Над усім усходнім узбярэжжам ЗША ўжо месяц назіраецца вялікая колькасць дронаў. Іх заўважылі недалёка ад адной з рэзідэнцый Дональда Трампа. Новаабраны прэзідэнт вырашыў адмяніць сваю паездку туды. Што вядома пра таямнічыя беспілотнікі.
Тэмай бурных дыскусій у ЗША стаў невытлумачальны рост колькасці беспілотнікаў у небе над некалькімі штатамі ЗША на ўсходнім узбярэжжы.
Дзе бачылі дроны
Як піша BBC, паведамленні аб беспілотніках паступалі з розных штатаў, сярод іх Нью-Ёрк, Масачусэтс і Пенсільванія.
Паводле даных Федэральнага ўпраўлення грамадзянскай авіяцыі, упершыню групы дронаў былі зафіксаваныя 18 лістапада ў Нью-Джэрсі. Там на працягу некалькіх дзён яны луналі паблізу «Арсенала Пікаціні» — сакрэтнага вайскова-даследчага цэнтра, а таксама побач з полем для гольфа, які належыць абранаму прэзідэнту Дональду Трампу ў горадзе Бедмінстэр.
У Агаё выяўленне беспілотнікаў прывяло да закрыцця прыкладна на гадзіну ў пятніцу ўвечары 13 снежня базы ВПС «Райт-Патэрсан».
У Канэктыкуце сістэмы выяўлення беспілотнікаў былі актываваныя ў раёне гарадоў Гротан і Нью-Лондан, дзе размешчаны, сярод іншага, база амерыканскіх падводных лодак і завод, які займаецца вытворчасцю субмарын.
Besides the drone sightings, people are also reporting seeing mysterious orbs in New Jersey and other parts of the East Coast.#Orbs #Drones #NewJerseyUFO #UFO pic.twitter.com/nGiasEz9Yn
Адно з відэа, на якім зафіксаваны таямнічы палёт дрона. Крыніца: MariettaDaviz /Х
Што ўлады кажуць пра дроны
Як піша CNN, прадстаўнік Федэральнага бюро расследаванняў на брыфінгу ў суботу 14 снежня расказаў, што на іх лінію даверу паступіла больш за 5000 зваротаў. Аднак менш за сотню прывялі да зачэпак, якія «лічацца годнымі далейшага расследавання».
Па яго словах, зараз ва ўладаў няма ніякіх доказаў, якія б пацвярджалі «буйнамаштабную дзейнасць» дронаў. Прадстаўнік ФБР падкрэсліў, што рэакцыя на паведамленні аб беспілотніках аказалася «крыху празмернай», але ігнараваць іх нельга.
Як піша The Wall Street Journal, федэральнае бюро расследаванняў і Міністэрства ўнутранай бяспекі ў сумеснай заяве паведамілі, што няма доказаў пагрозы для нацыянальнай або грамадскай бяспекі. А шмат з аб'ектаў, якія насельніцтва ідэнтыфікавала як беспілотнікі, на самой справе з'яўляюцца пілатаванымі лятальнымі апаратамі.
Якія правілы адносна дронаў у ЗША
Па інфармацыі CNN, у Федэральнай авіяцыйнай адміністрацыі ЗША зарэгістравана каля 792 тысяч беспілотнікаў. Гэта колькасць амаль пароўну падзяляецца на апараты камерцыйнага і аматарскага выкарыстання.
Як тлумачыць WSJ, у ЗША палёты дронаў на вышыні ніжэйшай за 120 метраў дазволены ў большасці месцаў. Для аматараў палётаў патрабуецца прайсці базавы тэст па бяспецы і выконваць простыя правілы, такія як пазбяганне кантраляваных паветраных прастор вакол аэрапортаў ды іншых паветраных судоў.
У некаторых месцах, напрыклад, у Нью-Ёрку, для палётаў уначы аператар павінен мець сертыфікат пілота дронаў, а сам апарат павінен быць абсталяваны спецыяльнымі агнямі.
У нядзелю 15 снежня міністр унутранай бяспекі ЗША Алехандра Маёркас заявіў, што рост колькасці паведамленняў аб беспілотніках можа быць звязаны з тым, што ў мінулым годзе федэральныя законы пачалі дазваляць іх палёты ў начны час.
Як адзначаюць журналісты, хоць Федэральная авіяцыйная адміністрацыя патрабуе папярэдняга дазволу на палёт паблізу аэрапортаў, не ўсе аператары беспілотнікаў прытрымліваюцца гэтых правіл.
Чаму дроны не збіваюць?
Шэраг кангрэсменаў мяркуюць, што за запускам беспілотнікаў стаяць Кітай, Расія ці Іран і прапануюць збіваць і аналізаваць гэтыя БПЛА, каб вызначыць іх паходжанне і намеры.
Пентагон і Белы дом настойваюць на тым, што гэтыя аб'екты не замежнага паходжання. Так, міністр унутранай бяспекі паведаміў, што яму невядома «пра датычнасць іншых дзяржаў да дронаў, выяўленых на паўночным усходзе». «Мы пільна расследуем гэтае пытанне», — сказаў ён.
Абраны прэзідэнт Дональд Трамп выказаў меркаванне, што беспілотнікі не маглі лётаць без ведама ўрада. «Няхай грамадскасць даведаецца, і неадкладна, — напісаў ён у сваёй сацыяльнай платформе Truth Social. — У адваротным выпадку іх трэба збіваць».
Майк Уолц, прызначаны Трампам дарадцам па нацыянальнай бяспецы, прапанаваў стварыць амерыканскі аналаг ізраільскай сістэмы «Жалезны купал» для абароны ад пагроз з паветра. Аднак федэральныя ўлады папярэджваюць, што знішчэнне дронаў можа быць небяспечным для грамадзян і выклікаць цэлы шэраг юрыдычных ускладненняў.
«Хачу запэўніць амерыканскую грамадскасць, што федэральны ўрад накіраваў дадатковыя рэсурсы, персанал і тэхналогіі, каб дапамагчы паліцыі штата Нью-Джэрсі ў расследаванні выпадкаў з беспілотнікамі», — цытуе WSJ словы міністра ўнутранай бяспекі.
У сваю чаргу губернатар штата Нью-Ёрк Кэтлін Хокул паведаміла, што федэральныя ўлады накіроўваюць у Нью-Ёрк «сучасную сістэму выяўлення беспілотнікаў» для садзейнічання працы праваахоўных органаў штата і федэральных уладаў.
Па інфармацыі CNN, сістэмы выяўлення і сачэння за беспілотнікамі міністэрства абароны ЗША накіруе на свае вайсковыя аб'екты ў Нью-Джэрсі — ваенна-марскую базу Эрл і «Арсенал Пікаціні».
Эксперты паведамляюць, што ЗША распрацоўваюць планы на выпадак рэальнай пагрозы, але гэтыя меры пакуль разглядаюцца як «крайняя неабходнасць». У той жа час улады запэўніваюць, што зараз няма падстаў для таго, каб пераходзіць да больш жорсткіх дзеянняў.
Каментары