Зяленскі рэзка раскрытыкаваў паездку прэм’ера Славакіі да Пуціна

Прэзідэнт Украіны Уладзімір Зяленскі рэзка раскрытыкаваў паездку прэм’ер-міністра Славакіі Роберта Фіцы ў Маскву і яго сустрэчу з расійскім прэзідэнтам Уладзімірам Пуціным. Сярод іншага, Зяленскі заявіў, што паездкай павінны зацікавіцца «славацкія праваахоўныя органы і спецслужбы», паведамляе Голас Амерыкі.

«Чаму гэты лідар настолькі залежны ад Масквы? Чым яму плацяць і чым ён расплачваецца?» — задаў рытарычнае пытанне Зяленскі, адзначыўшы, што дзеянні Фіцы могуць паставіць пад пагрозу бяспеку не толькі Славакіі, але і ўсёй Еўропы.

Фіца наведаў Маскву з загадзя неабвешчаным візітам увечары ў нядзелю, стаўшы толькі трэцім лідарам адной з краін ЕС, які сустракаўся з Пуціным пасля пачатку маштабнага ўварвання ва Украіну ў 2022 годзе.

З моманту свайго прыходу да ўлады напрыканцы 2023 года славацкі прэм’ер праводзіць палітыку адносна Украіны і Расіі, якая адрозніваецца ад палітыкі большасці краін ЕС, выступаючы супраць ваеннай дапамогі Кіеву.

Роберт Фіца пазней напісаў у фэйсбуку, што «ў працяглай размове» з Уладзімірам Пуціным яны «абмяняліся меркаваннямі наконт ваеннай сітуацыі ва Украіне, магчымасці хутчэйшага мірнага завяршэння вайны і адносін паміж Славакіяй і Расіяй». Непасрэднай нагодай для візіту стала хуткае спыненне транзіту расійскага газу ў Славакію праз Украіну. Фіца таксама адзначыў, што інфармаваў лідараў ЕС пра свой візіт.

Як напісаў Зяленскі ў сацсетках, Масква можа даваць Фіцу «значныя зніжкі», але расплачвацца за іх давядзецца суверэнітэтам. Акрамя таго, ён намякнуў на выкарыстанне «ценявых схем».

Паводле слоў Зяленскага, падрабязнасці гэтага пытання былі раскрыты падчас нядаўняй сустрэчы еўрапейскіх лідараў у Бруселі. Прэзідэнт Украіны таксама адзначыў, што Фіца адмовіўся ад магчымай кампенсацыі за адмову ад паставак расійскага газу, што, на думку Зяленскага, стала доказам таго, што ён не хоча ўдзельнічаць у сумеснай еўрапейскай працы над энергетычнай незалежнасцю, а «наадварот — хоча дапамагчы Расіі выціснуць амерыканскі газ і энергетычныя рэсурсы іншых партнёраў з Еўропы», а таксама «дапамагчы Пуціну зарабляць грошы на фінансаванне вайны і аслабіць Еўропу». Зяленскі заключыў, што гаворка ідзе пра «пытанне бяспекі» Еўропы.

Раней Роберт Фіца сцвярджаў, што на нядаўняй сустрэчы ў Бруселі Зяленскі нібыта прапаноўваў яму 500 мільёнаў еўра з замарожаных расійскіх актываў у абмен на тое, што Славакія падтрымае ўступленне Украіны ў NATO. Гэтае сцвярджэнне Зяленскі не каментаваў. Невядома, ці адносяцца яго словы пра адмову Фіцы ад «кампенсацый» да гэтага эпізоду.

Прэзідэнт Літвы Гітанас Наўседа выступіў з крытыкай візіту Фіцы, таксама негатыўна пра яго паездку выказаліся ўлады Чэхіі.

У сталіцы Славакіі Браціславе прайшла акцыя пратэсту супраць паездкі прэм’ера на перамовы з Пуціным. Паводле звестак арганізатараў, у ёй узялі ўдзел да 3 тысяч чалавек, у тым ліку прадстаўнікі апазіцыі і ўкраінскія ўцекачы.

Прэзідэнт Славакіі Петер Пелегрыні, палітычны саюзнік Фіцы, таксама запатрабаваў ад прэм’ера тлумачэнняў у сувязі з яго паездкай у Маскву.

У Крамлі пакуль не давалі каментарыяў па сутнасці сустрэчы Пуціна і Фіцы. У прыватнасці, сам Пуцін яе не каментаваў.

Фіца, як і прэм’ер-міністр Венгрыі Віктар Орбан, які таксама ездзіў у Маскву, заяўляе пра сябе як пра прыхільніка неадкладнага пачатку перамоў пра мір ва Украіне. Ён устрымліваецца ад крытыкі Масквы за ўварванне ва Украіну і, наадварот, крытыкуе Кіеў, абвінавачваючы яго ў імкненні працягваць вайну. Фіца таксама рэзка крытыкуе рашэнне Украіны адмовіцца працягваць пагадненне аб транзіце расійскага газу.

• 5
• 0
• 0
• 0
• 0
• 0
• 1
• 0