«Anora» nazvana najlepšym filmam na ŭručeńni premii «Oskar»

Siońnia nočču ŭ Łos-Andželesie prajšło ŭručeńnie premii «Oskar». Kamiedyjna-dramatyčny film «Anora» režysiora Šona Biejkiera nazvany najlepšym filmam.

Najlepšaj aktrysaj pryznali Majki Medysan, jakaja syhrała hałoŭnuju rolu ŭ «Anory», a najlepšym režysioram Šona Biejkiera, film taksama atrymaŭ Oskar za najlepšy scenar i najlepšy mantaž.

Film raspaviadaje pra znajomstva stryptyziorki Anory (Eni Michiejeva) ź Ivanam (nie nadta razumnym synam rasijskaha naftavaha aliharcha). Anora i Ivan znajomiacca ŭ stryp-kłubie ŭ Ńju-Jorku, pamiž imi ŭźnikajuć pačućci, i maładyja adpraŭlajucca ŭ Łas-Viehas, kab ažanicca.

Ivan (jaho hraje Mark Edelštejn) vyrašaje ažanicca, kab, u tym liku, adkasić ad armii ŭ Rasii. U Ńju-Jorku ŭ jaho baćkoŭ vialiki dom.

Pra rośpis daznajucca baćki ŭ Rasii, bo Anora adrazu vystaŭlaje viasielnaje fota ŭ instahram, i kamandzirujuć dvuch čałaviek Harnika i Ihara (Ihara hraje Jura Barysaŭ), kab anulavać šlub. Harnik i Ihar sprabujuć pierakanać Anoru skasavać šlub, a potym usie razam šukajuć u Ńju-Jorku Ivana, jaki źbieh ad adkaznaści ŭ zahuł.

To-bok film — heta «Papiałuška» naadvarot, ale kamiedyjny i sumny.

U naminacyi «najlepšy film» taksama byli «Brutalist» (pra vienhierskaha architektara Łasła Tota, jaki źjechaŭ paśla Druhoj suśvietnaj u ZŠA), «Bob Dyłan: Nikomu nie viadomy» (pra pačatak karjery viadomaha muzykanta), «Kankłaŭ» (pra vybary novaha Papy). «Dziuna: Častka druhaja», miuzikł «Emilija Pieres» pra transhiendarny pierachod mieksikanskaha narkabarona), «Ja ŭsio jašče tut» (pra hady dyktatury ŭ Brazilii), «Chłopcy z «Nikiela», «Substancyja», «Złaja: Kazka pra viedźmu Zachadu».

Edryan Broŭdzi atrymaŭ «Oskar» za rolu ŭ filmie «Brutalist».

Statuetku za najlepšuju rolu druhoha płana atrymaŭ Kiran Kałkin za rolu ŭ «Sapraŭdnym boli».

«Oskar» za najlepšuju žanočuju rolu druhoha płana atrymała Zoi Sałdana, jakaja vykanała rolu Ryty Mory Kastra ŭ miuzikle «Emilija Pieres».

«Ja hanarusia tym, što źjaŭlajusia dziciem baćkoŭ-imihrantaŭ», — skazała jana ŭ vielmi emacyjnaj pramovie, atrymlivajučy ŭznaharodu i ledź strymlivajučy ślozy.

Najlepšym filmam na zamiežnaj movie stała brazilskaja stužka «Ja ŭsio jašče tut».

Najlepšym animacyjnym poŭnamietražnym filmam byŭ pryznany multfilm «Płyń» (Flow) łatvijskaha režysiora Hintsa Ziłbaładzisa pra ciomna-šeraha kata, jaki razam z sabakam, kapibaraj i ptuškaj-sakratarom ratujecca ad patopu.

 Heta pieršaja karcina z Łatvii, jakaja atrymała «Oskar».

• 1
• 4
• 0
• 3
• 0
• 0
• 0
• 1