Новым кіраўніком Пагранкамітэта стаў ураджэнец Расіі, які адказваў за Брузгі ў час атакі мігрантамі на Польшчу
Аляксандр Лукашэнка сёння разгледзеў кадравыя пытанні. Новых кіраўнікоў атрымалі горад Гродна і Дзяржпагранкамітэт.
Старшынёй Дзяржаўнага пагранічнага камітэта Лукашэнка прызначыў былога начальніка Гродзенскай памежнай групы Канстанціна Моластава.
Моластаву сёння споўнілася 53 гады. Ëн ураджэнец Расіі і скончыў Акадэмію Федэральнай службы бяспекі РФ.
Ëн кіраваў у Гродне ў час, калі там ажыццяўлялася атака мігрантамі на Польшчу і Літву.
Міграцыйны крызіс на мяжы Беларусі з ЕС разгарнуўся восенню 2021 года. Перад гэтым у ліпені Лукашэнка абмовіўся, што раз Захад увёў санкцыі супраць яго рэжыму, ён не будзе стрымліваць наплыў мігрантаў.
Тысячы мігрантаў з краін Афрыкі і Блізкага Усходу (у асноўным з Іраку і Сірыі) пачалі незаконна пераходзіць беларуска-літоўскую мяжу і прасіць прытулку. У Беларусі яны апынуліся, таму што беларускія ўлады клікалі людзей у краіну, абяцаючы, што дапамогуць трапіць у Еўропу. У выніку многія бежанцы трапілі ў пастку: сілавікі іх падштурхоўвалі пераходзіць мяжу, а еўрапейскія памежнікі не пускалі. Літва і Польшча пачалі будаваць сцяну, каб адмежавацца. Дзясяткі мігрантаў загінулі.
У лістападзе на фоне міграцыйнага крызісу Лукашэнку званіла Ангела Меркель, каб абмеркаваць сітуацыю.
У канцы 2021 года напружанне стала спадаць. З Беларусі запусцілі эвакуацыйныя рэйсы ў Ірак і Сірыю.
Моластаў знаходзіцца пад санкцыямі ЕС, што былі прынятыя ў 2021 годзе ў сувязі з міграцыйным крызісам.
Анатоль Лапо, які ўзначальваў раней ДПК, звольнены ў запас.
Таксама Лукашэнка даў згоду на прызначэнне:
Хмеля Андрэя Валер'евіча — старшынёй Гродзенскага гарвыканкама, членам Гродзенскага аблвыканкама;
Мароза Ігара Аляксандравіча — старшынёй Аршанскага райвыканкама;
Ладыгі Анатоля Міхайлавіча — старшынёй Салігорскага райвыканкама;
Карловіча Юрыя Пятровіча — старшынёй Клецкага райвыканкама;
Пярэдні Вадзіма Аляксандравіча — кіраўніком адміністрацыі Першамайскага раёна г. Мінска.
Цяпер чытаюць
Дзе нарадзіліся вядомыя беларусы? Больш за дзесяць тысяч асоб сабралі на адной карце4
Каментары
У Лукашэнкі ўсё вайсковыя пасады займаюць выключна этнічныя маскавіты. Качанава як кандыдат на пасаду прэзідэнта так сама маскавітка. Маскавіты якія ні мовы беларускай ня ведаюць ні культуры, якія не маюць каранёў беларускіх, якія ненавідзяць народ беларускі, для якіх радзіма Масковія кіруюць акупаванай Беларуссю. Не давярае гаўляйтар беларусам. Адных маскавітаў вакол ставіць на ўсё сілавыя пасады.