Былы палітвязень Зміцер Фурманаў пайшоў працаваць у дастаўку ежы
У Вільні мужчына ўладкаваўся кур'ерам у службы дастаўкі Wolt і Bolt food. Развозіць замовы Зміцер на ровары. Былы палітвязень расказаў «Нашай Ніве», колькі ў яго атрымліваецца зарабляць і чаму абраў такую працу.
Яшчэ ў 2019-м Зміцер хацеў увайсці ў IT. Тады пайшоў на курсы распрацоўшчыкаў у ПВТ у Горадні.
Да гэтага мужчына дзесяць гадоў адпрацаваў інжынерам на дзяржаўным прадпрыемстве «Гроднааблаўтатранс».
«Праз нізкі заробак вырашыў мяняць сферу дзейнасці, — тлумачыць ён. — Пра IT думаў даўно. Хацеў на праграміста вучыцца ў Горадзенскім дзяржаўным універсітэце. Здаў ЦТ, праходзіў на платнае, але ж на той момант — у 2002-м — падаў ужо дакументы ў Маскоўскі дзяржаўны адкрыты ўніверсітэт (быў філіал іх у Горадні). Там была завочная форма навучання на інжынера-механіка, і я праходзіў на бясплатнае. Таму пайшоў туды, каб не плаціць за навучанне».
У 2020-м Зміцер паспеў схадзіць на сумоўе толькі ў адну IT-кампанію. Пасля пачалася пандэмія, вакансій у гэтай сферы амаль што не было.
«Тады на сумоўі выявілася, што ў мяне недастатковы ўзровень англійскай мовы. У Горадні стаў займацца на курсах. А пасля — арышт, турма (Зміцер быў сябрам ініцыятыўнай групы Святланы Ціханоўскай і быў затрыманы наўпрост на пікеце па зборы подпісаў 29 мая 2020 года, у выніку яго асудзілі да двух гадоў калоніі па «народным» артыкуле 342. — НН.) Калі выйшаў — восенню 2021-га, вырашыў, што буду зноў спрабаваць ісці ў IT.
Скончыў яшчэ адны курсы па праграмаванні. Тут пачалася вайна, зноў з'явіліся праблемы ў IT.
Атрымліваецца, ужо паўгода шукаю працу ў IT. У розныя кампаніі адсылаў рэзюмэ, але ніякіх прапаноў не атрымаў. Жыць неяк далей трэба: і ў краму хадзіць, і кватэру здымаць. Пайшоў працаваць кур'ерам».
Развозіць замовы Зміцер на ровары. Працуе 6 гадзін, за дзень у сярэднім атрымлівае каля 50 еўра «на рукі».
За гадзіну, па словах мужчыны, можна зарабіць ад 7 да 11 еўра.
«Працую 4-5 дзён на тыдзень, — кажа ён. — Графік такі, што можна працаваць, калі захочаш, нават ноччу. Заробак залежыць ад дня тыдня, у пятніцу і выходныя за кошт таго, што шмат замоў, больш атрымліваеш.
Учора, дарэчы, было дзве замовы ад беларусаў. Беларусаў пазнаю па імёнах, іх у прыкладанні бачна. То я з імі адразу па-беларуску пачынаю размаўляць.
У Вільні нават існуе цэлая суполка беларускіх кур'ераў».
Калі ідзеш працаваць у дастаўку, афармляеш індывідуальную дзейнасць.
«Гэта нескладана: проста падаеш заяўку, на наступны дзень атрымліваеш сертыфікат (гэта працуе толькі для тых, хто мае від на жыхарства ў Літве). Таксама плаціш, вядома, падатак. Ён каля 60 еўра ў месяц.
Буду далей шукаць працу ў IT. Цяпер знайшоў стажыроўку на Java-праграміста. Трэба будзе здаць для гэтага тэст па англійскай. Не ведаю, ці атрымаецца, паспрабую», — падсумоўвае Зміцер.
Цяпер чытаюць
Муж галоўнай гераіні прапагандысцкага фільма БТ скончыў жыццё самагубствам22
Каментары