«Kali ja papiaredžvaŭ Zachad pra Pucina, mianie ihnaravali jak nieŭraŭnavažanaha psicha» — Saakašvili napisaŭ list u The Times
Były prezident Hruzii Michaił Saakašvili napisaŭ list u viadučuju brytanskuju hazietu The Times, u jakim zajaviŭ, što Uładzimir Pucin amal dva dziesiacihodździ tamu jasna daŭ jamu zrazumieć, što maje namier zachapić Ukrainu.
U publikacyi skazana, što ahresiŭnyja terytaryjalnyja ambicyi Pucina Zachad praihnaravaŭ, choć jaho pra heta nieadnarazova papiaredžvali, u tym liku i sam Saakašvili, piša Bi-bi-si.
Saakašvili znachodzicca ŭ tbiliskaj klinicy «Vivamiedzi» z maja minułaha hoda. Jon byŭ zatrymany nieŭzabavie paśla viartańnia ŭ Hruziju ŭ kastryčniku 2021 hoda. Jamu pahražaje da šaści hadoŭ źniavoleńnia.
U svaim liście ŭ The Times Saakašvili raspaviadaje, što Pucin nie chavaŭ płanaŭ pa zachopie čužych ziamiel, kali jany ŭpieršyniu sustrelisia ŭ Kramli ŭ 2004 hodzie.
«Pra ŭsio, što jon robić ciapier, jon bolš-mienš jasna daŭ mnie zrazumieć na pieršaj ža našaj sustrečy», — napisaŭ jon.
Saakašvili śćviardžaje, što adrazu paśla pieršaj sustrečy z Pucinym jon jeździŭ u Bierlin, dzie raspavioŭ pra svaju zakłapočanaść tahačasnamu kancleru Niamieččyny Hierchardu Šroderu.
U pieršyja dni vajny Šroder asudziŭ napad Rasii na Ukrainu, ale nie pierastaŭ padtrymlivać suviazi z Maskvoj.
«Tamu niama ničoha dziŭnaha ŭ tym, — napisaŭ były prezident Hruzii, — što Šroder adrazu na mianie Pucinu danios».
U 2008 hodzie Rasija ŭvarvałasia na terytoryju Hruzii, paśla čaho Saakašvili praciahvaŭ biespaśpiachova kazać pra niebiaśpieku, jakuju ŭjaŭlaje saboj pucinskaja Rasija, skazana ŭ publikacyi.
«Kali ja papiaredžvaŭ Zachad pra Pucina, mianie ihnaravali jak nieŭraŭnavažanaha i razzłavanaha psicha», — śćviardžaje były prezident Hruzii.
Jak piša The Times, Saakašvili — nie adziny, chto abvinavačvaje Zachad u tym, što paśla vajny z Hruzijaj jaho lidary pastaralisia prosta nie zaŭvažać ekspansijanisckich nastrojaŭ u rasijskim kiraŭnictvie i imknulisia jak maha chutčej viarnucca da raniejšych stasunkaŭ z bahataj na enierharesursy Rasijaj.
U publikacyi taksama raspaviadajecca pra stan zdaroŭja byłoha prezidenta Hruzii, jaki ciaham doŭhaha času trymaŭ haładoŭku i jaki śćviardžaje, što padčas źniavoleńnia jaho atrucili rasijskija ahienty.
Maci Saakašvili Hiuli Ałasanija kaža, što jaje syn ź ciažkaściu chodzić, jaho vanituje paśla ježy, i jon časta tracić prytomnaść. «Ciapier jahonaje žyćcio zaležyć ad situacyi va Ukrainie», — kaža jana.
U publikacyi skazana, što eks-prezident ciapier važyć 60 kh, heta značyć napałovu mienš, čym raniej.
«Vidavočna, što maja sprava — heta častka bolš maštabnaj hibrydnaj vajny», — śćviardžaje Saakašvili ŭ svaim liście ŭ The Times.
Ciapier čytajuć
Łukašenka abmierkavaŭ z Ryžankovym «kroki pa adnaŭleńni davieru z zachodnimi krainami»15
Kamientary