«Зачынялася ў прыбіральні і плакала»: Эмілія Кларк пра эратычныя сцэны «Гульні тронаў»
Актрыса Эмілія Кларк, якая выканала ролю Дэйнэрыс Таргарыен у серыяле «Гульня тронаў», распавяла, што адчувала сур'ёзны стрэс падчас працы над першым сезонам. Акцёрка кажа, што пад канец працоўнага дня замыкалася ў прыбіральні і плакала, піша bbc.com.
Асабліва цяжка ёй было здымацца ў сцэнах, дзе трэба было распранацца, распавяла акцёрка.
Мноства эратычных сцэн у серыяле было абгрунтавана сюжэтам, але калі б «Гульню тронаў» здымалі сёння, гэта быў бы зусім іншы серыял, лічыць Кларк.
Роля Дэйнэрыс дасталася Эміліі Кларк, калі ёй было 23 гады, і прынесла ёй славу.
«Я пагадзілася на ролю, а потым мне даслалі сцэнар. Я чытала яго і час ад часу думала: вось у чым падвох», — распавядае Кларк.
«Але я толькі скончыла акцёрскую школу і падышла да працы прафесійна», — дадае яна.
«Калі нешта ёсць у сцэнары, значыць, яно павінна там быць. І я надам гэтаму сэнс. Усё будзе добра».
«Да гэтага я толькі двойчы была на здымачнай пляцоўцы, і раптам апынулася на ёй, абсалютна голая, а вакол былі ўсе гэтыя людзі. Я не ведала, што мне рабіць», — распавяла акцёрка.
«Я не разумела, што ад мяне патрабуецца. Я не ведала, што яны хочуць і чаго хачу я сама».
«Незалежна ад таго, былі б там эратычныя сцэны ці не, увесь першы сезон я ў любым выпадку нічога б не патрабавала. Я думала, што не маю права патрабаваць нешта», — кажа Кларк.
«Што б я ні адчувала — гэта няправільна. Я лепш паплачу ў прыбіральні, а потым вярнуся, мы даздымаем сцэну, і ўсё будзе выдатна», — успамінае акцёрка працу над серыялам.
Па словах Кларк, пасля здымак яна перастала шукаць сваё імя ў пошукавіках, бо натыкалася на цэлыя артыкулы пра свае эратычныя сцэны. «Яны пісалі, якая ў мяне тоўстая задніца і гэтак далей. А я была яшчэ амаль дзіцем!» — кажа яна.
Эмілію на працягу першага сезона падтрымліваў Джэйсан Мамоа, які іграў у серыяле яе мужа, жорсткага правадыра племя датракійцаў.
Кларк лічыць, што цяпер стаўленне гледачоў да галізны ў фільмах моцна мяняецца.
Першаму сезону «Гульні тронаў», знятаму ў 2009—2010 гадах, споўнілася дзесяць гадоў. Але акторка кажа, што, калі б у яе была магчымасць перазняць серыял, яна пакінула б яго такім самым.
«Вельмі многія гаварылі са мной пра сцэны, дзе Кхалісі (гераіня Кларк) аголеная. Але ніхто не звярнуў бы на гэта ўвагі, калі б яе не прыніжалі на экране. Глядач павінен быў гэта ўбачыць».
Новы фільм з удзелам Эміліі Кларк, «Каляды на дваіх», нядаўна выйшаў у пракат. Акцёрка кажа, што цяпер «заўсёды спрачаецца на пляцоўцы» аб неабходнасці эратычных сцэн.
«Усё вельмі змянілася. Я разумею значна больш аб тым, што магу сабе дазволіць і што мне камфортна рабіць, — кажа яна. — Сёння я не пагаджаюся распранацца, калі не разумею, што гэта абсалютна неабходна».
-
«Гэта не маё, гэта сябра». Беларус здымае рэакцыю ахоўнікаў метро на фалаімітатары ў заплечніку — відэа збіраюць мільёны праглядаў
-
Сем тыпаў «п’янай асобы»: кім вы становіцеся пад уздзеяннем алкаголю і што гэта азначае?
-
У Сан-Францыска жыве кот, якога завуць Беларусь. Прытым гаспадыня яго — звычайная амерыканка
Каментары