

Доктарка паказала, што ў яе адразу сем кліентак адмянілі запланаваныя наведванні. Яна мяркуе, што жанчыны, якім не трэба тэрміновая кансультацыя, вырашылі пачакаць каля двух месяцаў, каб сэканоміць.

— Праз новыя законы разумею, што, мабыць, да лютага можна прыпыняць прыём, — сумна рэзюмуе гінекалагіня. — Усе будуць чакаць нізкіх цэн за тую ж якасць.

Павялічыць

Іншыя ж пацыенты шукаюць варыянты падтрымаць любімых дактароў грашыма і пытаюцца, ці можна будзе запісвацца на два акенцы запар, каб заплаціць за прыём больш.

Адна з папулярных у сацыяльных сетках гінекалагінь напісала ў сторыс:

— Мне шмат хто пісаў, што яны гатовыя на гэта. Але з пазіцыі правяральных органаў гэта можа быць няправільна расцэнена. Трэба атрымаць на гэты конт афіцыйны адказ Міністэрства аховы здароўя. Будзем адназначна пісаць запыт.

• 2
• 0
• 11
• 22
• 3
• 5
• 7
• 0